Am 2 - Kaqchiquel Bible

Ri rutzijol pa ruwi' ri ruwach'ulew Moab

¹ Kere' nubij ri Jehová pa kiwi' ri aj-Moab: Ri kimak kan xik'o yan ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije' kan xkiporoj ri rubaqil ri rey richin Edom. Kan xkiben chi xok chaj ri rubaqil.

² Roma ri' xtinya' ruq'aq'al ri ruwach'ulew Moab y ri q'aq' ri' xtuk'is ri jay richin tobel ri k'o pa tinamit Quiriot. Ri e etzelanel kichin kan xkepe k'a chikij rik'in raqoj-chi'ij. Toq xtixupux ri trompeta jari' toq konojel aj-Moab xkeken.

³ Xtinkamisaj k'a ri ki-rey. Junan rik'in rija' xkeken ri e aj-raqen. Yin Jehová ri yibin.

Ri rutzijol pa ruwi' ri ruwach'ulew Judá

⁴ Kere' nubij ri Jehová pa kiwi' ri aj-Judá: Ri kimak kan xik'o yan chik ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije' kan xkixowaj ri nutijonik. Kan man xkitaqej ta ri pixa' ri xinya' chike. Xa xbe kik'u'x chikij ch'aqa' chik dios; Xekisamajij ri dios kichin ri kite-kitata'.

⁵ Roma ri' xtinya' ruq'aq'al ri ruwach'ulew Judá. y ri q'aq' ri', xtuk'is ri jay richin tobel ri ek'o pa Jerusalem.

Ri rutzijol pa ruwi' ri ruwach'ulew Israel

⁶ Kere' nubij ri Jehová pa kiwi' ri aj-Israel: Ri kimak kan xik'o yan ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije' kan xekik'ayij ri winaqi' ri xa maneq kimak. Xekijel ri winaqi' ri man jun k'o kik'in rik'in juk'ulaj xajab.

⁷ Xekitz'ila' y xkiqasaj kiq'ij ri winaqi' ri man jun k'o kik'in. Y kan man xkiben ta ruchojmilal pa kiwi' ri winaqi' ri man jun kiq'ij. Ri tata'aj y ri k'ajolaxel, xa jun ixoq nikikanoj richin yek'oje' rik'in chi e ka'i'. Rik'in re' nikiben chuwe yin chi maneq rejqalen ri loq'olej nubi'.

⁸ Richin qajbel ri kiméro xkik'ul tzieq chuwi-kiq'a' ri kiwinaq. Y kikusan k'a ri tzieq ri' yekotz'e' chunaqaj ri porobel. Yekiloq' jebelej taq vino rik'in ri méro ri puaqin chike. Ri vino ri' nikiqum pa wachoch.

⁹ Ri amorreo kan janila e nima'q kipalen; kan e nima'q achi'el ri tiox-che'. Rije' kan janila kuchuq'a'; kan e kow achi'el ri tuq. Man rik'in ri' yin xenwelesaj-el pa kiruwach'ulew. Kan xenk'is k'a jumul achi'el nik'is jun che'; ri nitiker-pe pa rutum y k'a pa ruxe-qa.

¹⁰ Jak'a ri kati't-kimama' ri israelita xenwelesaj-pe pan Egipto. Y kawineq k'a juna' xenk'uaj pa tz'iran ruwach'ulew. Yin xinben ronojel re' richin xinya' ri kiruwach'ulew kan ri amorreo chike.

¹¹ Y chikikojol rije' xenya' jujun q'alajirisey nuch'abel; xenteq chuqa' jujun achi'a' ri e jachon chuwe yin richin yinkisamajij. Ri israelita ri' kan ketaman jebel re'. Yin Jehová ri yibin.

¹² Jak'a ri winaqi' ri' xa xkiben chike re achi'a' re' richin man xkinimaj ta nutzij; y xkiben chike richin xkiqum vino. Y chuqa' xkibij chike ri e q'alajirisey nuch'abel chi man jun chik tikiq'alajirisaj.

¹³ Roma ri' yin kan xkenpitz'itz'ej re wakami; achi'el niqitz'itz' jun carretón toq janila nojineq chi trigo.

¹⁴ Stape' janila ye'anin man xkekolotej ta kan chuwech ri ruk'ayewal. Ri k'o janila ruchuq'a' xa man xtik'oje' ta chik uchuq'a' rik'in. Y ri más utz chikikojol ri aj-labal man xtitikir ta xtukol-ri'.

¹⁵ Ri aj-ch'ab man xtikoch'on ta; ri achin ri janila nanin man xtitikir ta xtukol-el-ri'; y ri achi'a' ri yech'oke' chirij kiej man xketikir ta xke'animej.

¹⁶ Chupan ri q'ij ri' ri achi'a' ri maneq xibinri'il chikiwech xa xke'animej; xtikiya' k'a kan ri kikamisabal richin xketikir xke'animej-el. Yin Jehová ri yibin.