Am 3 - Kaqchiquel Bible

Ri rusamaj jun q'alajirisey ruch'abel ri Dios

¹ Rix winaqi' israelita tiwak'axaj ri xtinbenbij chiwe: Ri ojer kan xenkol-pe pan Egipto ri iwati't-imama'.

² Kan xaxe rix ri xixincha' chikikojol konojel ruwach'ulew richin xixok wichin. Roma ri' xkixinpixabaj roma ri imak.

³ Jun k'ulaj winaqi' man yetikir ta yebiyaj junan wi man junan ta kiwech.

⁴ Ri koj ri k'o pa k'echelaj man niwuyin ta wi man rukamisan ta ri achike nutej. Ri koj ri k'o pa rusok man niq'ajan ta wi maneq jun chikop ri xuchop.

⁵ Jun ti aj-xik' chikop man nitzaq ta wi man jun pikbel k'o. Jun pikbel man chaq k'ate' ta nitz'ape' wi man jun chikop qajineq chupan.

⁶ Wi ri trompeta nixupux pa tinamit retal richin labal, konojel ri winaqi' kan nisach kik'u'x. Wi k'o jun nik'uluwachitej chupan ri tinamit, kan ja yin Jehová ri yiya'on q'ij chi keri' nibanatej.

⁷ Toq k'o ninwajo' ninben, ronojel mul ninq'alajirisaj chike ri e q'alajirisey nuch'abel.

⁸ Toq ri koj niwuyin, konojel ri winaqi' nikixibij-ki'. Y toq yin yich'on, ri q'alajirisey nuch'abel k'o chi nubij ri xinbij chire.

Toq xk'is ri ruwach'ulew Samaria

⁹ Tiya' rutzijol chike ri winaqi' ri ek'o pa jay richin tobel chiri' pa tinamit Asdod. Tiwak'axaj ri rutzijol rix ri ixk'o pa jay richin tobel chiri' pan Egipto. Timolo-iwi' pa taq juyu' richin Samaria richin titz'eta' ri wululen ri k'o chiri', y titzu' ri kamik ri nibanatej.

¹⁰ Rije' man ketaman ta yek'ase' choj. Kan xebeyomer-q'anej roma ye'eleq' y yekamisan.

¹¹ Jak'a yin Jehová k'iytisanel richin ronojel kere' ninbij: Ri e etzelanel iwichin xtikich'ek ri iruwach'ulew; xtikiwulaj ri jay richin tobel, y xtikik'uaj-el ri beyomel ri k'o chupan ri iwachoch.

¹² Yin Jehová kere' ninbij: Kan xaxe ok juba' winaqi' aj-Samaria ri xkekolotej kan. Achi'el jun koj toq nuchop jun karne'l y ri yuq'unel xaxe chik juba' ruxikin o ka'i' taq baq richin ri raqen ri nitikir nukol kan. Keri' chuqa' ri winaqi' aj-Samaria. Ri kibeyomel man xkeruto' ta.

Ri porobel ri ek'o pa Betel xkewulex

¹³ Yin Jehová k'iytisanel richin ronojel kere' ninbij: Ninwajo' k'a chi ri winaqi' tikak'axaj ri itzel taq kibanobal ri israelita. Ninwajo' k'a chi tikitzijoj ronojel ri xkiben.

¹⁴ Toq xtinya' rutojbalil-mak pa kiwi' ri israelita, kan xtinwulaj ri porobel ri ek'o pa Betel. Ri achi'el taq uk'a' ri ek'o pa taq ruxikin ri porobel xa xkepax; y xketzaq pan ulew.

¹⁵ Xtinwulaj ri jay richin saq'ij y richin job. Xkenk'is chuqa' ri jay ri e wiqon rik'in rey tix. Y xkenwulaj ri jebelej taq jay. Yin Jehová ri yibin.