2 Sam 19 - Kaqchiquel Bible

¹ Xbeya'ox k'a rutzijol chire ri Joab chi ri David janila nubisoj ri ruk'ajol, y kan janila nroq'ej.

² Chupan ri q'ij ri' ri ch'akonik xa xok bis chike konojel ri aj-labal, roma xkak'axaj chi ri rey kan janila nibison y nroq'ej ri ruk'ajol.

³ Roma ri' ri achi'a' ri', toq xe'ok-apo pa tinamit, xa yek'ixbilan y pan ewel xe'ok-apo, achi'el nikiben ri ye'animej-pe pan oyowal.

⁴ Y ri David xutz'apej rupalej rik'in jun tzieq y nisik'in y nubij: ¡Nuk'ajol Absalón! ¡Absalón nuk'ajol, nuk'ajol!, ncha'.

⁵ K'ari' ri Joab xapon pa jay ri akuchi k'o-wi ri David y xubij chire: Wakami xe'ak'ixbisaj ri aj-labal ri xkikol ri ak'aslen rat, ri kik'aslen ri ami'al-ak'ajol, ri kik'aslen ri awixjayilal y ri kik'aslen ri a-concubina.

⁶ Rat ye'awajo' más ri e etzelanel awichin ke chuwech ri awachibil. Wakami kan xaq'alajirisaj chi man jun kejqalen ri e aj-raqen y ri aj-labal, roma kan xak'ut jebel chi wi ta k'es ri Absalón, rat kan yakikot ta, stape' ta qonojel roj oj kaminaqi'.

⁷ Wakami k'a, kayakatej y katel-el richin yach'on chi utzil kik'in ri qawinaq, roma kan chuwech ri Jehová ninbij chawe chi wi man xkach'on ta kik'in, man jun chik chike rije' ri k'o kan awik'in toq xtiseqer-q'anej. Y re' kan jun nimalej ruk'ayewal pan awi' ri man jun bey ak'axan ta chawij chupan chijun ri ak'aslen, xcha'.

⁸ K'ari' xyakatej-el ri rey y xbetz'uye' chuchi' ri tinamit. Y xya'ox k'a rutzijol chupan chijun ri tinamit Mahanaim chi ri rey tz'uyul chiri'. Y chijun k'a tinamit xe'apon rik'in ri rey. Rokik ri', ri e ruwinaq kan ri Absalón xa xe'animajlan-el y xebe chi taq kachoch.

Ri David xtzolej pa Jerusalem

⁹ Chirij re' ri ch'aqa' chik israelita xa nikibila' k'a chikiwech: Ri David xojrelesaj pa kiq'a' ri e etzelanel qichin y xojrukol pa kiq'a' ri aj-Filistea; jak'a xa k'o chi animajineq-el pa qaruwach'ulew roma ri Absalón.

¹⁰ Man rik'in ri', ri Absalón ri xqaben chire chi xok qa-rey, xa xken kan pan oyowal. Wakami k'a ¿Achike roma man niqaben chire ri rey David chi nitzolej chik pe qik'in?, xecha'.

¹¹ Roma ri' ri rey David xuteq rutzijol chike ri sacerdote Sadoc y ri Abiatar, y xubij-pe chike chi kech'on kik'in ri aj-raqen pa ruwi' ri Judá, y tikik'utuj chike: ¿Achike roma rix man jun nimey richin niben ta chi yin yitzolin chik chupan ri nuq'atbel-tzij, toq xa konojel ri ch'aqa' chik qawinaq nikajo' chi yin yitzolin chik?

¹² Rix kan ix wach'alal; junan qabaqil qaboch'il iwik'in. ¿Achike k'a roma toq xa ja ri ch'aqa' chik qawinaq ri ye'ajowan chi yin yitzolej chik, y rix xa man jun nimey pa nuwi'?

¹³ Keri' chuqa' tibij chire ri Amasá chi roma rija' kan jun chike ri wach'alal, roma ri' ninya' nutzij chuwech ri Dios chi kan xtinben chire chi ja rija' xtok aj-raqen pa kiwi' ri aj-labal, pa ruk'exel ri Joab, xcha'.

¹⁴ Keri', konojel ri winaqi' aj-Judá xa jun kiwech xkiben y xkiteq rubixik chire ri David chi titzolin-pe y keruk'ama-pe konojel ri ek'o rik'in.

