2 Sam 3 - Kaqchiquel Bible

¹ Jak'a ri labal chikikojol ri e ka'i' tzobaj ri' xa man xtane' ta qa, xa kan más k'a xnimer. Y ri David y ri ruwinaq más nik'oje-el kuchuq'a', jak'a ri e ruwinaq kan ri Saúl xa xemayamo-qa.

Ri ralk'ual ri David ri xe'alex pan Hebrón

² Ri David xe'alex k'a e waqi' ruk'ajol ri chiri' pan Hebrón. Ja kibi' re': Ri nabey rubini'an Amnón ral ri Ahinóam ri aj-Jezreel.

³ Ri ruka'n rubini'an Quilab, ral ri Abigail ri rixjayil kan ri Nabal aj-Carmel. Ri rox rubini'an Absalón, ral ri Maacá ri rumi'al ri Talmai, ri rey richin ri ruwach'ulew Guesur.

⁴ Ri rukaj rubini'an Adonías, ral ri Haguit. Ri ro' rubini'an Sefatías, ral ri Abital.

⁵ Ri ruwaq rubini'an Itream, ral ri Eglá. Jare' ri ralk'ual ri David ri xek'oje' ri chiri' pan Hebrón.

Ri Abner xjunamatej-ruwech rik'in ri David

⁶ Rokik najin ri labal chikikojol ri ka'i' tzobaj, ri Abner kan más k'a xk'oje-el ruchuq'a'.

⁷ Toq k'a k'es na ri Saúl, xk'oje' k'a jun ru-concubina*f3* rubini'an Rispá, rumi'al ri Aiá. Y jun q'ij ri Is-bóset xuk'utuj chire ri Abner ri achike roma xk'oje' rik'in ri ru-concubina kan ri ánima rutata'.

⁸ Roma ri' ri Abner xyakatej royowal, y xubij chire: Rat nach'ob chi yin xa in achi'el jun tz'i', jun ri xa xpiskolin chiwij, richin xq'ax kik'in ri aj-Judá. Man keri' ta, roma yin janila in utz nubanon rik'in ronojel ri richin kan ri atata', kik'in ri e rach'alal y ri e rachibil kan. Pa ruwi' ri' rat man at nujachon ta pa ruq'a' ri David. Y wakami naq'abaj-pe chuwij richin ximakun rik'in ri jun ixoq ri'.

⁹ Jak'a re wakami, yin kan ja ta k'a ri Jehová ri xtiya'on-pe ruk'ayewal pa nuwi' wi man xkiq'ax ta rik'in ri David, roma ri Jehová kan rik'in jikibel-tzij rusujun ri q'atbel-tzij pa ruq'a' rija'.

¹⁰ Wakami yin xa xtinq'axaj k'a ri q'atbel-tzij richin kan ri Saúl pa ruq'a' ri David richin xtok pa ruq'a' rija' ri q'atbel-tzij richin chijun ri ruwach'ulew Israel y ri Judá, ri nitiker-pe pa Dan y napon k'a pa Beerseba, xcha'

¹¹ Y ri Is-bóset kan man jun chik xtikir xubij chire ri Abner, roma kan janila nuxibij-ri' chuwech.

¹² K'ari' ri Abner xeruteq-el achi'a' uk'uey rutzijol k'a rik'in ri rey David, y xubij-el: Rat awetaman achoq pa ruq'a' k'o-wi chijun ri ruwach'ulew. Roma ri' tijunamatej k'a qawech, y yin xkatinto' richin konojel nuwinaq israelita xkeq'ax kan awik'in rat, xcha'.

¹³ Y ri David xubij-el chi kan utz xrak'axaj ri taqon-el rubixik chire, xaxe k'a xuchilabej-el chire ri Abner chi toq xtapon rik'in, k'o chi ruk'uan-el ri Mical ri rumi'al kan ri Saúl richin nitikir nibech'on rik'in ri David.

¹⁴ Chirij ri' ri David xeruteq chik el uk'uey rutzijol k'a rik'in ri Is-bóset, y xubij-el chi tutaqa-pe ri Mical ri rixjayil, roma jari' ri xuch'ek toq xerukamisaj ri e wok'al aj-Filistea.

¹⁵ K'ari' ri Is-bóset ek'o k'a xeruteq richin xbekik'ama-pe ri Mical chuwech ri rachijil ri rubini'an Paltiel ruk'ajol ri Lais.

¹⁶ Jak'a ri Paltiel kan xutzeqelibej-el ri rixjayil, y janila k'a noq' beneq xapon k'a pa tinamit Bahurim. Y ri Abner xubij chire chi titzolej kan chirachoch. Y ri Paltiel kan xtzolin kan.

¹⁷ K'ari' ri Abner xch'on kik'in ri aj-raqen richin ri ruwach'ulew Israel, y xubij chike: Rix kan iwajowan-pe chi ja ta ri David nok ta kan rey pa qawi'.

¹⁸ Wakami k'a, kan keri' xtibanatej, roma ri Jehová xch'on yan rik'in ri David y xubij chire chi k'a ja rija' xtikolon ri tinamit Israel pa kiq'a' ri aj-Filistea y pa kiq'a' konojel ri e etzelanel qichin, xcha' chike.

¹⁹ Chuqa' xch'on kik'in konojel ri winaqi' aj-Benjamín. Y k'ari' xbe pan Hebrón rik'in ri David richin xberubij chire ri achike nikich'ob ri benjamita y ri ch'aqa' chik israelita.

