2 Sam 7 - Kaqchiquel Bible

¹ Kere' k'a xbanatej toq ri rey David k'o chik pa rachoch, toq ri Jehová xuya' yan uxlanenri'il chire chikiwech ri e etzelanel richin ri ek'o chunaqaj.

² Ri David xch'on k'a rik'in ri q'alajirisey ruch'abel ri Dios ri rubini'an Natán, y xubij: Yin wakami ink'o chupan jun jay banon rik'in tiox-che', jak'a ri káxa richin ri rujikibel-tzij ri Dios xa chupan jun jay ri banon rik'in tzieq k'o-wi kan, xcha'.

³ Y ri Natán xubij chire chi kan utz nuben ri nrajo' rija', roma kan ja ri Jehová ri k'o rik'in.

⁴ Jak'a chupan ri aq'a' ri', ri Jehová xch'on rik'in ri Natán y xubij chire:

⁵ Kabiyin rik'in ri nusamajel David, y taya' re jun rutzijol re' chire: Man ja ta rat ri xkabepaban jun wachoch ri akuchi yik'oje-wi.

⁶ Kan qitzij na wi chi yin xa kan xaxe chupan jun jay ri banon rik'in tzieq ri ink'o-wi-pe; re' kan ja toq xenwelesaj-pe ri awati't-amama' pan Egipto k'a re wakami.

⁷ Y janipe' ink'o-pe kik'in ri awinaq israelita, xenya' tata'al pa kiwi' richin xeyuq'un kichin. Y kan man jun bey xink'utuj ta chike chi xkipaba' ta jun wachoch ri banon rik'in tiox-che'.

⁸ Wakami, yin Jehová k'iytisanel richin ronojel, ninbij k'a chawe rat David chi ja yin ri xinelesan-pe awichin chikikojol ri karne'l richin xatok tata'al pa ruwi' ri nutinamit Israel.

⁹ Y kan ink'o k'a pe awik'in xabakuchi at beneq-wi, y kan e nuch'akon konojel ri etzelanel awichin. Wakami k'a, kan xtinnimirisaj ri abi' achi'el ri kibi' ri e nima'q taq achi'a' ri ek'o wawe' chuwech re ruwach'ulew.

¹⁰ Y pa ruwi' ri' yin xinya' jun ruwach'ulew chiwe rix israelita, ri ix nutinamit. Wawe' k'a xkixk'oje-wi richin q'asen, y man jun chik xtinaqo iwichin. Ri itzel taq winaqi' man chik xkixkiya' ta pa tijoj-poqonal achi'el ri kibanon-pe chike ri iwati't-imama',

¹¹ toq xenya' ri to'onela' pa kiwi'. Jak'a re wakami xtinya' uxlanen chawe chikiwech konojel ri e etzelanel awichin. Keri' chuqa' yin ninjikiba-nutzij chi ri awijatzul man xtichup ta qa.

¹² Y toq xkaken, yin xtinkusaj kan pan ak'exel jun chike ri ak'ajol. Y kan xtinjikiba' ri ruq'atbal-tzij rija'.

¹³ Kan k'a ja rija' ri xtipaban-q'anej jun wachoch. Y pa ruq'a' rija' xtinjikiba-wi kan jumul ri q'atbel-tzij.

¹⁴ Yin xkinok achi'el jun tata'aj chire rija', y rija' xtok achi'el jun nuk'ajol. Y toq rija' xtimakun chinuwech, yin kan xtinchojmirisaj k'a chi xik'a'y, achi'el nuben jun tata'aj rik'in ri ruk'ajol.

¹⁵ Jak'a ri nujoyowanik man xtinwelesaj ta pa ruwi' rija', achi'el xinben rik'in ri Saúl, ri xinwelesaj richin chi xatinya' kan rat pa ruk'exel.

¹⁶ Ri awijatzul y ri aq'atbal-tzij kan xtijike' k'a richin q'asen, xcha' ri Dios.

¹⁷ Y ronojel re' xuq'alajirisaj ri Natán chire ri David.

¹⁸ K'ari' ri rey David xok-apo chupan ri jay ri banon rik'in tzieq, y xbek'oje' chuwech ri Jehová richin nich'on rik'in. Y xubij: Nimalej Jehová, ¿in achike ta k'a yin y ri wijatzul richin chi oj ato'on-pe k'a re wawe'?

¹⁹ Y re' xa kan ti juba' ok chawech rat Nimalej Jehová, roma stape' yin xa in jun asamajel, man rik'in ri' rat kan xach'on yan apo chirij ri wijatzul ri chinuwech-apo. ¿Kan kere' kami naben kik'in konojel winaqi', rat nimalej Jehová?

²⁰ ¿Achike chik ta k'a más xkitikir xtinbij chawe, nimalej Jehová, roma rat xa kan awetaman nuwech jebel, chi yin xa in jun relik asamajel?

²¹ Ronojel re' xaben y xaq'alajirisaj chinuwech, roma kan pan awánima xalex-wi-pe chi keri' ri nawajo' rat.

²² Roma ri', kan man jun chik más nim chawech rat nimalej Jehová. Y man jun bey k'a qak'axan chi k'o ta chik jun Dios achi'el rat.

²³ Chuqa' kan man jun chik k'o ri achi'el ta roj ri atinamit Israel, roma kan ja rat ri xakolon-pe kichin ri qati't-qamama' chiri' pan Egipto richin xojok atinamit. Chuqa' kan xaben chi xnimer aq'ij toq xe'aben ri nimalej taq banobel ri kan nak'en rukiy richin chi xe'awelesaj-el ri winaqi' aj wawe' junan kik'in ri ki-dios, chikiwech ri qati't-qamama' toq xe'oqaqa re wawe'.

²⁴ Roma rat kan xojajikiba' roj ri atinamit Israel richin xojok awichin richin jantape'. Y ja rat Jehová, ri xatok qa-Dios.

²⁵ Wakami k'a Jehová Dios, tabana' utzil tajikiba' jumul ri ach'abel ri xabij pa nuwi' yin ri asamajel, y pa ruwi' ri wijatzul,

²⁶ richin kan xtinimirisex ta ri abi' jumul, y ri winaqi' richin chijun ri ruwach'ulew xtiketamaj ta chi kan ja rat ri at Jehová k'iytisanel richin ronojel, ri at qa-Dios roj. Chuqa' kan xtiketamaj ta chi ri wijatzul kan xtik'oje' richin jantape' chawech rat.

²⁷ Jehová k'iytisanel richin ronojel, ri at qa-Dios roj; rat xaq'alajirisaj k'a chuwe chi kan xtapaba-q'anej ri wijatzul. Roma ri' kan xpe pa wánima richin yich'on awik'in.

²⁸ Wakami k'a Jehová Dios, ja rat ri at Dios, y ri ach'abel kan qitzij wi; y kan xasuj k'a re utzil re' chuwe yin ri asamajel.

²⁹ Tabana' utzil taya' urtisanik pa ruwi' ri wijatzul richin chi xtik'oje' jantape' chawech, roma kan ja rat Jehová k'iytisanel richin ronojel ri xabin. Y rik'in ri awurtisanik rat, ri wijatzul xtuk'ul urtisanik richin jantape', xcha'.