Am 5 - Kaqchiquel Bible

Ri winaqi' israelita xtzolej-pe kik'u'x

¹ Rix nuwinaq israelita, tiwak'axaj re jun bix re' richin bis ri xinben pan ibi'.

² Ri jebelej ruwach'ulew Israel xch'akatej. Kan man xtitikir ta chik xtiyakatej-q'anej, Kan xmalix k'a kan koma konojel, y man jun chik ri xtiyako-q'anej.

³ Kere' k'a ninbij yin Jehová ri k'iytisanel richin ronojel: Wi k'o ta jun tinamit yeruteq e 1,000 achi'a' pa labal, rije' xaxe chik k'a e wok'al ri xketzolin. Wi ta yeruteq e wok'al achi'a', xaxe chik k'a e lajuj ri xketzolin.

⁴ Yin Jehová kere' ninbij chiwe rix israelita: Titzolej-pe ik'u'x wik'in yin y xkixk'ase' chi utzil.

⁵ Man tikanoj ri tinamit Betel. Man kixbe pa tinamit Guilgal. Chuqa' man kixq'ax-el pa Beerseba, roma ri aj-Guilgal kan xke'uk'uex-el pa ximonri'il. Y ri Betel kan xtiwuluwu' kan.

⁶ Titzolej-pe ik'u'x wik'in yin rix ri ix rijatzul kan ri José, y xkixk'ase' chi utzil. Wi man xtiben ta, xtinteq-pe q'aq' pan iwi'. Y ri q'aq' ri' xtuk'is ri Betel, y man jun chik wineq ri xtik'oje' ta kan richin xtuchup ri q'aq' ri'.

⁷ Toq'ex iwech rix ri nixolq'otij ri ruchojmilal. Y ri choj man niya' ta rejqalen.

⁸ Kinikanoj yin ri xibanon kichin ri ch'umila' ri ek'o chuwech ri kaj. Ja yin ri xibanon kichin ri ch'umila' ri nibix Pléyades y Orión chike. Yin ri yijalo ri aq'a' rik'in nimaq'a', y ri paq'ij rik'in ri q'equ'm. Yin ri yimolo-ruchi' ri ya' richin ri palou, richin ninya'aj ri ruwach'ulew chire.

⁹ Yin ri yiwulan ri jay richin tobel, y nink'is kan jumul ri tinamit ri ek'o nima'q tz'aq chikij.

¹⁰ Toq'ex iwech rix ri nitz'uk-tzij chikiwech ri yechojmirisan richin ri yebanatej. Rix ye'iwixowaj ri winaqi' ri yebin ri qitzij.

¹¹ Rix ye'ixolq'otij ri winaqi' ri man jun k'o kik'in. Y niben chike chi k'o chi nikitoj trigo chiwe. Roma ri' man xkixtikir ta xkixk'oje' chupan ri nimalej iwachoch ri e banon rik'in abej. Stape' itikon-qa jebelej taq uva, man xtiqum ta vino chire.

¹² Roma yin wetaman jebel ri itzel taq ibanobal kan xik'o yan ruwi'. Ri imak kan janila e nima'q. Ye'itz'ila' ri choj kik'aslen y yixpuaqix. Y rix man niya' ta q'ij chike ri winaqi' ri man jun k'o kik'in richin yech'on kik'in ri to'onela'.

¹³ Roma ri' ri wineq ri k'o na'oj rik'in man jun nubij; roma re q'ij re' janila k'ayew.

¹⁴ Rix nibij chi yin Jehová ink'o iwik'in. Roma ri' tikanoj ri utz y man tiben ri itzel, richin keri' xkixk'ase' chi utzil. K'ari' kan qitzij chi xkik'oje' iwik'in, yin Jehová, ri Dios ri k'o ronojel uchuq'a' wik'in.

¹⁵ Rix ri ix rijatzul kan ri José, tiwixowaj ri itzel y tiwajo' ri utz. Kan tik'oje' ruchojmilal chikiwech ri to'onela'. Wi keri' xtiben, rik'in juba' xtinjoyowaj iwech yin Jehová ri Dios ri k'o ronojel uchuq'a' wik'in ri yibin.

¹⁶ Yin Jehová, Dios ri k'o ronojel uchuq'a' pa nuq'a' kere' ninbij: Chupan ronojel nima'q ruwech bey richin molojri'il xtak'axatej oq'ej. Chuqa' chupan ronojel bey xtak'axatej raqoj-chi'ij richin bis. Xke'oyox chupan ri bis ri winaqi' ri kan ja kisamaj ri'. Y chuqa' xke'apon ri achi'a' ri yesamej pa juyu' richin ye'oq'.

¹⁷ Toq yin xkipe richin nonya' ruk'ayewal pan iwi', ri raqoj-chi'ij kan xtapon chupan ri ulew richin tikobel uva. Yin Jehová ri yibin.

Ri q'ij richin ri Jehová

¹⁸ Toq'ex kiwech ri winaqi' ri nikirayij yan ri nupeten. ¿Achike kami roma rix niwajo' richin yipe yan ta? Ri q'ij ri' iwoyoben richin xtik'oje' ta saqil, jak'a xaxe q'equ'm ri xtik'oje'.

¹⁹ Re' achi'el toq jun wineq animajineq chuwech jun koj, jak'a xa xtupojij chik ri' rik'in jun oso. Chuqa' achi'el toq jun wineq nok-apo pa rachoch, y nraq'e-apo chuwech ri tz'aq richin ri jay y xa nuti' jun kumetz.

²⁰ Kan qitzij chi ri q'ij richin yipe xa kan jun q'ij richin q'equ'm, Re q'ij re', q'ij richin jun nimalej q'equ'm, y man richin ta saqil.

Ri sipanik ri man nalex ta pa kánima

²¹ Yin kan ninwixowaj ri nimaq'ij ri niben; kan itzel nintz'et toq nimol-iwi' richin niya' nuq'ij.

²² Man ninwajo' ta nisuj chikop ri niporox chijun. Man nink'awomaj ta ri sipanik richin jalajoj ruwech ixin. Toq nik'en-pe ri sipanik ri niq'alajirisan chi junan iwech wik'in, re' kan man jun rejqalen chinuwech yin.

²³ Tiwelesaj-el chinuwech ri ibix roma xa itzel ninwak'axaj. Y man ninwajo' ta chik ninwak'axaj ruch'abel ri iq'ojom.

²⁴ Yin ninwajo' chi man kixtane' chubanik ri ruchojmilal, achi'el jun raqen-ya' ri chaq palik nibiyin, y man jun bey nipa'e-qa. Kan ta palik utz niben achi'el ri raqen-ya' ri man jun bey nichaqi'j-qa.

²⁵ Ri iwati't-imama' kan man xkisuj ta k'a sipanik chinuwech, toq xek'oje' kawineq juna' pa tz'iran ruwach'ulew.

²⁶ Jak'a re wakami rix k'o chi xtik'uaj-el ri e ka'i' ruwachibel ri i-dios. K'o chi xtik'uaj-el ri Sicut ri achi'el i-rey y ri Quiiún ri achi'el jun ch'umil rubanik, ri xa ja rix ix banayon kichin;

²⁷ roma yin xkixinteq-el más k'a kela' chirij ri ruwach'ulew Damasco. Yin Jehová ri Dios ri k'o ronojel uchuq'a' wik'in ri yibin.