2 Sam 18 - Kaqchiquel Bible

Toq xken ri Absalón

¹ Ri David xeruch'er k'a pa taq tzobaj ri aj-labal, y xeruya' k'a aj-raqen pa kiwi'.

² Jun tzobaj xk'oje' pa ruq'a' ri Joab. Jun chik tzobaj xk'oje' pa ruq'a' ri Abisai ri rach'alal. Y ri jun chik tzobaj xuya' pa ruq'a' ri Itai aj-Gat. Y k'ari' ri rey xubij chike ri winaqi' chi rija' chuqa' nibe kik'in pan oyowal.

³ Jak'a ri aj-labal xkibij chire chi más utz nik'oje' kan chiri' pa Mahanaim, roma wi rije' k'o chi ye'animej, ri e etzelanel kichin man xkekitzeqelibej ta. Chuqa' chike ri e etzelanel kichin xa man jun, stape' ta wi yeken nik'aj chike rije', roma ri David xa kan rejqalen jun e 10,000 aj-labal. Roma ri' xkibij chik chi más utz tik'oje' kan pa tinamit, y kan k'a chiri' yeruto-wi-el.

⁴ Y ri David kan xuben achi'el ri xbix chire. K'ari' xk'oje' k'a chunaqaj ri akuchi niban-wi oken chire ri okibel richin ri tinamit, rokik ri aj-labal ye'el-el pa taq tzobaj richin yebe pan oyowal.

⁵ Y xuchilabej k'a el chike ri Joab, ri Abisai, y ri Itai, chi roma ri ajowabel ri k'o kik'in chire rija', kan tikijoyowaj ruwech ri Absalón. Y kan konojel k'a ri aj-labal xk'oje-el chikik'u'x ri xubij-el ri rey chike pa ruwi' ri Absalón.

⁶ Xebe k'a ri achi'a' ri' richin xbekibana' oyowal kik'in ri e ruwinaq ri Absalón. Ri oyowal ri' xbanatej pa ruwach'ulew Efraín akuchi ek'o-wi li'aj-che'.

⁷ Chiri' k'a xech'akatej-wi ri ruwinaq ri Absalón koma ri ruwinaq ri David. Chupan ri q'ij ri' xbanatej k'a janila chi kamik, y xeken e 20,000 achi'a'.

⁸ Ri oyowal xuchop k'a chijun ri ruwach'ulew ri'. Y más k'a e k'iy xeken roma ri ruq'a' taq che' ri ek'o chiri' ke chuwech ri xeken chi espada.

⁹ Chupan ri oyowal ri', ri Absalón xberuk'ulu-pe-ri' kik'in jujun chike ri ruwinaq ri David, y rija' ch'okol k'a el chirij jun kowilej-kiej. Y toq ri kowilej kiej ri' xok k'a chuxe' ruq'a' jun paten che', jari' toq ri rusumal-ruwi' ri Absalón xubek' ri' chirij ri ruq'a' ri che' ri'. Y rija' xtzeqe' kan chiri', jak'a ri kowilej-kiej xa yakel xq'ax-el.

¹⁰ Y jun chike ri xtz'eton, xberubij chire ri Joab chi ri Absalón tzeqel chuq'a' jun paten che'.

¹¹ Y ri Joab xubij chire: Wi xatz'et chi keri' rubanon, ¿achike k'a roma man xakamisaj ta chi'anin chiri'? Wi ta xakamisaj, xinya' ta oxi' onza saqipueq chawe y chuqa' jun ximibel-apan, xcha'.

¹² Jak'a ri achin ri' xa xubij chire ri Joab: Stape' ta rat yinatoj rik'in ka'i' quintal saqipueq, yin kan man xtinjeluj ta nuq'a' chirij ri ruk'ajol ri rey, roma roj xqak'axaj-pe toq rija' xubij-pe chawe rat y chike ri Abisai y ri Itai chi man jun telesan ruk'aslen ri ruk'ajol.

¹³ Chuwech ri rey kan man jun yojtikir niqewaj.Y roma ri' wi ta yin xinben keri', ri nuk'aslen xa k'o ta chuwi' kamik. y rat xa man ta xinato' chuwech re', xcha'.

¹⁴ Jari' toq ri Joab xubij: Kela' naben rat la', xcha'. Y xuk'uaj k'a el oxi' ch'ab pa ruq'a', xapon rik'in ri Absalón, ri kan k'a k'es na y tzeqel chire ri che', y xuch'ik ri ch'ab ri' pa ránima ri Absalón.

¹⁵ Y ek'o k'a e lajuj alaboni' ri yechajin richin ri Joab, y rije' xejel-apo rik'in ri Absalón, y xkikamisaj kan jumul.

¹⁶ Chirij ri' ri Joab xuxupuj ri trompeta richin ketane' chi koqotaxik ri ruwinaq ri Absalón.

