2 Sam 23 - Kaqchiquel Bible

Ri ruk'isibel taq ruch'abel ri David

¹ Jare' ri ruk'isibel taq ch'abel ri xubij ri David ri ruk'ajol kan ri Isaí: Ri qa-Dios y ri ru-Dios ri Jacob xirucha' richin xinok rey. Rija' xunimirisaj nuq'ij. Y toq xubij chuwe richin yich'on, jari' toq xinben re jun bix re'.

² Ri ru-Espíritu ri Jehová nich'on woma yin. Ri ruch'abel kan k'o chuwech ri waq'.

^3-4 Ri qa-Dios roj israelita xch'on. Ja ri to'onel qichin ri xbin re ch'abel re' chuwe: Toq jun niq'aton-tzij pa ruchojmilal, kan achi'el ri saqil ri nel-pe nimaq'a' yan ri man jun sutz' k'o chuwech. Toq jun q'atoy-tzij kan k'o rukiy ri Dios chuwech, kan achi'el ri job ri nibanon chi nibek'ulun-pe ri q'ayis pan ulew.

⁵ Y keri' k'a xtuben ri Dios kik'in ri wijatzul yin. Keri' xtuben roma rija' kan xuben jun jikibel-tzij wik'in richin jantape'. Ri jikibel-tzij ri' kan xuben pa ruchojmilal. Roma ri' rija' xkiruto' jantape', y ronojel ri nurayibel, kan xtuya'.

⁶ Jak'a ri itzel taq winaqi' xa xkek'uq-el achi'el ri k'ix. Man rik'in ta k'a q'abaj xkek'uq-wi-el.

⁷ Xa kan rik'in k'a kum o jun chik ch'ich' ri xkek'uq-el. Chirij ri' xa xkeporox jumul akuchi e punul-wi kan, xcha'.

Ri e aj-raqen pa kiwi' ri aj-labal

⁸ Jare' ri kibi' ri e aj-labal ri maneq xibinri'il chikiwech ri xek'oje' rik'in ri David: Ri Is-bóset ri hacmonita. Ja rija' ri aj-raqen chikikojol ri e oxi' nabey aj-labal. Y rija' xerukamisaj e 800 achi'a' pa jun bey rik'in ri rukum.

⁹ Chirij-qa rija', k'o ri Eleazar ri ruk'ajol ri Dodó ri ahohíta. Rija' jun chike ri e oxi' ri maneq xibinri'il chikiwech, ri kan xek'oje' rik'in ri David toq xkipaba-ki' chikiwech ri aj-Filistea ri kimolon-ki' chiri' pa Pas-damim. Toq xebeyakatej-pe ri aj-Filistea, ri ch'aqa' israelita xa xe'animej.

¹⁰ Jak'a ri Eleazar xupaba-ri' chikiwech ri aj-Filistea y xuchop yerukamisaj, k'a toq xkos na ri ruq'a' k'ari' xtane'. Y ri ru-espada kan xtz'are' kan chirij ri ruq'a'. Y keri' chupan ri q'ij ri' ri Jehová xuya' jun nim ch'akonik chike ri israelita. Chirij ri' ri ch'aqa' chik israelita xetzolin rik'in ri Eleazar richin xbekik'ama' kan chuwi-kiq'a' ri etzelanel kichin ronojel ri k'o rejqalen.

¹¹ Chirij chik qa ri Eleazar k'o ri Samá ruk'ajol ri Agué, ri ararita. Y k'o k'a jun q'ij toq ri aj-Filistea xkimol-ki' chiri' pa Lehi, ri akuchi k'o jun ulew ri tikon kineq' chuwech. Ri ch'aqa' achi'a' israelita xa xe'animej-el.

¹² Jak'a ri Samá xpa'e' pa runik'ajal ri ulew ri' y man xuya' ta q'ij chi xe'ok-apo ri aj-Filistea chupan. Keri' chupan ri q'ij ri' ri Jehová xuya' chik jun nimalej ch'akonik chike ri israelita.

¹³ K'o k'a jun bey toq najin q'atoj, ek'o e oxi' achi'a' chikikojol ri e juwineq lajuj aj-raqen xe'apon rik'in ri David ri k'o chunaqaj ri jul rubini'an Adulam. Rokik ri' ri aj-Filistea yebek'oje' pa taq'aj chire ri Refaim richin yechajin,

¹⁴ y ri ch'aqa' chik ek'o-qa pa Belén. Jak'a ri David k'o chiri' akuchi nikito-wi-ki' ri aj-labal.

¹⁵ Jari' toq ri David xubij chi janila nurayij juba' ruya' ri nel-pe chupan ri pozo ri k'o chuchi' ri tinamit Belén.

