Deut 14 - Kaqchiquel Bible

¹ Roj kan oj ralk'ual ri Jehová ri qa-Dios, roma ri' man tisokola-qa-iwi' ni man tisokaj-el ri rusumal-iwi' ri k'o nik'aj-iwech, toq k'o jun niken.

² Roma roj kan oj jun tinamit ri kan oj ch'aron chire ri Jehová ri qa-Dios, rija' xojcha'on chikikojol ri ch'aqa' chik ruwach'ulew richin xojok jun tinamit ri kan richin rija'.

Ri chikopi' ri e ch'ajch'oj y ri man e ch'ajch'oj ta

³ Kan man jun k'a chire ri man e ch'ajch'oj ta, titej.

⁴ Ja chikopi' re' ri utz richin ye'itej rix: Ri bóyix, ri karne'l ri taq tzuntzun,

⁵ ri jalajoj kiwech masat y ri juyubel karne'l.

⁶ Ronojel chikopi' ri yekamulun y chuqa' ri ruch'aron-ri' ri kipi'ch, utz ye'itej rix.

⁷ Jak'a re ch'aqa' chik chikopi' re' man ke'itej: Ri camello, ri liebre y ri umul. Re' man yetij ta roma yekamulun, jak'a man ruch'aron ta ri' ri kipi'ch y roma ri' kan man e ch'ajch'oj ta.

⁸ Ri aq ruch'aron-ri' ri rupi'ch, jak'a man nikamulun ta. Chuqa' re' man titej y man tichop ri ruch'akul toq kamineq chik, roma xa man ch'ajch'oj ta.

⁹ Ri chikopi' ri ek'o pa ya' utz nitej, xaxe ri k'o kixik' y k'o kisolotal.

¹⁰ Jak'a ri maneq kixik' y maneq kisolotal, man ke'itej y kan tibana' chike chi man e ch'ajch'oj ta.

¹¹ Xabachike kiwech aj-xik' taq chikopi' ri e ch'ajch'oj, utz nitej.

^12-18 Jak'a ri jalajoj kiwech aj-xik' taq chikopi'*f3* ri nikitej ti'ij, rix man ke'itej, xa k'o chi ye'iwixowaj, achi'el ri aj-xik' taq chikopi' ri nikitej ri q'ayis y ri aj-xik' taq chikopi' ri nikitej ti'ij kichin ch'aqa' chik chikopi'.

¹⁹ Ri jalajoj kiwech taq chikopi' ri ek'o taq kixik' y ri ek'o k'iy taq kaqen, man e ch'ajch'oj ta, y roma ri' man utz ta richin ye'itej.

²⁰ Jak'a ronojel ri jalajoj kiwech aj-xik' taq chikopi', ri kan e ch'ajch'oj, kan ke'itija'.

²¹ Ri chikopi' ri kiyon yeken, man ke'itej, roma rix ix jun tinamit ri ix rucha'on ri Jehová ri qa-Dios. Xa kan utz k'a niya' chike ri man e iwinaq ta, richin nikitej rije' o nikik'ayij-el chike ri winaqi' ri choj yeq'ax-el iwik'in. Man tichaq'arisaj ri ti alaj tzuntzun chupan ri tz'umaj richin ri te'ej.

Pixabanik pa ruwi' ri jun chire ri lajuj

²² Y ronojel k'a juna' rix k'atzinel chi nich'er kan ri jun chire ri lajuj chire ri jalajoj ruwech itiko'n.

²³ Ri jun lajuj chire ri jalajoj ruwech ixin, ri vino, ri aceite, ri nabey taq kal ri iwákix y ri ikarne'l; kan xkixwa-xkixuk'ya' k'a chuwech ri Jehová ri qa-Dios chunaqaj ri rachoch ri chiri' ri akuchi rucha'on-wi rija', richin chi chiri' ninatex-wi ri rubi', richin chi niwetamaj ninimirisaj ruq'ij ri Jehová ri qa-Dios ronojel q'ij chire ri ik'aslen.

²⁴ Wi ri akuchi rucha'on-wi ri Jehová ri qa-Dios, kan janila nej k'o chiwe rix richin nik'uaj ri jun chire ri lajuj ri rusipan chik ri Dios chiwe,

²⁵ jari' rix nik'ayij ri jun chire ri lajuj ri' y ri pueq jari' ri nik'uaj. K'ari' xkixbe ri akuchi rucha'on-wi rija'.

²⁶ Rik'in ri pueq ri' nibeloq'o' ri achike xturayij ri iwánima, wi wákix, karne'l, juba' vino, o juba' ruya'al manzana ch'amirisan o xabachike chike ri nirayij; kan xkixwa-xkixuk'ya' chuwech ri Jehová ri qa-Dios, y kan xkixkikot k'a rix y ri e aj pan iwachoch.

²⁷ Man ke'imalij kan ri levita ri ek'o pan itinamit, roma rije' man xke'ichinan ta, achi'el ri xtiwichinaj kan rix.

²⁸ Ri pa taq ruk'isibel chire ri ox-ox juna' k'o chi nich'er kan ri jun chire ri lajuj chire ri itiko'n richin ri jun juna', y niyek kan pan itinamit,

²⁹ richin niya' chike ri levita ri man jun nikichinaj kan chi'ikojol, chuqa' ri man e iwinaq ta ri ek'o chi'ikojol, ri meba'i' y ri e malkani' ri ek'o pan itinamit richin xkewa-xke'uk'ya' jebel. Richin keri' ri Jehová ri qa-Dios xtuya' urtisanik pan iwi' rik'in ronojel ri xtiben.