¹⁵ Ri David y ri winaqi' xkichop k'a bey richin yetzolin, y xe'apon chuchi' ri raqen-ya' Jordán. Rokik ri' ri winaqi' aj-Judá xe'apon pa tinamit Guilgal richin xbekik'ulu' y nikito' richin nuq'axaj-pe ri raqen-ya'.

¹⁶ Jak'a ri Simí ruk'ajol ri Guerá aj-Benjamín chi'anin xel-pe pa tinamit Bahurim, y xbe kik'in ri achi'a' ri aj-Judá richin xberuk'ulu' chuqa' ri rey David.

¹⁷ Rija' e ruk'uan-el e 1,000 achi'a' aj-Benjamín, y chuqa' ri Sibá ri samajel pa rachoch kan ri Saúl, e rachibilan-el e wolajuj ruk'ajol y e juwineq rusamajela'. Xkiq'axaj k'a apo ri raqen-ya' richin xe'apon rik'in ri rey David.

¹⁸ Xeq'ax k'a apo ri akuchi xax rubanon ri raqen-ya' richin xekiq'axaj-pe ri e aj pa rachoch ri rey, y richin nikiben ri achike niqa' chuwech. Toq xe'apon-apo, ri Simí xbexuke' k'a chuwech ri David,

¹⁹ y xubij chire: Wajaw, tabana' utzil man naben chuwe richin ninwejqalej ri etzelal ri xinben chawe, ni man tik'oje' chi'ak'u'x ri xinben chawe toq rat xatel-pe pa Jerusalem. Tabana' utzil tamestaj ronojel re',

²⁰ roma yin ri in asamajel xq'ax chinuwech chi man utz ta ri xinben. Roma ri' xipe nabey chikiwech ri qawinaq israelita ri ek'o pa xaman, richin yatonk'ulu-el rat nu-rey, xcha'.

²¹ Jak'a ri Abisai ral ri Seruiá xubij-apo chi ri achin ri' kan ruk'amon richin niken roma kan xroyoj itzel pa ruwi' ri rey ri cha'on roma ri Jehová.

²² Jak'a ri David xubij: ¿Achike roma toq ja rix ri yixbin-pe chuwe ri k'o chi ninben? Roma ronojel re' kan pa nuq'a' yin k'o-wi. Rix kan iwetaman chik jebel chi yin in rey richin ri tinamit Israel. ¿Y achike k'a roma toq xa xixok-qa etzelanel wichin? Yin kan ninbij k'a chi chupan chijun ri qaruwach'ulew Israel kan man jun xtiken chupan re q'ij re', xcha'.

²³ Y xeri' ri rey David xuya' rutzij chire ri Simí chi man xtukamisaj ta.

²⁴ Chuqa' ri Mefi-bóset ri rumam kan ri rey Saúl xbe richin xberuk'ulu' ri David, y kan man atiwineq ta k'a, ni man ruchojmirisan ta ri rusumal-ruchi', ni man jalowineq ta. Kan keri' k'a xuch'ob richin nuben chupan ri q'ij toq xbe ri rey k'a toq xtzolin chik na rik'in uxlanibel-k'u'x.

²⁵ Y toq ri Mefi-bóset xapon rik'in ri David, ri David xuk'utuj chire ri achike roma man xbe ta chirij.

²⁶ Y rija' xubij: Wajaw, rat awetaman chi yin xa man yitikir ta yibiyin. Y roma ri' xinbij chire ri nusamajel chi tuchojmirisaj ri ti nubur richin yich'oke-el chirij richin yatintzeqelibej. Jak'a rija' xa xiruq'ol kan.

²⁷ Man xaxe ta k'a xiruq'ol kan, xa kan xutz'uk chuqa' tzij chuwij chawech rat wajaw. Jak'a rat kan janila na'oj k'o awik'in achi'el jun ángel richin ri Dios. Y roma ri' kan tabana' k'a ri utz nuben chawech rat.

²⁸ Roma qonojel ri oj aj pa rachoch kan ri numama' kan ruk'amon chi xojakamisaj ta. Man rik'in ri' rat xinawoyoj richin junan yiwa' awik'in pa mesa. ¿Achike ta k'a xtinbij yin chawe rat nu-rey ri k'o chi naben wik'in yin?, xcha'.

²⁹ Y ri rey xubij chire: Man nik'atzin ta k'a chi niqabij más ch'abel. Roma wakami ninbij yin chi tich'ara' chiwech rik'in ri Sibá ronojel ri awulew, xcha'.

