2 Tesalonicenses 2 - Kaqchiquel Bible

Ri itzel achin

¹ Qach'alal, wakami niqajo' yojch'on pa ruwi' ri q'ij toq xtipe chik ri qajaw Jesucristo richin niqak'ul qi' rik'in.

² Roma qak'axan chi xtzijox chiwe chi ri q'ij richin nipe ri ajaw xa xq'ax yan. Jak'a man tijalatej ri ich'obonik y man tisach ik'u'x, stape' xya'ox rutzijol chiwe roma jun ri nubij chi q'alajirisey ruch'abel ri Dios, o chupan jun wuj ri ik'ulun ri pa qabi' roj k'o-wi-el.

³ Man k'a kixq'olotej, roma nabey chuwech richin nipe ri Jesucristo, janila e k'iy ri xkeya'on kan richin ri Dios, chuqa' xtipe ri itzel achin. Ri kan rubin chik ri Dios chi kan richin chik ri tojbel-mak.

⁴ Rija' xtiyakatej y xtupaba' ri' chuwech ronojel ri nibix dios chire, y ri niya'ox ruq'ij. Man xaxe ta ri' roma xa kan xtibetz'uye' chupan ri rachoch ri Dios, y xtubij chi ja rija' ri Dios.*f2*

⁵ ¿Kan man noqaqa ta k'a chi'ik'u'x chi xinbij ronojel re' chiwe toq xik'oje' iwik'in?

⁶ Rix kan iwetaman k'a ri achike q'atayon richin man jani tiq'alajin-pe. Jak'a kan xtapon wi ri q'ij chi xtibek'ulun pe ri itzel achin ri'.

⁷ Qitzij wi chi k'iy chik etzelal najin wakami. Jak'a kan k'a k'o na ri jun ri q'atayon richin. Jak'a toq ri jun ri q'atayon richin elesan chik el,

⁸ jari' toq xtibek'ulun-pe ri itzel achin ri', jak'a ri ajaw Jesús xa xtuxupuj-el richin xtukamisaj, toq xtipe chik jun bey rik'in ri rusaqil ri ruk'ojlemal.

⁹ Jak'a toq xtibek'ulun-pe re itzel achin re', kan k'o-wi ri ruchuq'a' ri Satanás rik'in, xkerubanala' k'a k'iy meyel taq banobel y retal ri xa man e qitzij ta.

¹⁰ Y roma ri' e k'iy winaqi' ri kan xkeq'olotej pa ruq'a', roma man xkajo' ta ri qitzij tijonik richin xekolotej ta chupan ri kimak.

¹¹ Roma ri' ri Dios nuya' q'ij chi yeq'olotej y chi nikinimaj ri man qitzij ta.

¹² Richin keri' xtiqaqa ruk'ayewal pa kiwi', roma más xqa' chikiwech ri itzel banobel ke chuwech xkikuquba' ta kik'u'x rik'in ri qitzij.

Ri aj-Tesalónica xecha'ox richin xekolotej

¹³ Jak'a roj beneq ruwech k'o chi yojmatioxin chire ri Dios iwoma rix qach'alal, ri janila yixajowex roma ri ajaw, roma kan pa rutikeribel-pe jari' toq xixrucha' yan richin yixkolotej chupan ri imak. Y xixkolotej roma xikuquba' ik'u'x rik'in ri qitzij, y roma ri rusamaj ri Loq'olej Espíritu.

¹⁴ Ri Dios xixroyoj richin xixkolotej roma ri utzilej ch'abel richin kolotajik ri xqaya' chiwe roj richin nik'oje' iq'ij, achi'el ri ruq'ij-ruk'ojlen ri qajaw Jesucristo.

¹⁵ Roma ri' qach'alal, kan kow k'a kixk'oje' chupan ri tijonik ri xqaya' chiwe toq xojk'oje' iwik'in y ri niqabij chiwe chupan re wuj re'.

¹⁶ Ri qakolonel Jesucristo y ri tata'ixel ri janila xojrajo' y xuya' kuqubabel-k'u'x chiqe richin qoyoben ri q'ij toq xqojbe chila' chikaj roma ri rutzil,

¹⁷ xtukuquba' ta ik'u'x y xtuya' ta iwuchuq'a' richin ruyon ta ri utz xtiben y xtibij.