2 Sam 8 - Kaqchiquel Bible

¹ Chirij k'a ronojel re', ri David xeruch'ek ri aj-Filistea. Kan xuqasaj kiq'ij jumul, y xumej kan ri q'atbel-tzij pa kiq'a'.

² Y xeruch'ek chuqa' ri aj-Moab, y xuben chike ri aj-labal chi xejupe-qa pan ulew pa jun cholaj. K'ari' xuben chi ri ruwinaq xkirik' jun kolo' pa kiwi', y xretaj jun tzobaj ri aj-Moab. Y ri achi'a' ri' xekolotej-el. K'ari' xretaj chik ka'i' mul, y janipe' chike ri achi'a' ri e jupul chuxe' ri kolo', jari' ri xekamisex. Keri' xuben chike k'a xeruk'is na konojel ri e jupul chiri'. Y roma ri' ri aj-Moab xe'ok rusamajela' ri David, y k'o chi xkitoj chire ri k'atzinel.

³ Keri' chuqa' ri David xbe chupan ri ruwach'ulew ri k'o kela' chuchi' ri raqen-ya' Éufrates richin nuk'en chik kan ri ruwach'ulew ri'. Y chiri' xuch'ek ri rey richin ri tinamit Sobá, ri rubini'an Hadad-ézer ruk'ajol ri Rehob.

⁴ Y ri David xeruchop-pe chiri' e 1,700 achi'a' yech'oke' chirij kiej,*f6* y e 20,000 aj-labal ri yebe chikaqen. Y keri' chuqa' xekitzak'ila' kan ri paten-iboch' chire ri kaqen ri kiej ri ye'uk'uan carruaje richin oyowal, y xaxe chik k'a e wok'al ri man jun xuben chike.

⁵ Jak'a ri aj-labal aj-Damasco xe'apon pa Sobá richin yekito' ri Hadad-ézer. Y ri David xerukamisaj-el e 22,000 chike ri achi'a' ri'.

⁶ Chirij ri' ri David xeruyala' tzobaj chajinela' chupan chijun ri ruwach'ulew Siria. Y ri aj-Siria xe'ok rusamajela' ri David, y kan k'o chi xkitoj chire ri k'atzinel. Keri' ri Jehová xuya' k'a ch'akonik chire ri David xabakuchi xbe-wi.

⁷ Ri David xumej-el chuwi-kiq'a' ri aj-raqen pa kiwi' ri aj-labal aj-Siria ri tobel e banon rik'in q'anapueq. Ronojel re' xuk'uaj-el pa Jerusalem.

⁸ Keri' chuqa' xeruk'uaj-el ri q'enq'oj-pueq ri ek'o chupan ri tinamit Bétah y Berotai ri e richin ri rey Hadad-ézer.

⁹ Y k'o k'a jun achin rubini'an Toi, rey richin ri tinamit Hamat. Rija' toq xrak'axaj chi ri David xeruch'ek ri aj-labal ri e richin ri rey Hadad-ézer,

¹⁰ jari' toq xuteq-el ri ruk'ajol rubini'an Joram rik'in ri rey David, richin xberuq'ejela'. Y xberubij utzilej taq ch'abel chire roma xtikir xuch'ek ri Hadad-ézer, roma ri Toi etzelanel chuqa' richin ri Hadad-ézer. Ri Joram ruk'uan k'a el jalajoj ruwech samajibel ri banon rik'in saqipueq, q'anapueq y ri banon rik'in q'enq'oj-pueq richin nusipaj chire ri David.

¹¹ Y ronojel re beyomel re' ri David kan xujech pa ruq'a' ri Jehová, achi'el ri rubanon-pe rik'in ri beyomel ri e ruk'amon-pe chuwi-kiq'a' ri tzobaj winaqi' richin ri ruwach'ulew:

¹² Ri kichin ri aj-Edom, ri aj-Moab, ri aj-Amón, ri aj-Filistea, y ri rijatzul kan ri Amalec. Chuqa' xusuj chire ri Jehová ronojel ri xumej kan ri chuwi-ruq'a' ri Hadad-ézer, ruk'ajol ri Rehob rey richin ri tinamit Sobá.

¹³ Ri David kan janila k'a xel rutzijol rik'in ri xerubanala' y roma chuqa' kan xeruch'ek ri aj-Edom, y xerukamisaj e 18,000 aj-labal chiri' pa taq'aj ri nibix atz'an chire.

¹⁴ Xeri' xeruyala' tzobaj chajinela' pa ruwach'ulew Edom. Y konojel ri aj-Edom xek'oje' chuxe' ri q'atbel-tzij richin ri David. Keri' ri Jehová kan xuya' ch'akonik chire ri David xabakuchi xbe-wi.

Ri nima'q taq achi'a' chupan ri q'atbel-tzij richin ri David

¹⁵ Ri David xq'aton-tzij pa ruwi' chijun ruwach'ulew Israel. Y kan ronojel k'a utz y pa ruchojmilal ri xeruben rik'in ri tinamit.

¹⁶ Ri Joab ri ral ri Seruiá, ja rija' ri aj-raqen pa kiwi' ri aj-labal. Ri Josafat ruk'ajol ri Ahilud, ja rija' ri tz'ibanel richin ri nibanatej ronojel q'ij.

¹⁷ Ri Sadoc ruk'ajol ri Ahitub y ri Ahimélec ruk'ajol ri Abiatar, ja rije' ri e sacerdote. Ri Seraías, ja rija' ri aj-tz'ib richin ronojel.

¹⁸ Ri Benaías ruk'ajol ri Joiadá, ja rija' ri k'o pa kiwi' ri achi'a' ri yechajin ri David. Y ri e ralk'ual ri David, chuqa' e sacerdote.