³⁰ Jak'a ri Mefi-bóset xubij: Ronojel ri ulew xa tok k'a kan richin ri Sibá, roma ri más rejqalen chuwe yin, chi rat wajaw xatzolin chik pe rik'in uxlanibel-k'u'x pan awachoch, xcha'.

³¹ Chuqa' ri Barzilai, ri aj-Galaad xqaqa-pe pa rutinamit Roguelim chuk'ulik ri rey David, y junan xkiq'axaj ri raqen-ya' Jordán richin xorujacha' kan pa bey.

³² Ri Barzilai janila k'a ti ri'j chik; jumuch' chik rujuna'. Rija' jun achin beyom, y ja rija' ri xya'on ronojel k'atzinel chire ri rey toq xk'oje' chiri' pa Mahanaim.

³³ Toq man jani keq'ax-pe chupan ri raqen-ya', ri David xubij chire ri Barzilai chi junan keq'ax-apo chupan ri raqen-ya' y tibe rik'in pa Jerusalem, y chiri' nik'oje-wi rik'in.

³⁴ Jak'a ri Barzilai xubij chire ri rey: Yibe ta, xa jak'a ri k'iy chik nujuna' y juba' chik ok in k'es richin chi yibe-el awik'in pa Jerusalem.

³⁵ Yin wakami jumuch' chik nujuna'. Yin man yitikir ta chik ninya' rukojol ri utz y ri man utz ta. Man ninna' ta chik ri ruki'il ri yentej. Chuqa' man yitikir ta chik ninwak'axaj ri bixanela' chi achi'a' chi ixoqi'. ¿Achike ta k'a roma xkinok jun ejqa'n chawe rat nu-rey?

³⁶ Yin xaxe k'a ninwajo' yatinbenjacha' kan la juk'an ruchi' ri raqen-ya'. ¿Achike k'a roma toq rat rey nawajo' naya' re jun nimalej rajel ruk'exel re' chuwe?

³⁷ Yin nink'utuj utzil chawe richin naya' q'ij chuwe richin yitzolin pa nutinamit. Y toq yiken, yimuq ta chikinaqaj ri nte-nata'. Jak'a wawe' k'o ri nusamajel rubini'an Quimham richin nibe awik'in. Y tabana' rik'in ri niqa' chawech, xcha'.

³⁸ Y ri rey xubij chi nuk'uaj k'a ri Quimham richin nuben rik'in rija' ri niqa' chuwech ri Barzilai. Y xuya' kan rutzij chire chi kan xtuben ronojel ri xtuk'utuj-el chire.

³⁹ Y konojel k'a ri e beneq rik'in ri David xkiq'axaj k'a apo ri raqen-ya' Jordán nabey chuwech rija'. Y toq xeq'ax rija' y ri Barzilai, jari' toq xutz'ubaj kan y chuqa' xrurtisaj kan richin xkijech kan ki'. Y ri Barzilai xk'oje' k'a kan, y xtzolin-el pa rachoch.

⁴⁰ Ri rey xapon k'a pa Guilgal rachibilan-el ri Quimham, y chuqa' konojel ri aj-labal aj-Judá, y ri nik'aj chike ri aj-labal kichin ri ek'o pa xaman chire ri Israel.

⁴¹ Y konojel k'a ri achi'a' e richin ri Israel ri ek'o chiri' xkibij chire ri David: ¿Achike k'a roma xa ja ri qach'alal aj-Judá ri xeq'axan-pe awichin rat pa raqen-ya' Jordán, y chuqa' ri awixjayilal y ri awalk'ual y konojel ri asamajela' ri e peteneq awik'in?, xecha'.

⁴² Jak'a ri aj-Judá xkibij chike ri aj pa xaman: Keri' xqaben roma ri rey kan qach'alal roj. ¿Y kan roma ri' xyakatej iwoyowal? Rix xa man jun achike ta roma nipe iwoyowal, roma ri rey kan man jun ruya'on chiqe richin niqatej. Chuqa' kan man jun chiqe roj ri ruk'ulun ta jun sipanik chuq'a' ri rey, xecha'.

⁴³ K'ari' ri israelita ri ek'o pa xaman xkibij chike ri aj-Judá: Roj qak'uan-qi' lajuj tzobaj, y roma ri' lajuj mul más k'o qaq'a' chire ri rey chiwech rix. ¿Y achike roma rix niben chiqe chi maneq qejqalen? Pa ruwi' ri' kan ja roj ri xojbin chi titzolej-pe ri qa-rey, xecha'. Jak'a ri aj-Judá kan más poqon taq ch'abel ri xekibij chike.