2 Sam 6 - Kaqchiquel Bible

¹ Chirij ri' ri David kan xerumol k'a konojel ri aj-labal ri más e utz, y ri kajlabal konojel e 30,000.

² Ri David e rachibilan konojel ri achi'a' ri', xebe k'a pa tinamit Baalá richin Judá, richin chi nibekik'ama' ri káxa richin ri rujikibel-tzij ri Dios. Ri káxa ri', pa ruwi' ri' ninatex rubi' ri Jehová ri k'o ronojel uchuq'a' pa ruq'a', ri k'o rutz'uyubal chikikojol ri querubín.

³ Ri káxa ri' k'o k'a kan pa rachoch ri achin rubini'an Abinadab, ri k'o-el chuwi-juyu'. Xkelesaj-pe chiri' y xkiya-el chupan jun k'ak'a' carruaje. Y ri achin ri' ek'o ka'i' ruk'ajol ri kibini'an Uzá y Ahió. Y ja rije' k'a ri e uk'uayon rubey ri carruaje.

⁴ Y toq xkelesaj-el ri káxa pa rachoch ri Abinadab, kan jak'a ri Ahió ri ruk'ajol ri xik'o-el chuwech ri káxa.

⁵ Ri David y ri ch'aqa' chik israelita yetzopilan k'a e beneq, yebixan k'a chuwech ri Jehová rik'in jalajoj ruwech q'ojom.

⁶ Jak'a toq xe'apon-apo chupan ri era richin Nacón, ri bóyix ri e uk'uayon ri carruaje, xa xejilijo'. Roma ri' ri Uza xurik'-apo ri ruq'a' richin xutemej-apo ri káxa richin man nitzaq.

⁷ Y ri Jehová xyakatej janila royowal chirij ri Uzá roma xuben chire ri káxa chi xa maneq rejqalen. Y roma ri' ri Dios xuben chi xken kan chiri', y xtzaq-qa pan ulew chuxikin ri káxa.

⁸ Jak'a ri David xyakatej janila royowal roma ri Jehová xukamisaj ri Uzá. Y roma ri' ri chiri' xubini'aj kan Peres-uzá.*f5*

⁹ Y chupan ri q'ij ri' ri David kan xuk'en rukiy ri Jehová, y xubij: Wakami más utz man nink'uaj ta ri káxa ri richin ri Jehová akuchi ink'o-wi yin, xcha'.

¹⁰ Roma ri' man xuk'en ta pe ri káxa chupan ri rutinamit rija'. Y xuch'ob chi más utz nibek'oje' kan pa rachoch ri jun achin rubini'an Obed-edom ri k'o pa tinamit Gat.

¹¹ Y chiri' k'a xk'oje-wi ri káxa oxi' ik' y ri Jehová kan janila urtisanik xuya' pa ruwi' ri Obed-edom y ri e aj pa rachoch.

¹² Y k'o k'a jun q'ij xapon rutzijol rik'in ri David, chi ri Jehová janila rurtisan ri Obed-edom y konojel ri ek'o rik'in, roma ri káxa k'o pa rachoch. Roma ri' xberelesaj-pe ri káxa chiri' rik'in janila kikoten, richin nuk'uaj chupan ri rutinamit.

¹³ Ri e uk'uayon ri káxa xepa'e' k'a waqi' mul chupan chijun ri bey richin chi ri David xusuj kamelabel chuwech ri Jehová. Xerusuj k'a jujun bóyix y jujun karne'l ri jebel e ti'oj.

¹⁴ Y rija' rukusan k'a el jun rutziaq ri banon rik'in lino. Y janila k'a kikoten k'o rik'in y roma ri' kan nitzopiyaj rik'in ronojel ruchuq'a' chuwech ri Jehová.

¹⁵ Ri David y konojel ri winaqi' israelita ri kik'uan ri káxa kan yesik'in k'a rik'in kikoten y nikixupula' k'a ri ki-trompeta.

¹⁶ Toq ri káxa ri' xapon pa Jerusalem, jari' toq ri Mical ri rixjayil nitzu'un-pe pa jun ventana. Ri Mical ri' rumi'al kan ri Saúl. Y toq xutz'et-pe chi ri David nitzopiyaj roma kikoten chuwech ri Jehová, jari' toq rija' kan xretzelaj k'a ri rachijil.

¹⁷ Ri David kan runaban k'a jun jay banon rik'in tzieq. Y chiri' xbekiya-wi kan ri káxa richin ri Jehová. Y k'ari' xusuj chikop richin niporox jumul y xusuj sipanik ri nuq'alajirisaj chi junan ruwech rik'in ri Jehová.

¹⁸ Toq ri David xk'achoj richin xusuj ri ka'i' sipanik ri', xerurtisaj ri ruwinaq pa rubi' ri Jehová ri k'iytisanel richin ronojel.

¹⁹ Y k'ari' xujech chike chikijujunal ri ek'o chiri' jun kaxlan-wey, juba' ti'ij y jun wey ri banon rik'in uva ri chaqirisan. Chirij ri' chikijujunal ri winaqi' xetzolej-el pa taq kachoch.

²⁰ Xeri' ri David xbe pa rachoch richin xberuya' urtisanik pa kiwi' konojel ri ek'o chiri'. Y jari' toq xok'ul k'a el roma ri Mical ri rixjayil, y xubij chire ri David: ¿Kan jebel ok ri xaben rat, rey richin Israel chi xach'anaba-awi' chikiwech ri ixoqi' aj-ik'a' kichin ri asamajela'? ¿Kan man xak'ix ta k'a, chi xa xaben achi'el xa ta at jun xabachike achin?, xcha'.

²¹ K'ari' ri David xubij chire: Kan qitzij na wi chi xitzopiyaj, jak'a kan chuwech ri Jehová, roma ja rija' xicha'on richin xinok tata'al richin ri tinamit. Rija' kan xirucha' richin xinok kan pa ruk'exel kan ri atata' y pa kik'exel kan ri axibal. Roma ri' wi yin ninwajo', kan k'a xkitzopiyaj na richin xtinya' ruq'ij ri Jehová.

²² Wakami kan más k'a xtinben ke chuwech ri xatz'et, y kan más k'a xtinqasaj nuq'ij achi'el ri nabij rat. Jak'a kan xtik'oje' k'a nuq'ij chikiwech ri ixoqi' aj-ik'a' ri achoq pa kiwi' xach'on-wi-qa rat, xcha'.

²³ Y ri Mical ri rumi'al kan ri Saúl kan man jun bey xk'oje' ta ral chijun ruk'aslen.