2 Sam 20 - Kaqchiquel Bible

Ri Sebá xyakatej chirij ri rey David

¹ Xk'oje' k'a jun achin ri janila banoy etzelal ri rubini'an Sebá, ruk'ajol ri Bicrí aj-Benjamín. Rija' nuxupuj k'a trompeta y nubila': Roj man jun achike ta niqoyobej chi nuya' ri David chiqe. Man jun niqach'ek chi niqatzeqelibej re ruk'ajol kan ri Isaí. Qonojel roj israelita qojtzolej pa qachoch, nicha'.

² Keri' k'a konojel ri israelita xkimalij kan ri David y xkitzeqelibej ri Sebá ruk'ajol ri Bicrí. Jak'a ri aj-Judá xkitzeqelibej ri ki-rey y xkachibilaj-pe k'a pa raqen-ya' Jordán y xe'apon k'a pa Jerusalem.

³ Y toq xapon ri David pa rachoch chiri' pa Jerusalem, xeroyoj ri lajuj ru-concubina ri e ruya'on kan richin nikichajij ri rachoch. K'ari' xeruya' pa jun chik jay, xerilij y xechajix chiri', jak'a man jun bey chik xk'oje' kik'in. Xa kan xetz'ape' chiri', y xek'oje' achi'el malkani' k'a xeken na el.

⁴ K'ari' ri rey xubij chire ri Amasá chi kerumolo' ri aj-labal ri aj-Judá, y ke'apon rik'in ri David pa rox q'ij.

⁵ Xbe k'a ri Amasá richin xeberoyoj ri aj-Judá, jak'a xa kan janila xbeyaloj y man xapon ta ri q'ij ri bin-el chire.

⁶ Roma ri' ri David xubij chik el chire ri Abisai: Ri Sebá ruk'ajol ri Bicrí xa kan xtuben más ch'a'oj chiqe ke chuwech ri xuben ri Absalón. Wakami k'a ke'ak'uaj-el ri e chajiy wichin, y ke'atzeqelibej roma rik'in juba' yeril nima'q taq tinamit ri e tz'apen chi tz'aq, y keri' xtuben k'ayew chiqe, xcha'.

⁷ Roma ri' ri Abisai xeberoyoj k'a pe ri Joab y ri aj-labal ri ek'o rik'in, chuqa' ri e chajiy richin ri rey y ri ch'aqa' chik aj-labal aj-Judá. Chirij ri' xe'el k'a el pa Jerusalem richin xkitzeqelibej ri Sebá.

⁸ Y toq rije' xe'apon chunaqaj ri nimalej abej ri k'o pa Gabaón, jari' toq xbek'ulun-pe ri Amasá chikiwech. Ri Joab ruwiqon-el-ri' rik'in ri rutziaq richin oyowal, y chuqa' rukusan jun ximibel-rupan, y chirij ri' ruya'on-el jun ti ko'ol rukamisabal ri k'o pa ruk'ojelibal. Rokik beneq-apo rik'in ri Amasá, jari' toq xtzaq-el ri kamisabel ri'.

⁹ Xusik' k'a el, y toq xapon-apo rik'in ri Amasá, ruk'uan pa ruq'a'. Xuk'utuj k'a rutzil ruwech y xuchop-apo ri rusumal-ruchi' ri Amasá rik'in ri rijkiq'a' richin nutz'ubaj.

¹⁰ Jak'a ri Amasá man xutz'et ta ri kamisabel ri ruk'uan ri Joab pa rajxokon. Y jari' toq ri Joab xuchuq'ij pa rupan, y kan xel-pe ri rixkolob, y xtzaq-el k'a pan ulew. Y man xk'atzin ta chi xuchuq'ij chik jun bey roma xa niken yan qa. K'ari' ri Joab y ri rach'alal Abisai xebe richin xkitzeqelibej ri Sebá.

¹¹ Y jun k'a chike ri achi'a' ri beneq rik'in ri Joab xpa'e' chunaqaj ri ruch'akul ri Amasá y xubij: Achike k'a ri najowan ri Joab y ri David, tibe k'a chirij ri Joab, xcha'.

¹² Ri Amasá k'a nubolqotila' na ri' chupan ri rukik'el pa nik'aj bey. Y konojel k'a ri yeq'ax, yepa'e' na chiri' richin nikitzu'. Ri achin ri' xutz'et k'a chi konojel xa yepa'e-qa toq nikitz'et, y roma ri' xrelesaj-el chiri' pa bey y xberuya' kan pa jun ulew, y xuya' kan jun tzieq pa ruwi'.

