Apocalipsis 11 - Kaqchiquel Bible

Ri e ka'i' ri yeq'alajirisan richin ri Dios

¹ Chirij ri' xbejach k'a pe jun aj chuwe, ri achi'el jun che' richin etabel. Y xbix k'a chuwe: Kabiyin y tawetaj rupan ri wachoch yin ri Dios, chuqa' ri porobel, y kebe'awajlaj-pe ri janipe' ri yeya'on nuq'ij.

² Jak'a ri ruwa-jay ri richin ri wachoch man tawetaj, roma xa jachon chik pa kiq'a' ri winaqi' ri man ketaman ta nuwech y kawineq ka'i' ik' xtikixeq'-xtikipalibej ri loq'olej tinamit Jerusalem.

³ Y yin xkenteq k'a el ri e ka'i' nusamajela', richin nikiq'alajirisaj ri nuch'abel chupan ri 42 ik' ri'.*f2* Y rije' kikusan tzieq richin bis, xcha'.

⁴ Y xbix k'a chuwe chi ri e ka'i' samajela' ri', ja ri ka'i' che' oliwo y ri ka'i' kandelero ri ek'o-apo chuwech ri Dios ri xbanon ri ruwach'ulew.*f3*

⁵ Y wi k'o jun wineq ri k'o jun etzelal ri nrajo' nuben chike, rije' nel q'aq' pa kichi' richin nikik'is ri etzelanel kichin.

⁶ Ri e ka'i' samajela' ri' kan ya'on k'a uchuq'a' pa kiq'a' richin nikiq'et ri job chupan ri q'ij ri kiq'alajirisan. Yetikir chuqa' nikiben chi ri ya' nok kik' y yekiya' nima'q taq ruk'ayewal pa kiwi' ri winaqi' ri ek'o chuwech ri ruwach'ulew, ri janipe' nikajo' rije'.

⁷ Y toq kik'ison chik ruq'alajirisaxik ri ruch'abel ri Dios, ri itzel chikop ri nipe chupan ri itzel siwan q'equ'm rupan, nuben oyowal kik'in, xkeruch'ek y xkerukamisaj.

⁸ Y ri kich'akul xkek'oje' kan ri pa nima-bey richin ri nimalej tinamit Jerusalem, ri akuchi xkamisex-wi ri ajaw ri banon chire chi achi'el chik Sodoma o Egipto.

⁹ Y ri ch'akulaj ri' oxi' k'a q'ij rik'in nik'aj xkek'oje' chikiwech ri winaqi' ri richin jalajoj ijatzul, ch'abel, tinamit y ruwach'ulew. Y kan man xtikiya' ta k'a q'ij chi xkemuq.

¹⁰ Y ri winaqi' ri' xkekikot janila roma ri e ka'i' ri xeken yan. Y roma ri kikikoten janila, kan xkekibanala' k'a sipanik chikiwech-qa rije', roma kan xek'ayewatej pa kiq'a' ri e ka'i' q'alajirisey ruch'abel ri Dios.

¹¹ Jak'a toq q'axineq chik ri oxi' q'ij rik'in nik'aj, xintz'et chi ri Dios xuben chi xk'oje' chik kik'aslen. Roma ri' rije' kan xepa'e' chik k'a el jun bey. Y ri winaqi' ri xetz'eton kichin, kan janila xkik'en rukiy.

¹² Xintz'et chi ri e ka'i' q'alajirisey ruch'abel ri Dios ri xk'oje' chik el jun bey kik'aslen, xkak'axaj k'a jun ch'abel ri chila' chikaj ri xubij: xkijote-pe wawe', xcha'. Y rije' xejote-q'anej chikaj pa jun sutz', ri e etzelanel kichin kan jebel k'a xekitz'et-el toq xebe chikaj.

¹³ Y kan chupan ri ramaj ri' xpe jun nimalej silonel, y xwulatej ri jun ri lajuj chire ri Jerusalem. Y xeken k'a e 7,000 winaqi' roma ri silonel ri'. Jak'a ri xek'ase' kan, janila xkixibij-ki' y xkiya' ruq'ij-ruk'ojlen ri Dios.

¹⁴ Y kere' k'a xq'ax kan ri ruka'n ruk'ayewal pa ruwi' ri ruwach'ulew. Y kan ja chik k'a ri' chi'anin peteneq ri rox ruk'ayewal.

Toq ri ruwuq ángel xuxupuj ri trompeta

¹⁵ Y jari' k'a toq ri ruwuq ángel xuxupuj ri trompeta. Y ri ek'o chila' chikaj rik'in uchuq'a' xech'on-pe, y xkibij: Ri ajawaren richin ri ruwach'ulew wakami richin chik ri Dios ri qajaw, y richin ri Jesús ri Cristo. Kan rija' ri xtiq'aton-tzij pa kiwi' ri winaqi' richin tibe-q'ij tibe-seq, xecha'.

¹⁶ Y ri juwineq kaji' achi'a' ri k'o kiq'ij ri e tz'uyul chupan ri tz'uyubel richin q'atbel-tzij chuwech-apo ri Dios, kan jari' xkiqasaj-ki' k'a pan ulew richin xkiya' ruq'ij.

¹⁷ Y xkibij: Niqamatioxij chawe rat Dios, ri k'o ronojel uchuq'a' pan aq'a'. Kan atk'o-wi-pe pa rutikeribel y atk'o wakami y xkak'oje' jantape', roma xq'alajin ri nimalej uchuq'a' ri k'o pan aq'a', y xachop yan naq'et-tzij.

¹⁸ Ri tzobaj winaqi' richin re ruwach'ulew yakatajineq koyowal chawij, jak'a kan xoqaqa ri q'ij richin chi ri awoyowal rat xqaqa pa kiwi' rije'. Kan xoqaqa ri q'ij richin naq'et-tzij pa kiwi' ri kaminaqi'. Q'ij richin chi xtaya' rajel ruk'exel chike ri asamajela' y ri e q'alajirisey ri ach'abel, chike ri awalk'ual y ri yeya'on aq'ij, chi ch'uti'q chi nima'q. Kan xoqaqa k'a chuqa' ri q'ij chi rat ye'ak'is ri winaqi' ri yebanon chire ri ruwach'ulew richin nik'is, yecha'.

¹⁹ Y jari' k'a toq ri rachoch ri Dios ri k'o chila' chikaj, xjaqatej ri ruchi'. Y kan xtz'etetej ri káxa richin ri rujikibel-tzij ri Dios. Y kan xpe k'a koyopa', y xinwak'axaj koqolajay. Ri ruwach'ulew xsilon, y xeqaqa nimalej taq saqboch.