Colosenses 4 - Kaqchiquel Bible

¹ Rix ajaw, kan xaxe k'a ri utz y ri choj tibana' kik'in ri isamajela', toqaqa chi'ik'u'x chi rix chuqa' k'o jun iwajaw chila' chikaj.

² Kan beneq k'a ruwech kixch'on rik'in ri Dios, jantape' ta k'a ixk'es y jantape' tik'oje' matioxinik iwik'in.

³ Kixch'on rik'in ri Dios pa qawi' roj chuqa', chi rija' nujeq ta achi'el jun ruchi-jay chiqawech richin chi niqatzijoj ri k'a juba' tuq'alajirisaj, chi roma ri Cristo toq yojkolotej. Y chutzijoxik k'a ri' toq xinok re pa cárcel.

⁴ Tik'utuj k'a chire ri Dios chi kan jebel ta rubixik xtinben toq xtintzijoj ri xuq'alajirisaj rija' chuwe.

⁵ Y rix tiwetamaj k'a yixbiyin chikikojol winaqi' ri man kiniman ta ri Cristo. Man tiya' q'ij chi choj nik'o ri q'ij pan iwi'.

⁶ Kan ta ronojel ri nibij k'o ta utzil nuk'en-pe. Kan ta achi'el toq k'o atz'an rik'in ri iq'utun, keri' ta ri ich'abel richin chi kan xaxe ta k'a ri ruk'amon ri nibij chike konojel ri k'o nikik'utuj chiwe.

Ri ruk'isibel taq ch'abel

⁷ Ri qach'alal Tíquico xtiberutzijoj k'a chiwe ri achike nubanon. Rija' jun qach'alal ri janila ninwajo' y kan nuben-wi k'a ri rusamaj ri ajaw beneq-ruwech. Kan wachibil-wi k'a chupan ri samaj.

⁸ Y ja rija' ri ninteq-el chila' iwik'in richin niwetamaj achike qabanon y richin nukuquba' ik'u'x.

⁹ Y rik'in rija' ninteq-el chuqa' ri qach'alal Onésimo, ri eleneq-pe chila' iwik'in rix. Ri Onésimo kan kuqul k'a ruk'u'x rik'in ri Dios, y yalan ninwajo'. Re ka'i' qach'alal re' xtikitzijoj k'a chiwe ronojel ri banatajineq re wawe'.

¹⁰ Ri Aristarco, ri k'o wik'in wawe' pa cárcel, nuteq-el rutzil-iwech. Y keri' chuqa' nuteq-el rutzil iwech ri Marcos, ri rach'alal ri Bernabé. Y xinbij yan k'a chiwe chi wi napon chila' iwik'in, kan utz ruk'ulik tibana'.

¹¹ chuqa' nuteq-el rutzil-iwech ri Jesús, ri nibix chuqa' Justo chire. Xa kan xaxe re oxi' qach'alal re' ri e nuwinaq judío ri junan yojsamej kik'in richin chi e k'iy ta ri yeniman richin ri ajaw Jesús y ye'ok ta pa rajawaren ri Dios. Rije' janila nikikuquba' nuk'u'x.

¹² Ri Epafras nuteq-el rutzil-iwech. Y rix jebel iwetaman ruwech rija' roma chila' iwik'in rix peteneq-wi, y jun utzilej rusamajel ri Cristo. Rija' rik'in ronojel ránima nich'on rik'in ri Dios iwoma rix, richin chi rix kan xtikuqer ta ik'u'x, chi kan ta xtitz'aqet ri ik'aslen y kan ta xtiben ronojel ri nrajo' ri Dios.

¹³ Yin nintz'et k'a chi ri Epafras yalan yixruk'uxla'aj, roma ri nuben iwoma rix y koma chuqa' ri qach'alal ri ek'o pa tinamit Laodicea y ri ek'o pa tinamit Hierápolis.

¹⁴ Y chuqa' ri Lucas nuteq-el rutzil-iwech. Rija' jun aq'omanel chirij ri ruch'abel ri Dios y yin janila ninwajo'. Chuqa' ri Demas nuteq-el rutzil-iwech.

¹⁵ Y rix tibana' utzil tiya' rutzil-kiwech ri qach'alal ri ek'o pa tinamit Laodicea. Y tiya' rutzil-ruwech ri Ninfa y ri molaj qach'alal ri nikimol-ki' pa rachoch rija'.

¹⁶ Y toq rix isik'in chik k'a re wuj re' chikiwech ri qach'alal, kan tibana' k'a chi tisik'ix chuqa' chikiwech ri molaj qach'alal ri ek'o pa tinamit Laodicea. Y keri' chuqa' ri jun chik wuj ri ninben-el chike rije', ninwajo' chi rix nisik'ij chuqa'.

¹⁷ Y tibana' k'a utzil tibij chire ri Arquipo chi tubana' ri samaj ri ya'on chire roma ri Ajaw.

¹⁸ Yin Pablo ninteq k'a el rutzil-iwech. Y titz'eta' k'a re ruk'isibel chire re wuj re', kan rik'in k'a nuq'a' yin xinben-wi-el. Y man timestaj chi ink'o pa cárcel. Ri rutzil ri Dios xtik'oje' ta k'a iwik'in chi'iwonojel. Kan keri' ta k'a.