¹³ Y toq xujech'ej yan kan, xe'ik'o konojel richin xebe chirij ri Joab richin nikitzeqelibej ri Sebá.

¹⁴ Jak'a ri Sebá xq'axilan k'a el kik'in konojel tzobaj ri ek'o pa xaman, jak'a xa kan xaxe ri e aj pa rachoch ri xetzeqeliben richin. Keri' xe'apon k'a pa tinamit Abel-bet-maacá.

¹⁵ Chirij ri' xe'apon ri Joab y konojel ri achi'a' ri e beneq rik'in. Xkisutij k'a rij ri tz'aq richin ri tinamit. K'ari' xkiben-q'anej jun palibel richin yejote' pa ruwi' ri tz'aq richin ye'ok-qa chupan ri tinamit. Chuqa' kan janila xesamej richin nikitzeq ri tz'aq.

¹⁶ Y k'o k'a jun ixoq richin ri tinamit ri janila nowineq ri xsik'in-pe pa ruwi' ri tz'aq y xubij: ¡Tiwak'axaj! ¡Tiwak'axaj! Yin nink'utuj utzil chiwe chi tibij chire ri Joab chi tipe wawe' richin yich'on rik'in, xcha'.

¹⁷ Toq ri Joab xjel-apo, jari' toq ri ixoq xuk'utuj chire wi ja rija' ri Joab. Y rija' xubij chi ja. K'ari' xubij chik chi trak'axaj ri xtubij chire. Y ri Joab kan xrak'axaj k'a.

¹⁸ K'ari' ri ixoq xubij: Ri ojer kan nibix chi wi k'o jun najowan pixabanik pa ruwi' jun ch'ojikil, k'o chi nuk'utuj chupan re qatinamit Abel. Y rik'in ri pixabanik ri nril-el wawe', nichojmir ri ruch'ojikil.

¹⁹ Re qatinamit roj kan achi'el jun te'ej ri nuya' pixabanik chike ri ral. Kan jun tinamit ch'uch'uj y kan nuben ri nubij. Jak'a rat xa natej aq'ij richin nak'is re jun te'ej tinamit. ¿Achike k'a roma nawajo' nak'is ri ruya'on ri Jehová chiqe?, xcha'.

²⁰ Y ri Joab xubij: Ri' man tach'ob. Yin man ja ta re tinamit ri ninwajo' nink'is.

²¹ Yin man ja ta ri' ri nuch'obonik. Roma re wawe' xok-pe jun achin rubini'an Sebá ri aj pa rujuyu' ri Efraín. Ri achin ri' yakatajineq chirij ri qa-rey David. Tajacha' k'a pe rija', y yin xkinel-el wawe' chupan re atinamit, xcha'. Y ri ixoq xuya' k'a rutzij chire ri Joab chi ri ruka'n q'ij xtik'aq-pe ri rujolon ri Sebá chire rija' pa ruwi' ri tz'aq.

²² K'ari' ri ixoq rik'in na'oj xch'on rik'in ri tinamit richin nikiben rik'in ri Sebá ri nik'atzin. Y rije' xkitzak'ij k'a ri rujolon ri Sebá ruk'ajol ri Bicrí, y xkik'eq-pe chire ri Joab. Roma ri' ri Joab xuxupuj ri trompeta richin xkiya' kan ri tinamit. Chirij ri' xebe pa taq kachoch. Y ri Joab xtzolin pa Jerusalem rik'in ri David.

Ri e aj-raqen pa kiwi' ri aj-labal

²³ Ri Joab xk'oje' k'a kan pa kiwi' ri aj-labal richin chijun ri ruwach'ulew. Ri Benaías ruk'ajol ri Joiadá xk'oje' kan pa kiwi' ri e chajinela' richin ri rey.

²⁴ Ri Adoram xk'oje' pa kiwi' ri samajela' e ximil pa samaj rik'in ri rey. Ri Josafat ruk'ajol ri Ahilud, ja rija' ri nitz'iban ri nibanatej ronojel q'ij.

²⁵ Ri Sevá ja rija' nitz'iban ri nubij ri rey. Ri Sadoc y ri Abiatar e sacerdote.

²⁶ Y ri Irá aj-Jair chuqa' sacerdote richin ri David.