¹⁶ Roma ri' ri e oxi' achi'a' ri' xe'ok-apo ri akuchi chajin-wi koma ri aj-Filistea, y xkelesaj ya' chupan ri pozo ri', y xkik'uaj-el chire ri David. Jak'a rija' man xrajo' ta xuqum. Xa xutix pan ulew, retal richin jun sipanik chire ri Jehová. Y xubij:

¹⁷ Kan nej ta k'a k'o chuwe yin chi ninben re', roma wi xtinqum, xa kan achi'el ja ta ri kikik'el re e oxi' achi'a' re' ri xkiya-ki' chuwi' kamik ri ninqum-qa, xcha'. Y man xrajo' ta k'a xuqum. Re' kan ja ri e oxi' achi'a' ri maneq xibinri'il chikiwech ri xebanon.

¹⁸ Y ri Abisai rach'alal ri Joab, ri e ral ri Seruiá, ja rija' ri k'o más ruq'ij pa kiwi' ri e juwineq lajuj, roma rija' jun bey xuchop nuben oyowal kik'in e 300 achi'a' rik'in ri rukum, y kan xerukamisaj konojel. Roma ri' kan xk'oje' janila ruq'ij chikiwech ri e juwineq lajuj ri'.

¹⁹ Y kan ja rija' ri xya'ox más ruq'ij chikiwech ri ch'aqa' chik, y ja rija' ri xok aj-raqen pa kiwi' ri e juwineq belejlajuj ri'. Jak'a man xajlex ta kik'in ri e oxi' nabey.

²⁰ Chuqa' ri Benaías ri ruk'ajol ri Joiadá aj-Cabseel man nuxibij ta ri'. Rija' xerubanala' k'a k'iy banobel. Xerukamisaj k'a ri e ka'i' ruk'ajol ri Ariel ri aj-Moab. Chuqa' xqaqa pa jun jul y xukamisaj jun koj toq ruchapon niqaqa jun pim laj tew.

²¹ Y chuqa' xukamisaj jun aj-Egipto ri nim rupalen, ri ruk'uan-el rukum. Ri Benaías xuchop oyowal rik'in ri achin ri' rik'in jun che'. Xumej pa ruq'a' ri rukum, y rik'in ri' xukamisaj-wi.

²² Ronojel k'a re' xuben ri Benaías ruk'ajol ri Joiadá. Y rik'in re' xk'oje' ruq'ij pa kiwi' ri e juwineq lajuj achi'a' ri maneq xibinri'il chikiwech.

²³ Xk'oje' k'a más ruq'ij chikiwech ri e juwineq lajuj, jak'a man xajlex ta kik'in ri e oxi' nabey. Chirij ri' ri David xuben chire richin xok aj-raqen pa kiwi' ri nichajin richin.

²⁴ Chikikojol ri e juwineq lajuj achi'a' ri maneq xibinri'il chikiwech ek'o: Ri Asael rach'alal ri Joab; ri Elhanán ruk'ajol ri Dodó ri aj-Belén;

²⁵ ri Samá y ri Elicá e aj-Harod;

²⁶ ri Heles ri paltita; ri Irá ruk'ajol ri Iqués ri aj-Tecoa;

²⁷ ri Abiézer ri aj-Anatot; ri Sibecai ri aj-Husah;

²⁸ ri Salmón ri ahohíta; ri Maharai ri aj-Netofá;

²⁹ ri Héled ruk'ajol ri Baaná chuqa' aj-Netofá; ri Itai ruk'ajol ri Ribai ri aj-Guibeá ri k'o pa rulew ri Benjamín;

³⁰ ri Benaías ri aj-Piratón; ri Hidai ri aj pa ch'uti'n raqen-ya' rubini'an Gaas;

³¹ ri Abí-albón ri arbatita; ri Azmávet ri aj-Bahurim;

³² ri Eliahbá ri saalbonita; ri e ralk'ual ri Jasén; ri Jonatán;

³³ ri Samá ri ararita; ri Ahiam ruk'ajol ri Sarar, chuqa' ararita;

³⁴ ri Elifélet ruk'ajol ri Ahasbai ri aj-Maacá; ri Eliam ruk'ajol ri Ahitófel ri aj-Guiló;

³⁵ ri Hesrai ri aj-Carmel; ri Paarai ri arbita;

³⁶ ri Igal ruk'ajol ri Natán aj-Sobá; ri Baní ri aj-Gad;

³⁷ ri Sélec ri amonita; ri Naharai aj-Beerot, ri ruto'onel ri Joab, ral ri Seruiá;

³⁸ ri Irá aj-Jatir; ri Gareb chuqa' aj-Jatir;

³⁹ y ri Urías, ri hitita. Konojel e juwineq wuqlajuj.