Apocalipsis 14 - Kaqchiquel Bible

Ri yebixan ri k'ak'a' bix

¹ K'ari' xintz'et chik k'a chi ri Karne'l pa'el pa ruwi' ri juyu' Sión, e rachibilan e144,000 winaqi'. Y konojel k'a re', kik'uan ri nik'aj kiwech ri rubi' ri Jesucristo y ri rubi' ri Tata'ixel.

² Y jari' toq xinwak'axaj chi k'o jun bix ri niban-pe chikaj y ri rubanik kan achi'el k'a toq janila yewajin k'iy raqen-ya', achi'el toq niwulul jun nimalej koqolajay, o kan achi'el toq nawak'axaj chi yeq'ojomex janila k'iy arpa.

³ Chuwech k'a apo ri akuchi tz'uyul-wi ri Dios y ri akuchi ek'o-wi ri achi'a' ri k'o kiq'ij y ri e kaji' ri k'o kik'aslen, chiri' yebixan-wi, y jun k'ak'a' bix k'a ri nikibixaj. Y kan man jun k'a nitikir netaman ri bix ri', xa kan xaxe ri e 144,000 ri e kolotajineq chik el chuwech ri ruwach'ulew.

⁴ Y jare' ri man jun bey xek'oje' ta kik'in ixoqi'. Kan e ch'ajch'oj-wi y kan jantape' kojqan ri Karne'l. Jare' ri nabey ri xekol-pe chikikojol ri winaqi', richin chi ye'ok achi'el nabey sipanik chire ri Dios y ri Karne'l.

⁵ Y kan man jun tz'ukun-tzij ri eleneq ta pe pa kichi', xa kan e ch'ajch'oj chuwech ri Dios.

Ri nikiq'alajirisaj ri e oxi' ángel

⁶ Chirij ri' xintz'et jun ángel ri nixik'an pa runik'ajal ri kaj, ri uk'uayon ri utzilej ch'abel richin kolotajik ri man k'isel ta richin nuya' chike ri winaqi' richin jalajoj ruwach'ulew, ijatzul, tinamit y ch'abel.

⁷ Y rik'in ronojel ruchuq'a' nubij: Tik'oje' rukiy ri Dios chiwech y tiya' ruq'ij ruk'ojlen, roma ri q'ij richin chi nuq'et-tzij xa xoqaqa. Tiya' ruq'ij ri Dios ri xbanon ri kaj y ri ruwach'ulew, ri palou y ri ralaxibel taq ya', nicha'.

⁸ Y kan jari' toq xok'ulun ri ruka'n ángel y xubij: Xtzaq yan ri nimalej tinamit Babilonia ri achi'el jun ixoqi' itzel ruk'aslen. Ja rija' xbanon chike konojel winaqi' chi xemakun y xuben chike chi achi'el xeq'aber pa ruq'a' ri mak, nicha'.

⁹ Y kan jari' peteneq ri rox ángel, y kan rik'in chuqa' ruchuq'a' nubij: Ri xkeya'on ruq'ij ri nabey chikop y nikiya' chuqa' ruq'ij ri ruwachibel, y kan niqa' chikiwech chi nikik'ul ketal nik'aj-kiwech o pa kiq'a',

¹⁰ kan xtiqaqa-wi ruk'ayewal pa kiwi'. Kan xketzaq k'a achi'el yetzaq ri q'abarela', roma ri Dios kan xtuben chike chi tikiqumu' ri royowal rija'. Y konojel ri xkebanon keri', xtikitej poqon chupan ri q'aq' y ri chuwilej-abej chikiwech loq'olej taq ángel chuwech ri Karne'l.

¹¹ Ri q'aq' ri' man jun bey xtichup, y ri sib kan richin jantape' pa'el chikaj. Y kan man jun bey k'a xkeuxlan chire ri tijoj-poqonal ri', ni ri chaq'a' ni ri paq'ij. Y chiri' xke'apon-wi ri yeya'on ruq'ij ri nabey chikop y ri ruwachibel, y ri kan kik'uan ri retal ri chikop ri' nik'aj-kiwech o pa kiq'a', nicha'.

¹² Re rutzijol re' kan nuben k'a chi ri e ralk'ual ri Dios k'o chi kow y tikuqer más kik'u'x rik'in ri Jesús y tikibana' ri nubij.

¹³ Chirij ri' xinwak'axaj chi k'o jun ri nich'on-pe k'a chila' chikaj y nubij: Tatz'ibaj k'a re xtinbij chawe; kan jebel k'a ruwa-kiq'ij konojel ri xkeken-apo ri kikuquban kik'u'x rik'in ri Jesús, xcha'. Y xinwak'axaj chuqa' chi ri Loq'olej Espíritu xubij: Ja', roma kan xke'uxlan chire ri kisamaj, y ri kisamaj kan xtikachibilaj-el, xcha'.

Ri ruk'ayewal ri xtipe pa ruwi' ri ruwach'ulew

¹⁴ Y toq xitzu'un yan chik, xintz'et k'a jun sutz' seq. Y pa ruwi' k'a re sutz' re' tz'uyul jun ri xo'alex achi'el wineq. Rija' rukusan k'a jun corona ri banon rik'in q'anapueq y ri pa ruq'a' ruk'uan jun jos ri janila rey.

¹⁵ Y kan jari' k'a chuqa' xbe'el-pe jun ángel ri chiri' pa rachoch ri Dios, y kan rik'in k'a ruchuq'a' nich'on-apo chire ri tz'uyul pa ruwi' ri sutz' y nubij k'a apo chire: Taq'ata' la tiko'n, roma xa xoqaqa yan ri q;ij y kan q'en chik ri tiko'n richin ri ruwach'ulew, nicha'.

¹⁶ Y ri tz'uyul pa ruwi' ri sutz' kan keri' xuben, xuk'owisaj ri rujos chuwech ri ruwach'ulew y xuk'ol-el ri tiko'n.

¹⁷ Y k'ari' xbek'ulun chik pe jun ángel ri pa rachoch ri Dios ri k'o chila' chikaj, ruk'amon-pe chuqa' jun jos ri janila rey.

¹⁸ Y rik'in ri porobel xbe'el-pe jun chik ángel ri kan ya'on uchuq'a' chire pa ruwi' ri q'aq'. Y rik'in uchuq'a' xch'on-apo chire ri jun chik ángel ri uk'uayon ri jos y xubij: Takusaj la ajos la janila rey, richin ye'aqupij-pe ri tzeqaj uva ri ek'o chuwech ri ruwach'ulew roma xechaq'aj yan, xcha'.

¹⁹ Y ri ángel ri uk'uayon ri jos ri janila rey, kan xuk'owisaj ri jos chuwech ri ruwach'ulew y xerelesaj-el ri winaqi' achi'el yeruqupij-el ri tzeqaj uva. K'ari' xeruya' pa jun nimalej yitz'bel-uva, ri nuk'exewachuj ri royowal ri Dios.

²⁰ Keri' ri uva ri' xpitz' k'a chuchi' el ri tinamit. Y chupan ri yitz'bel xbe'el-pe janila chi k'ik' y xbiyin-el nej y ri raqen jun la'eq lajuj q'ij binen, y ri rupimil napon k'a akuchi nibe-wi ri ch'ich' pa kichi' ri kiej.