Colosenses 3 - Kaqchiquel Bible

¹ Roma ri', wi rix kan xixk'astej junan rik'in ri Cristo, kan beneq k'a ruwech tich'obo' rij ri k'o chila' chikaj, ri akuchi k'o-wi ri Cristo, tz'uyul pa rijkiq'a' ri Dios.

² Kan ja wi k'a ri k'o chila' chikaj ri tich'obo' y man ja ta ri ek'o chuwech re ruwach'ulew.

³ Keri' ninbij chiwe roma rix achi'el xixken yan chuwech ri ch'obonik richin re ruwach'ulew, y ri ik'aslen jikil rik'in ri Cristo, y jun ibanon rik'in ri Dios.

⁴ Xaxe ri Cristo niya'on ri ik'aslen, y toq xtipe chik jun bey, jari' xkixq'alajin rik'in, y junan xkixbek'oje' rik'in rija' ri chila' chikaj rik'in ruq'ij-ruk'ojlen.

Xekanej yan kan ri itzel taq rayinik

⁵ Roma ri', kan tikamisaj ri itzel taq rayinik ri xa richin re ruwach'ulew. Ri achi'a' y ri ixoqi' man tikikanola-ki' richin yemakun. Kan man k'a kixok man ix ch'ajch'oj ta. Man tiya' q'ij chire ri itzel taq irayibel. Man chik tirayij chi iwik'in ta rix k'o-wi ronojel. Roma ri keri' xa kan junan rik'in ri niya' ta kiq'ij ri dios ri xa man e qitzij ta.

⁶ Y xa roma k'a ri banobel ke taq ri' ri yekibanala' ri winaqi', toq ri Dios nuya' ruk'ayewal pa kiwi'.

⁷ Ri rubanon kan, kan keri' wi k'a ri xe'ibanala' rix.

⁸ Jak'a re wakami xkanej yan kan ronojel. Man k'a ketike' oyowal pa taq iwánima, man tibuqu iwik'in roma iwoyowal, man ke'ibanala' ri man ruk'amon ta, man tiyoq' rubi' ri Dios, y man tibij itzel taq tzij.

⁹ Man titz'ukula-tzij, roma xa iya'on chik kan ri itzel k'aslen ri xik'uaj.

¹⁰ Wakami jun k'ak'a' k'aslen ik'uan. Y ri Dios nuben k'a chiwe richin chi yixok más achi'el rija', richin niwetamaj más ruwech.

¹¹ Y roma k'o ri k'ak'a' qak'aslen, man jun nuben chiqe wi oj judío o man oj judío ta, wi k'o qetal o maneq, wi k'o juba' qaq'ij o maneq, wi oj ximon pa samaj o oj totajineq chik. Roma xaxe ri Cristo ri k'o rejqalen y k'o pa ruwi' ronojel.

¹² Ri Dios yalan yojrajo', xojrucha' y xuben chiqe chi xojok loq'olej. Roma ri' nik'atzin chi beneq ruwech tik'oje' ri joyowanik qik'in, utz qana'oj tiqabana', man ta niqanimirisaj-qi', oj ch'uch'uj ta y yojkoch'on ta.

¹³ Toq k'o jun ri nibanon itzel chiqe, tiqakoch'o' y tiqakuyu', kan achi'el xuben ri Cristo chi xukuy ri qamak roj.

¹⁴ Y ja ri ajowabel ri más nik'atzin. Roma wi yojajowan, kan nuben chiqe chi junan qawech qonojel.

¹⁵ Ri uxlanen richin ri Cristo ja ta ri' ri nik'oje' pa taq qánima, roma kan oj richin ri chak'ulaj richin rija' y xojoyox richin yojk'ase' rik'in uxlanibel-k'u'x. Nik'atzin k'a chuqa' chi jantape' qojmatioxin.

¹⁶ Kan nik'atzin k'a chuqa' chi ri qánima nojineq ta rik'in ri ruch'abel ri Cristo. Kan rik'in ronojel etamabel tiqatijola-qi' chiqachibil-qi'. Y tiqabixaj rubi' ri ajaw roma ri matioxinik ri k'o pa taq qánima.

¹⁷ Ronojel k'a ri niqaben y ri niqabij, kan xaxe k'a pa rubi' rija', y roma rija' beneq ruwech qojmatioxin chire ri qatata' Dios.

Ri banobel ri ruk'amon chi nuben jun ralk'ual ri Dios

¹⁸ Rix ixoqi', tinimaj kitzij ri iwachijilal, roma keri' ruk'amon chi niben roma iniman chik ri ajaw.

¹⁹ Y rix achi'a', ke'iwajo' ri iwixjayilal, y man chaq ixqoloqik kik'in.

²⁰ Rix ak'uala', jantape' tinimaj kitzij ri ite-itata', roma jari' ri niqa' chuwech ri ajaw.

²¹ Y rix te'ej-tata'aj, man tiyek koyowal ri iwalk'ual, richin man nikimalij kik'u'x.

²² Rix samajela', jantape' tinimaj kitzij ri iwajaw. Man tiben k'a chi xaxe toq ek'o-apo rije' iwik'in yixniman-tzij, xaxe richin kixnimex chi rix ix utz taq samajela'. Nik'atzin chi rik'in ronojel iwánima tibana' ri kisamaj, roma k'o rukiy ri Dios chiwech.

²³ Xabachike k'a ri niben, kan rik'in k'a ronojel iwánima tibana' achi'el xa ta kan ja ri rusamaj ri ajaw Jesucristo ri niben y man kichin ta ri winaqi'.

²⁴ Y ri ajaw Jesucristo xtuya' k'a ri sipanik chiwe roma ja rija' ri nisamajij. Kan iya'on-wi k'a pa nabey y roma ri' xkixichinan chila' chikaj.

²⁵ Jak'a ri yebanon etzelal, xtikik'ul rutojbalil roma ri etzelal nikiben. Roma ri Dios man nutzu' ta ri wineq wi k'o ruq'ij o maneq.