Am 4 - Kaqchiquel Bible

Ri ixoqi' aj-Samaria

¹ Rix ixoqi' aj-Samaria, kan janila ix ti'oj, achi'el ri wákix ri ek'o pa ruwach'ulew Basán. Rix kan janila ye'itz'ila' ri winaqi' ri man jun k'o kik'in. Rix niben chike ri iwachijilal chi tikik'ama-pe más vino richin yixq'aber. Roma ri' tiwak'axaj re ch'abel re':

² Yin Jehová ninjikiba' nutzij pa nubi' chi xtapon k'a jun q'ij toq xkixuk'uex-el rik'in ch'ich' richin chapbel. Chuqa' ri iwal xke'uk'uex-el rik'in chapbel-ker.

³ Xkixjik' k'a el pa taq wopol chire ri tz'aq richin ri tinamit. Choj xkixk'aq-el k'a pa juyu' Hermón. Yin Jehová ri yibin.

Ri winaqi' israelita man yechojmir ta

⁴ Kixbiyin pa Betel, y chiri' kixmakun-wi. Kixbiyin pa Guilgal, y kixmakun más ri chiri'. Ronojel k'a nimaq'a', tisuju' kamelabel richin nikuyutej ri imak. Y pa taq ox-ox q'ij, tik'ama' k'a pe ri jun chire ri lajuj chire ronojel.

⁵ Tik'ama' k'a pe kaxlan-wey ri k'o ch'amilej q'or rik'in, y tik'ata' chinuwech yin richin jun sipanik richin matioxinik. Titzijoj k'a chi xiya' yan ri isipanik ri nalex-pe pa taq iwánima. Kan tinimirisaj k'a iwi' rix israelita, roma jari' ri niwajo' ri niben. Yin Jehová ri yibin.

Ri winaqi' israelita man xtzolin ta pe kik'u'x

⁶ Roma re mak re' yin xinben chiwe richin xq'urul ipan roma wayjal. Chupan ronojel tinamit man xinya' ta chik wey. Man rik'in ri' man xtzolej ta pe ik'u'x wik'in. Yin Jehová ri yibin.

⁷ Chuqa' ja yin xibanon chi man xuben ta chik job pan iwi'. Man xinya' ta pe job toq k'a oxi' na ik' nrajo' richin nik'ol ri itiko'n. Xinya' job chupan ch'aqa' tinamit, jak'a chupan chik ch'aqa' man xinya' ta. Chupan ch'aqa' ulew richin tiko'n xinya-pe job. Jak'a ch'aqa' ulew richin tiko'n xa xechaqi'j-qa. Man rik'in ri' man xtzolej ta pe ik'u'x wik'in. Yin Jehová ri yibin.

⁸ Rix yixbe-kela' yixbe-kela' ri niben richin nikanoj iya', jak'a man xiwil ta k'iy ya' richin xik'o ri chaqi'j ichi'. Man rik'in ri' man xtzolej ta pe ik'u'x wik'in. Yin Jehová ri yibin.

⁹ Xinya' nimalej taq kaq'iq' pa ruwi' ri itiko'n richin xechaqi'j-qa. Xinteq k'a pe yabil richin nik'is ri i-uva y ri itiko'n ri ek'o pa qejoj. Chuqa' ri sak' xekitej ri iwíkix y ri olivo. Man rik'in ri' man xtzolej ta pe ik'u'x wik'in. Yin Jehová ri yibin.

¹⁰ Xinteq-pe nimalej taq yabil pan iwi' achi'el ri xinya' pa kiwi' ri aj-Egipto, Xinben chi ri alaboni' xeken kan chupan ri labal. Chuqa' ri e etzelanel iwichin xkimej kan ri ikiej. Xinben chi xiseq kichuwil ri kaminaqi' ri chiri' ri akuchi ixk'o-wi-qa. Man rik'in ri' man xtzolej ta pe ik'u'x wik'in. Yin Jehová ri yibin.

¹¹ Xinya' jun ruk'ayewal pan iwi' achi'el xinben kik'in ri aj-Sodoma y ri aj-Gomorra. Rix kan ix achi'el jun si' k'atineq rutza'n ri elesan-el pa q'aq'. Man rik'in ri' man xtzolej ta pe ik'u'x wik'in. Yin Jehová ri yibin.

¹² Rix israelita kan kere' k'a chuqa' ri xtinbenbana' iwik'in. Roma ri' rix k'o chi nichojmirisaj ri ik'aslen roma chi'iwonojel rix k'o chi xkixbepa'e chinuwech yin.

¹³ Ja yin ri xibanon ri juyu'. Yin ri yiya'on-pe ri kaq'iq'. Chuqa' ja yin ri yiq'alajirisan ri nuch'obonik chiwe rix. Ja yin ri yijalo ri paq'ij rik'in ri chaq'a'. Chuqa' ja yin ri yiq'ax pa kiwi' ri nimalej taq juyu'. Y ri nubi' ja ri Jehová ri Dios ri k'o ronojel uchuq'a' wik'in, xcha'.