2 Sam 9 - Kaqchiquel Bible

Ri rutzil ri David pa ruwi' ri Mefi-bóset

¹ K'o k'a jun q'ij ri David xuk'utuj chi wi k'o ta jun chike ri e rijatzul ri rey Saúl ri k'a k'es kan. Keri' xubij roma nrajo' nuben utzil chire roma ri ajowabel ri xk'oje' rik'in ri Jonatán toq xk'ase'.

² Y k'o k'a jun achin rusamajel kan ri rey Saúl rubini'an Sibá. Y rija' xoyox richin tapon rik'in ri rey David. Y ri David xuk'utuj chire wi ja rija' ri Sibá. Y ri Sibá xubij chi ja rija'.

³ Ri David xuk'utuj chire wi rija' retaman chi wi k'a k'o ta kan jun chire ri rijatzul kan ri Saúl, ri k'a k'es na, richin xtujoyowaj ruwech pa rubi' ri Dios. Y ri Sibá xubij chi k'a k'es kan jun ruk'ajol ri Jonatán. Y ri ruk'ajol ri' e xotoxik chi ka'i' raqen.

⁴ K'ari' ri David xuk'utuj akuchi k'o-wi ri achin ri'. Y ri Sibá xubij chi k'o pa rachoch ri Maquir ruk'ajol ri Amiel chiri' pa tinamit Lodebar.

⁵ K'ari' ri rey David xuteq ruk'amik ri ruk'ajol kan ri Saúl ri k'o pa rachoch ri Maquir.

⁶ Y xpe k'a ri Mefi-bóset ruk'ajol kan ri Jonatán y rumam kan ri Saúl. Y toq xapon rik'in ri David, xxuke-qa chuwech y xuya' ruq'ij. Y ri David xuk'utuj chi wi ja rija' ri Mefi-bóset. Y rija' xubij chi kan ja wi rija'.

⁷ Y ri David xubij chire: Man naxibij-awi', roma yin kan xtinjoyowaj awech roma ri ajowabel ri xk'oje' chiqakojol rik'in ri atata' Jonatán. Y roma ri' xtintzolij chik k'a chawe ri ulew ri richin kan ri amama'. Y chuqa' kan jantape' xkawa' wik'in yin, xcha'.

⁸ Y ri Mefi-bóset xulukuba' chik qa ri' y xubij: ¿In achike ta k'a yin richin najoyowaj nuwech ri xa in achi'el jun kamineq tz'i'?, xcha'.

⁹ K'ari' ri rey xroyoj ri Sibá ri rusamajel kan ri Saúl y xubij chire: Ronojel ri richin kan ri awajaw Saúl y ri kichin kan ri aj pa rachoch, xintzolij kan chire ri Mefi-bóset.

¹⁰ Jak'a rat, ri awalk'ual y ri asamajela' ri xkixsamajin ronojel re ulew re', y xtayek ronojel ri xtuwachij, richin chi ri e aj pa rachoch rija' k'o kiway. Jak'a rija' xtiwa' ronojel mul wik'in yin, xcha'. Y ri Sibá ek'o e wolajuj ralk'ual y e juwineq rusamajela'.

¹¹ Y ri Sibá xubij chire ri David chi kan xtibanatej ronojel achi'el ri xubij. Y ri Mefi-bóset kan xwa' k'a rik'in ri David achi'el jun chike ri ralk'ual.

¹² Y ri Mefi-bóset k'o k'a jun ti ruk'ajol ri rubini'an Micaías. Keri' konojel ri e aj pa rachoch ri Sibá xe'ok samajela' richin ri Mefi-bóset.

¹³ Y ri Mefi-bóset chiri' k'a pa Jerusalem xk'oje-wi roma ronojel mul niwa' rik'in ri rey. Y re achin re' chi ka'i' raqen e xotoxik y man nitikir ta nibiyin.