Deut 13 - Kaqchiquel Bible

¹ Wi k'o ta jun achin ri nibek'ulun-pe chi'ikojol y nubij chi rija' jun q'alajirisey ruch'abel ri Dios o achik'anel y k'ari' nubij ta chiwe chi kan xkebanatej nima'q taq banobel ri man jun bey e tz'eton,

² y kan yebanatej k'a ri nima'q taq banobel ri' y k'ari' nubij ta chiwe: Jo' keqatzeqelibej ri ch'aqa' chik dios ri xa man jun bey e iwak'axan y qojxuke' chikiwech y tiqaya' kiq'ij xticha' ta chiwe,

³ kan man tinimaj k'a rutzij jun wineq keri'. Roma ri Jehová ri qa-Dios xa yixrutejtobej richin nutz'et wi kan qitzij niwajo' rija' rik'in ronojel iwánima, chupan chijun ik'aslen.

⁴ Xa kan titzeqelibej k'a ri Jehová ri qa-Dios; kan chuwech k'a rija' tixibij-wi-iwi', titaqej k'a ri rupixa' y kan tiwak'axaj ri nubij, kan tisamajij y junan iwech tibana' rik'in rija'.

⁵ Jak'a ri wineq ri nubij chi q'alajirisey ruch'abel ri Dios o k'o ri yerachik'ala' y xa man keri' ta, kan k'o chi nikamisaj, roma xa yixrutaqchi'ij richin nipaba-iwi' chuwech ri Jehová ri qa-Dios ri xojelesan-pe pan Egipto ri akuchi xixxime' pa samaj. Rija' xaxe k'a nrajo' yixruch'er kan chire ri bey ri rubin ri Jehová ri qa-Dios chi nitzeqelibej. Jun wineq keri' kan tikamisex richin tik'is-el ri etzelal chi'ikojol.

⁶ Y wi ta xa jun inimal, jun ichaq', jun ik'ajol, jun imi'al, o ri iwixjayil o jun iwach'alal ri kan janila niwajo', nutej ruq'ij chiwij pan ewel y nubij chiwe chi tiya' kiq'ij ch'aqa' chik dios ri man jun bey iwetaman ruwech, ni ta ri iwati't-imama' man xketamaj ta chuqa' kiwech.

⁷ Achi'el ri ki-dios ri winaqi' ri ek'o nej-naqaj chiwe rix, ri nitiker-pe pa jun k'ulba't y napon k'a pa jun chik ruk'ulba't ri iruwach'ulew.

⁸ Xa man kixniman chire, ni man tiwak'axaj ri ruch'abel, ni man tijunamatej-iwech rik'in, man tijoyowaj ruwech, y man tikuch-ruwi' ri rumak.

⁹ Xa kan tikamisaj k'a y ja rix ri nabey xkixtzeqen ri iq'a' chirij y k'ari' xtutzeqej ruq'a' chijun ri tinamit.

¹⁰ Kan tik'aqa' k'a chi abej y keri' niken, roma xrajo' xixruch'er kan rik'in ri Jehová ri qa-Dios ri xojelesan-pe pan Egipto ri akuchi xixxime' pa samaj.

¹¹ Richin keri' chijun tinamit Israel xtikak'axaj y xtik'oje' xibinri'il kik'in, richin man jun chik tibanon jun etzelal keri'.

¹² Wi xtiwak'axaj ta chi chi'ikojol rix chupan jun chike ri tinamit ri xtuya' ri Jehová ri qa-Dios chiwe richin yixk'ase' chupan,

¹³ chi ek'o achi'a' ri maneq Dios chikiwech xebek'ulun-pe, y yekitaqchi'ij ri winaqi' richin ri tinamit richin nikiya' kiq'ij ch'aqa' chik dios ri man e qitzij ta y man iwetaman ta kiwech.

¹⁴ Jari' rix kan k'o chi niwetamaj jebel, titz'eta' y tik'utuj ke taq ri', y wi nibek'ulun-pe chi kan qitzij banatajineq re jun itzel banobel re' chi'ikojol,

¹⁵ kan xke'ikamisaj k'a rik'in espada konojel ri winaqi' richin ri tinamit ri', keri' chuqa' ronojel ri kawej, y kan ke'ik'isa' k'a ronojel ri k'o kik'in.

¹⁶ Nimol ruchi' ronojel ri kibeyomel y nimontonij pa nima-ruwech bey richin molojri'il, y niya' ruq'aq'al ri tinamit y ronojel ri k'o kik'in y re' xtok achi'el jun poron chikop chuwech ri Jehová ri qa-Dios. Y kan xtok k'a kan wuluwik abej y man jun bey chik xtipabex-q'anej.

¹⁷ Kan man jun k'a tichap chire ri xa kan banon chire chi nik'is jumul, richin keri' ri Jehová xtik'o-qa ri royowal, y xtujoyowaj iwech. Rija' xtujoyowaj iwech y xkixruwinaqirisaj, achi'el xusuj chike ri qati't-qamama',

¹⁸ wi rix kan xtinimaj ri rutzij y kan xtitaqej ri rupixa' richin jantape' ri xinya' chiwe wakami, y wi kan choj xtiben chuwech ri Jehová ri qa-Dios.