Apocalipsis 12 - Kaqchiquel Bible

Ri ixoq y ri nimalej itzel keq rij chikop ri achi'el ayin

¹ K'ari' xintz'et chi ri chikaj xbeq'alajin-pe jun nimalej retal; xintz'et k'a jun ixoq ri rupison ri' chupan ri q'ij achi'el xa ta jari' ri rutziaq. Ri ik' k'o qa chuxe' ri raqen y pa rujolon k'o jun corona ri ek'o kablajuj ch'umila' chuwech.

² Y re ixoq re' kan niq'alajin chi nralaj yan jun ak'ual, y kan janila nisik'in roma jari' k'o chupan ri ruq'axo'n.

³ K'ari' ri chikaj xbek'ulun-pe jun nimalej itzel keq rij chikop ri achi'el ayin rubanik. Ri chikop ri' k'o wuqu' rujolon, lajuj ruk'a' y ruk'uan jujun tz'ajtz'ik ch'ich' ri pa jujun chike ri wuqu' rujolon.

⁴ Y re itzel chikop re', xaxe k'a rik'in ri rujey xerumes-pe jun chire ri oxi' chike ri ch'umila' ri ek'o chikaj, y xeruk'eq k'a pa ruwi' ri ruwach'ulew. K'ari' xbek'oje-apo chuwech ri ixoq ri nik'oje' yan ral. Ruchajin-apo jampe' xtik'oje' ri ak'ual, richin nutej-el.

⁵ Ri ixoq ri' kan xalex na wi ri ti ral y ti ala'. Jak'a xa xelesex-el chuwech richin xuk'uex-apo chuwech ri Dios y xya'ox rutz'uyubal. Re ak'ual re' ja rija' xtiq'aton-tzij achi'el xa ta rik'in jun ch'ich' pa ruwi' chijun ri ruwach'ulew.

⁶ Jak'a ri ixoq ri' xanimej-el, y xbe pa tz'iran ruwach'ulew, roma ri Dios kan chiri' rukanon-wi richin chi nilix oxi' juna' rik'in nik'aj.*f4*

⁷ K'ari' ri chila' chikaj xbanatej jun oyowal. Ri ángel Miguel e rachibilan ri ru-ángel, xkiben oyowal rik'in ri itzel chikop y ri e itzel taq ru-ángel.

⁸ Jak'a ri nimalej itzel keq rij chikop y ri itzel taq ru-ángel man xech'akon ta, y xe'oqotex-pe ri chila' chikaj.

⁹ Ri nimalej itzel keq rij chikop ri' jari' ri Itzel-Wineq, ri Satanás, ri kumetz ri k'o-pe ojer y ri niq'olon kichin konojel winaqi'; kan xk'aq k'a pe chuwech ri ruwach'ulew e rachibilan ri itzel taq ru-ángel.

¹⁰ Y jari' toq yin Juan xinwak'axaj k'a chi ri chila' chikaj k'o k'a jun ri nich'on y rik'in uchuq'a' nubij: Xoqaqa yan ri kolotajik, xoqaqa yan ri ajawaren y ri uchuq'a' richin ri qa-Dios. Keri' chuqa' xoqaqa yan ri ruq'atbel-tzij ri Cristo. Roma xk'aq yan el ri nosujun kichin ri qach'alal chuwech ri Dios chi paq'ij chi chaq'a'.

¹¹ Y ri qach'alal ri' xech'akon yan chirij ri Itzel-Wineq, roma ri rukik'el ri Karne'l, roma rije' kan man xek'ix ta xkiq'alajirisaj-ki' chi kiniman ri Cristo. Man xkixibij ta ki' stape' xe'apon pa kamik.

¹² Roma ri' rix ri ixk'o chila' chikaj tikikot ri iwánima. Jak'a kan toq'ex iwech rix ri ixk'o chuwech ri ruwach'ulew y ri pa ruwi' taq ya'. Roma ri Itzel-Wineq xxule-qa iwik'in rix rik'in janila royowal, roma rija' retaman chi man k'iy ta chik q'ij ri ya'on chire, xcha'.

¹³ Jak'a toq ri nimalej itzel keq rij chikop ri achi'el ayin rubanik xuna' chi xk'aq-pe, y chuwech chik re ruwach'ulew k'o-wi, jari' toq xuchop k'a roqotaxik ri ixoq ri xk'oje' ral ala'.

¹⁴ Y roma ri' ri ixoq xya'ox-el chire, juk'ulaj ruxik' kot ri janila e nima'q, richin chi nitikir napon k'a pa tz'iran ruwach'ulew, nej chire ri nimalej chikop ri' y chiri' nilix oxi' juna' rik'in nik'aj.

¹⁵ Y ri chikop ri' xberuk'aqa-pe jun achi'el raqen-ya' ri pa ruchi' chirij ri ixoq, richin chi ri ya' ri' nuqirirej-el.

¹⁶ Jak'a ri ruwach'ulew xuto' ri ixoq roma ri' chi'anin xubeq' ri ya' ri xuk'eq ri chikop.

^17-18 Y roma man xtikir ta chirij ri ixoq, xyakatej janila royowal. Roma ri' xbe, y xeberuchapa' chi oyowal ri ch'aqa' chik e ral-riy ri ixoq, nel chi tzij ri kan nikinimaj rutzij ri Dios y chuqa' kan kitzeqeliben ri rubin kan ri Jesucristo. Chirij ri' ri nimalej itzel keq rij chikop ri' xa xpa'e' kan pa sanayi' chuchi' ri palou.