2 Sam 21 - Kaqchiquel Bible

Ri rutojbalil ri xkiya' ri gabaonita chike ri israelita.

¹ Rokik ri David niq'aton-tzij, xpe k'a jun wayjal ri xuben oxi' juna'. Y toq ri David xuk'ulubej ri Jehová, ri Jehová xubij chi re wayjal re' xpe pa kiwi' rije' roma ri Saúl y ri e rijatzul e kamisanela'. Roma rije' xa xekikamisaj ri gabaonita.

² Ri gabaonita man e israelita ta. Xa jun tinamit ri xek'oje' kan chike ri amorreo, ri achoq ik'in xkiya' kitzij ri israelita richin man yekikamisaj ta. Jak'a ri Saúl xa xuchop kikamisaxik, roma man nrajo' ta chi ri winaqi' ri' yek'oje' chikikojol ri israelita. Roma ri' ri rey David xeroyoj ri gabaonita, richin xch'on kik'in.

³ Y toq xe'apon, xuk'utuj k'a chike ri achike ta k'atzinel chi nuben pa kiwi' rije', y achike ta nuben richin nutoj chike ronojel ri man utz ta ri xban chike, richin chi rije' nikibila' ta chik utzilej taq ch'abel pa kiwi' ri israelita.

⁴ Y ri gabaonita xkibij: Ni ri q'anapueq ni ri saqipueq man nuq'i' ta richin nutojbej ri ruk'ayewal ri xuben ri Saúl y ri aj pa rachoch chiqe, jak'a chuqa' man niqajo' ta chi niken jun chiwe rix, roma re' xa kan nik'o chik ruwi', xecha'. K'ari' ri David xubij chike chi ri xtikibij rije', jari' ri xtibanatej.

⁵ Jari' toq ri gabaonita xkibij chire: Ja ri Saúl ri xrajo' ta chi xojruk'is-el richin chi kan man jun chik chiqe roj nik'oje' kan chuwech re iruwach'ulew rix.

⁶ Jak'a re wakami wi rat qitzij chi nawajo' yojato', ke'ajacha' k'a pe chiqe e wuqu' chike ri e rijatzul kan ri Saúl, ri xcha'ox roma ri Jehová, richin xkeqatzeqeba' chuwech ri Jehová chiri' pa Guibeá ri rutinamit ri Saúl, xecha'. Y ri David xubij chi kan xkerujech k'a chike.

⁷ Jak'a ri David xukol kan ri ruk'aslen ri Mefi-bóset ruk'ajol kan ri Jonatán, y rumam kan ri Saúl, roma ri ya'on-tzij ri xkiben chuwech ri Jehová ri xk'oje' chikikojol ri David y ri Jonatán.

⁸ Y ri David xerujech k'a el e ka'i' ruk'ajol ri Saúl rik'in ri Rispá rumi'al ri Aiá. Re e ka'i' re' kibini'an Armoní y jun chik Mefi-bóset. Xerujech chuqa' e wo'o' ral ri Merab rumi'al kan ri Saúl, ri rixjayil ri Adriel ruk'ajol ri Barzilai meholatita.

⁹ Y re wuqu' re' xejach-el pa kiq'a' ri gabaonita, y rije' xekitzeqeba' chiri' pa jun juyu' chuwech ri Jehová. Keri' xeken ri e wuqu' e rijatzul kan ri Saúl. Re' xbanatej k'a pa nabey taq q'ij, toq xchap ri q'atoj richin cebada.

¹⁰ Jak'a ri Rispá xberuk'ama-pe jun tzieq richin bis y xuya' pa ruwi' jun nimalej abej ri k'o chiri' richin xk'oje' rija' pa ruwi'. Rija' xk'oje' chiri' toq xtiker-pe ri q'atoj richin ri cebada k'a toq xqaqa na ri job.*f8* Y kan man xuya' ta q'ij chi ri aj-xik' taq chikopi' yekitej ta ri ch'akulaj ri paq'ij, ni man xuya' ta q'ij richin chi ri k'uxunela' taq chikopi' yekitej ta ri ch'akulaj ri chaq'a'.

¹¹ Toq xbix k'a chire ri David ri najin chubanik ri Rispá, ri ru-concubina kan ri Saúl,

¹² jari' toq ri David xberuk'ama' ri kibaqil ri Saúl y ri Jonatán ri k'o kan kik'in ri winaqi' aj-Jabés. Ri aj-Jabés pan ewel k'a xekikol kan ri ch'akulaj kichin ri Saúl y ri Jonatán toq xetzeqebex akuchi nikimol-wi-ki' ri winaqi' chiri' pa tinamit Bet-sán, toq e kamisan chik pe koma ri aj-Filistea pa juyu' Guilboa.

¹³ Ri David xuben chi xuk'uex-el ri kibaqil ri Saúl y ri Jonatán, y xekimol chuqa-el ri kibaqil ri wuqu' ri xetzeqebex chiri' pa Guibeá.

¹⁴ Ronojel k'a re baq re' xemuq ri akuchi muqun-wi ri Cis ri rutata' ri Saúl, chiri' pa tinamit Selá chupan ri ruwach'ulew Benjamín. Ri rusamajela' ri David kan xkiben k'a ronojel ri achike xubij rija'. Y k'ari' ri Dios xukuy rumak ri tinamit Israel.

Oyowal kik'in ri winaqi' nima'q kipalen

¹⁵ Chirij ronojel re' ri aj-Filistea xkichop chik jun bey labal kik'in ri israelita. Y ri David y ri aj-labal xebe richin xbekibana' oyowal kik'in. Jak'a ri David kan janila xkos.

¹⁶ Chikikojol ri aj-Filistea k'o k'a jun achin nim rupalen, rubini'an Isbí-benob. Y ri rukum ralal más juba' waqxaqi' libra, y banon rik'in q'enq'oj-pueq. Y xerupan ruk'uan k'a jun ru-espada k'ak'a', y re achin re' xrajo' ta xukamisaj ri David.

¹⁷ Jak'a ri Abisai ral ri Seruiá xberuto' ri David, y xukamisaj ri achin aj-Filistea. Roma ri' ri aj-labal richin ri David xkibij k'a chire chi man jun bey chik xtibe chikij pa labal richin man nichup ta ri saqil richin Israel.

¹⁸ Xbanatej k'a jun chik oyowal pa tinamit Gob kik'in ri aj-Filistea. K'o k'a jun israelita rubini'an Sibecai husatita, ri xukamisaj ri Saf, jun chike ri winaqi' nima'q kipalen.

¹⁹ Y xbanatej chik k'a jun ruka'n oyowal chiri' pa Gob kik'in chuqa' ri aj-Filistea. Y k'o k'a jun chik israelita rubini'an Elhanán ruk'ajol ri Jaír ri aj-Belén, ri xukamisaj ri jun chik Goliat aj-Gat. Y ri raqen ri rukum kan janila nim achi'el ri bolobik-che' richin ri kembel.

²⁰ Y xbanatej chik k'a jun oyowal ri pa tinamit Gat. Y chiri' k'o k'a jun achin ri janila nim rupalen, y k'o k'a kablajuj ruwi-ruq'a' y kablajuj ruwi-raqen.

²¹ Y re achin re' xuyek koyowal ri aj-Israel. Jak'a ri Jonatán ruk'ajol ri Simá, ri rach'alal ri David, xa xukamisaj.

²² Keri' ri e kaji' achi'a' nima'q kipalen aj-Gat xetzaq pa ruq'a' ri David y pa kiq'a' ri aj-labal.