2 Timoteo 4 - Kaqchiquel Bible

¹ Chuwech ri Dios y ri ajaw Jesucristo ri xtipe chik jun bey richin xtok rey y xtuq'et-tzij pa kiwi' ri e k'es y ri e kaminaqi' chik el nink'utuj utzil chawe,

² chi jantape' tatzijoj ri ruch'abel ri Dios, kan tatija' aq'ij natzijoj stape' pa ruq'ijul o man pa ruq'ijul ta. Tabij chike ri winaqi' chi titzolej-pe kik'u'x, ke'apixabaj y ke'atijoj rik'in koch'onik.

³ Roma kan xtoqaqa ri q'ij toq ri winaqi' xa man chik xtikikoch' ta xtikak'axaj ri utzilej taq tijonik. Xa xtikiben ri kirayibel rije', y xkekikanola' k'a achike ri yetijon kichin chire ri tijonik ri yekirayij rije'.

⁴ Xa man chik xtikak'axaj ta ri ruch'abel ri Dios, richin chi yekak'axaj tijonik ri xa choj e kitzijon kan ri kati't-kimama'.

⁵ Jak'a rat tach'obo' jebel ronojel ri naben. Takoch'o' ri tijoj-poqonal ri nipe chawij. Man katane' chutzijoxik ri utzilej ch'abel richin kolotajik. Tabana' ronojel ri samaj ri ya'on chawe roma ri Dios.

⁶ Roma yin xa kan xaxe chik woyoben ri q'ij chi yikamisex; ri q'ij richin yibe y ninya' kan re ruwach'ulew, xa naqaj chik k'o-wi.

⁷ Yin kan xich'akon yan chirij ronojel, xink'is yan rubanik ri k'o chi ninben y kan jantape' nuchajin-pe ri nukuqubabel-k'u'x.

⁸ Wakami xaxe chik k'a woyoben jun sipanik ri xtink'ul roma nuk'uan jun utzilej k'aslen. Y ri' kan ja ri Dios ri utzilej q'atoy-tzij ri xtiya'on chuwe chupan ri q'ij toq xtipe chik jun bey. Y man xaxe ta chuwe yin xtuya-wi ri sipanik ri', xa kan xtuya' chuqa' chike konojel ri kan rik'in ronojel kánima koyoben ri q'ij toq xtipe chik jun bey rija'.

Ri rurayibel ri Pablo

⁹ Rat Timoteo, tatija' aq'ij richin yape wik'in chi'anin chinutz'etik.

¹⁰ Roma ri Demas xa xirumalij kan y xbe pa tinamit Tesalónica roma xa xbe ránima chirij ri nusuj re ruwach'ulew. Ri Crescente beneq ri pa Galacia. Y ri Tito beneq pa ruwach'ulew Dalmacia.

¹¹ Re wakami xa kan xaxe ri Lucas ri k'o kan wik'in. Roma ri' tak'ama' k'a pe ri Marcos, roma rija' nik'atzin chuwe richin yiruto' chupan ri samaj.

¹² Ri Tíquico xinteq-el pa tinamit Éfeso.

¹³ Toq xkape, tak'ama' pe ri nuq'u' ri xinya' kan rik'in ri Carpo pa tinamit Tróade. Y chuqa' ke'ak'ama-pe ri boton wuj, y más ninwajo' chi nak'en-pe ri e banon rik'in rutz'umal tzuntzun.

¹⁴ Ri Alejandro ri samajiy-ch'ich', k'iy k'a itzel ri rubanon chuwe. Ri Dios kan xtuya-wi k'a ri rutojbalil chire, kan achi'el ri rubanobal.

¹⁵ Roma ri' rat kan tachajij awi' jebel chuwech, roma rija' janila nretzelaj ri ruch'abel ri Dios ri niqatzijoj roj.

¹⁶ Ri pa nabey toq xinuk'uex chuwech ri q'atoy-tzij, man jun xto'on wichin. Jak'a man ninwajo' ta chi ri Dios xtuya' ta ruk'exel chike ri xa man xinkito' ta y xinkiya' kan nuyon.

¹⁷ Ri Dios xa kan xiruto-wi yin. Xuya' wuchuq'a' richin xintzijoj ri ruch'abel ri Dios chike ri winaqi' ri man e judío ta. Y keri' xikolotej-pe chuwech ri kamik.

¹⁸ Y yin wetaman chi ri Dios xtikolon wichin chupan ronojel etzelal. Chuqa' wetaman chi xkiruchajij richin keri' xkinok chupan ri ruq'atbel-tzij chila' chikaj. Rija' kan xtuk'ul ta ruq'ij-ruk'ojlen richin tibe-q'ij tibe-seq. Kan keri' ta k'a.

Ri ruk'isibel taq ch'abel

¹⁹ Taya' rutzil-kiwech ri Prisca y ri Áquila, y chuqa' konojel ri ek'o pa rachoch ri Onesíforo.

²⁰ Ri Erasto xk'oje' kan pa tinamit Corinto, y ri Trófimo xinya' kan pa tinamit Mileto roma yawa'.

²¹ Y rat Timoteo, tatija' aq'ij yape wik'in rokik man jani toqaqa ri q'ij richin tew. Ri Eubulo nuteq-el rutzil-awech, chuqa' ri Pudente, ri Lino, ri Claudia, y konojel ri qach'alal ri ek'o wawe'.

²² Ri ajaw Jesucristo xtik'oje' pan awánima rat. Y chi'iwonojel ri ixk'o chiri' xtik'oje' ta k'a ri rutzil ri Dios iwik'in. Kan keri' ta k'a.