²⁰ Y ri Abner xapon k'a rik'in ri David chiri' pan Hebrón, y e rachibilan-el e juwineq achi'a'. Y ri David xuben k'a jun nimalej wa'in roma xapon ri Abner.

²¹ Chirij ri' ri Abner xubij chire ri David: Yin jare' xkiyakatej-el y xkibe richin xkenmol-pe awik'in konojel ri qawinaq israelita, richin nikijikiba' kitzij awik'in richin keri', xke'ok pan aq'a' y xkaq'aton-tzij pa kiwi' kan achi'el ri arayibel rat, xcha'. K'ari' ri David xujech-el ri Abner y rija' xtzolin-el rik'in uxlanibel-k'u'x.

Ri Joab xukamisaj ri Abner

²² Ri Abner k'a jun nima-ko'ol k'a tel-el rik'in ri David rik'in uxlanibel-k'u'x, y jari' toq ri Joab y ri aj-labal xetzolej-pe pan oyowal y kik'amon-pe ri k'o rejqalen ri xkimej-pe chuwi-kiq'a' ri etzelanel kichin.

²³ Y xtzijox k'a apo chire ri Joab chi ri Abner xapon rik'in ri David y chi ri David xuya-el q'ij richin chi xtzolin-el rik'in uxlanibel-k'u'x.

²⁴ K'ari' ri Joab xpe rik'in ri rey David y xubij chire: ¿Achike k'a re xaben-el rat? roma ri Abner xpe awik'in. ¿Y achike roma toq xaya' q'ij chire richin xtzolin na el?

²⁵ Man awetaman ta k'a chi ri Abner xpe awik'in xaxe richin yaruq'ol y richin yatorunachaj toq yatel y yatok, y richin nretamaj ronojel ri achike naben, xcha'.

²⁶ Y xaxe k'a xubij kan keri', ri Joab xel-pe rik'in ri rey, y xeruteq-el ri rusamajela' chirij ri Abner. Y xbekiq'i' k'a rik'in ri pozo richin ri Sira y xkiben chire chi xtzolin pan Hebrón. Y ri David man xunabej ta ri'.

²⁷ Y toq ri Abner xapon chik pan Hebrón, jari' toq ri Joab xuk'uaj-el chuchi' ri tinamit richin nitzijon rik'in pa ruyonil. Jari' toq xuchuq'ij chirupan. Y ri Abner xken kan chiri'. Y keri' ri Joab xuben ruk'exel chire roma xukamisaj ri Asael ri rach'alal.

²⁸ Jak'a toq ri David xunabej ri xuben ri Joab, xubij chi rija' y ri ruq'atbal-tzij kan maneq kimak chuwech ri Jehová, roma ri rukamik ri Abner.

²⁹ Y xubij chuqa': Ri Joab y ri e aj pa rachoch kan xtikejqalej k'a re mak re'. Kan jantape' ta k'a xtikiq'axaj yabil, sokotajik ri jantape' xtipujan, ruyabilal ri ch'akulaj, q'ajtajik, kamik rik'in espada o wayjal, xcha'.

³⁰ Keri' xubij ri David roma ri Joab y ri Abisai xkikamisaj ri Abner, stape' ri Abner xa pan oyowal xukamisaj ri Asael ri kach'alal, ri chiri' pa Gabaón.

³¹ Chirij ri' ri David xubij chire ri Joab y ri ruwinaq, chi richin nibekimuqu' kan ri Abner, rije' k'o chi nikiretz ri kitziaq chikij, tikikusaj tzieq richin bis, y ke'ik'o-el chuwech ri kamineq. Y ri rey David chirij k'a ri kamineq xbe-wi.

³² Keri' rumuqik ri Abner xbanatej pan Hebrón. Ri David kan janila xoq' chuchi' ri jul, y chijun tinamit xkoq'ej chuqa'.

³³ Y chiri' ri David xubixaj k'a re jun bix re': ¿Kan ruk'amon kami chi keri' rubanik ri rukamik ri Abner? Rija' xa xken k'a achi'el niken jun kamisanel.

³⁴ Stape' xa man ximon ta ri ruq'a-raqen, xken k'a pa kiq'a' ri e kamisanel, xcha'. Y konojel k'a ri winaqi' xe'oq' chik q'anej jun bey.

³⁵ Chirij re' ri winaqi' ri' xbekisuju' ruway ri David roma xa xqaq'ij yan. Jak'a ri David xuya' rutzij y xubij chi ri Dios kan xtuya' ta k'a ruk'ayewal pa ruwi' rija' wi k'o xtutej chupan ri q'ij ri'.

³⁶ Y konojel k'a ri ek'o-apo chiri' kan xqa' chikiwech ri xubij y ronojel ri xuben rija'.

³⁷ Keri' chupan ri q'ij ri', konojel ri winaqi' aj chiri' y ri ch'aqa' chik israelita xq'ax chikiwech chi man ja ta ri rey xbin chi tikamisex ri Abner.

³⁸ K'ari' ri David xch'on kik'in ri e aj-raqen ri ek'o chiri' y xubij chike: Rix xitz'et chi wakami xken jun chike ri tata'al, jun achin ri nim ruq'ij chupan re qaruwach'ulew Israel.

³⁹ Jak'a yin stape' qasan aceite pa nuwi' richin xinok rey, wakami ninna' chi xa man jun wuchuq'a' k'o, roma ri Joab y ri Abisai xa kan ik'owineq chik ruwi' kuchuq'a' chinuwech yin. Y roma ri' ninbij chi kan ja ta k'a ri Jehová xtiya'on rutojbalil chike roma ri itzel ri xkiben, xcha'.