Am 6 - Kaqchiquel Bible

Ruk'ayewal pa ruwi' ri ruwach'ulew Israel

¹ Toq'ex iwech rix winaqi' ri man jun nimey ixk'o chiri' pa juyu' Sión; chuqa' rix ri kan ikuquban ik'u'x rik'in ri juyu' Samaria; rix ri kan k'o iwejqalen, ri achoq ik'in ye'apon-wi ri iwinaq richin jun to'onik.

² Kixbiyin k'a pa tinamit Calné ri wulutajineq. Tiwetamaj kan jebel ri xbanatej rik'in ri tinamit Hamat. Kixxule-qa pa Gat chupan ri kiruwach'ulew ri aj-Filistea. ¿K'o kami más iwejqalen rix chikiwech rije'?

³ Rix man niwajo' ta nich'ob rij ri q'ij richin ruk'ayewal, jak'a xa peteneq q'ij richin ikamik.

⁴ Rix yixwer pa taq jebelej ch'at ri e banon rik'in key tix. Kan jebel yixkotz'e' pa taq ch'aket ri e buyul y nima'q kaqen. Kan jebel yixnimaq'ijun rik'in alaji' karne'l ri jebel e tiojirisan. Kan jebel ye'itijla' ri nima'q taq wákix.

⁵ Ye'itz'ukula' bix achi'el xuben ri ánima David, bix ri xa man jun rejqalen. Y kan yixbixan rik'in arpa.

⁶ Rix kan nik'o chik ruwi' qumuj vino ri niben. Rix ye'ikusaj jubulej aq'om ri janila jotol rajel. Y man jun nich'ob chirij ri wululen ri xtipe pa ruwi' ri iruwach'ulew.

⁷ Roma ri' rix nabey xkixbe pa ximonri'il, y keri' nik'is-el ronojel nimaq'ij ri ye'iben.

⁸ Yin Jehová ri in Rajaw richin ronojel, kan nuya'on nutzij; yin Jehová ri k'o ronojel uchuq'a' wik'in ninbij: Kan ninwixowaj ri inimirisanen rix ri ix rijatzul kan ri Jacob. Kan ninwetzelaj ri iwachoch richin tobel. Roma ri' ri itinamit kan xtinjech-el pa ruq'a' ri etzelanel iwichin. Chuqa' xkixinjech-el chi'iwonojel rix winaqi' ri ixk'o chupan ri tinamit. Yin Jehová ri yibin.

⁹ Chupan ri q'ij ri', wi ta xaxe e lajuj winaqi' xkek'oje' kan; stape' xtikewaj-ki' chupan jun jay, xa xkeken konojel.

¹⁰ Chupan ri q'ij ri', ka'i' ach'alalri'il nikelesaj-el ri kich'akul ri kaminaqi' ri ek'o chupan ri jay richin yebekimuqu' kan. Ri jun xtuk'utuj-apo chire ri jun chik wi k'a k'o na jun ri rewan kan ri' ri chiri'. Y rija' xtubij chi man jun. Jari' toq ri jun chik xtubij chi man tiq'ajan, y man tunataj ri rubi' ri Jehová,

¹¹ roma ri Jehová xtuteq-pe ri ruk'ayewal pa kiwi' ri jebelej taq jay y keri' chuqa' pa kiwi' ri relik taq jay; y ronojel kan xtitole' kan.

¹² ¿Yetikir kami ri kiej ye'anin chuwech jun nimalej abej? ¿Yetikir kami yesamej ri bóyix pa ruwi' ri palou? ¡Man rik'in ri', rix xa xiben chire ri ruchojmilal achi'el aq'om ri nikamisan; ri utzilej ruchojmilal xa xiben chire chi xok achi'el ri xaqixaq.

¹³ Rix xa xinimirisaj-iwi' toq xe'ich'ek ri tinamit Lodebar y nibij: Man ja ta k'a roj xojch'akon kichin ri tinamit Carnáin.*f1*

¹⁴ Titz'eta' na pe jebel rix nuwinaq israelita. Ri Jehová ri k'o ronojel uchuq'a' pa ruq'a' nubij chi rija' xtiberutaqa-pe chiwij jun tzobaj aj-labal ri kan xkixkitz'ila', nitiker k'a pe pan Hamat ri k'o pa xaman, k'a kela' pa ch'uti'n raqen-ya' Arabá ri k'o pa xokon.