¹⁷ Y xbekiqasaj k'a pe ri ruch'akul ri Absalón, y xkitorij pa jun jul. K'ari' xkik'aqala' abej chirij richin xkiben-q'anej jun tzobaj abej pa ruwi'. Y konojel ri ruwinaq ri Absalón xa xe'animej, y xebe chi taq kachoch.

¹⁸ Toq ri Absalón k'a k'es na xuben k'a q'anej jun paban-abej pa taq'aj richin ri rey ri chiri' pa Jerusalem, y xutz'ibaj ri rubi' chuwech, roma maneq ralk'ual richin nik'ase' ta kan ri rubi'. Y ri abej ri' xk'oje' kan chiri'.

Ri Ahimaas xrajo' xberuya' rutzijol chire ri David

¹⁹ K'ari' ri Ahimaas ruk'ajol ri Sadoc xubij chi xtibe chi'anin richin niberuya' ri utzilej rutzijol chire ri David, chi ri Jehová xuya' yan rutojbalil pa kiwi' ri e etzelanel richin.

²⁰ Jak'a ri Joab xubij chi man ja ta ri Ahimaas ri xtuk'uan ri rutzijol ri' chire ri rey, roma xa kan ja ri rukamik ri ruk'ajol ri nibebix chire. Y xubij chi k'a jun bey chik na xtibe rija' chuya'ik jun chik rutzijol.

²¹ K'ari' ri Joab xubij chire jun achin aj-labal aj-Etiopía chi tibe rija' rik'in ri rey richin niberubij chire ri xutz'et kan. Y ri achin ri' xulukuba-qa-ri' chuwech ri Joab y xbe junanin.

²² Jak'a ri Ahimaas xubij chik apo chire ri Joab chi xabachike ta na xtik'uluwachitej, rija' chuqa' xtibe chirij ri achin aj-Etiopía, xaxe wi nuya' q'ij chire. Y ri Joab xubij chire chi xa man jun nik'atzin-wi chi junanin nibe roma xa man jun sipanik xtuk'ul roma re'.

²³ Jak'a ri Ahimaas xubij chi man jun rubanon, stape' man jun sipanik xtuk'ul. K'ari' ri Joab xuya-el q'ij chire. Xbe k'a chi'anin chupan ri bey richin pa taq'aj, y xik'o-el chuwech ri achin Aj-Etiopía.

²⁴ Rokik ri' ri David tz'uyul chuchi' ri tinamit, y k'o jun tz'etonel ri k'o-q'anej pa ruwi' ri tz'aq. Re tz'etonel re' xutz'et k'a chi k'o jun achin peteneq junanin.

²⁵ K'ari' ri tz'etonel ri' xsik'in y xubij-qa chire ri rey. Y ri rey xubij chi wi ruyon peteneq, kan ruk'amon-pe utzilej rutzijol. Rokik ri' ri Ahimaas más xnaqajub-apo.

²⁶ Chiri' chuchi' ri tinamit, k'o chuqa' jun chik chajinel. Y toq ri tz'etonel ri k'o-q'anej chikaj xutz'et chi peteneq chik jun achin junanin, xsik'in-pe chire ri jun chik chajinel richin xubij-pe chire. Y ri rey xubij chi re achin re' chuqa' utz rutzijol ruk'amon-pe.

²⁷ Y ri k'o-q'anej chikaj xubij chi ri nabey peteneq, niq'alajin chi achi'el xa ja ri Ahimaas roma ri rubinibal. Y ri rey xubij chi rija' kan jun achin ri kan utz y kan ruk'amon-pe utzilej rutzijol chire.

²⁸ Y toq ri Ahimaas xapon, rik'in uchuq'a' xch'on-apo chire ri rey y xubij chi xech'akon yan. K'ari' xbexuke' chuwech ri rey y xubij: Nimalej ruq'ij ri Jehová, ri qa-Dios, roma xerujech pa qaq'a' ri xeyakatej chawij, rat wajaw, xcha'.

²⁹ Y ri rey xuk'utuj chire wi utz ruwech ri Absalón ri ruk'ajol. Y ri Ahimaas xubij chi rija' xaxe xutz'et kan chi kimolon-ki' ri winaqi' toq ri Joab xuteq-pe; jak'a man xretamaj ta kan achike banatajineq.

³⁰ Y ri David xubij chire chi tujech'ej-ri', y tik'oje' chiri'. Y ri Ahimaas keri' xuben.

³¹ Chupan ri ramaj ri' xapon ri achin etíope y xuya' ri utzilej rutzijol chire ri David, y xubij: Wajaw, wakami ri Jehová xarukol yan pa kiq'a' ri xeyakatej chawij, xcha'.

³² Y ri rey xuk'utuj chire ri achin ri' wi utz ruwech ri Absalón. Y rija' xubij: K'ate' ta konojel ri e etzelanel awichin xkek'is ta; keri' chuqa' konojel ri ye'ajowan ri akamik. Y kan xtiban ta chike achi'el xban chire ri Absalón, xcha'.

³³ Y toq ri David xrak'axaj ri', xpe k'a jun nimalej q'axo'n pa ránima. Xjote' k'a el chupan ri jay ri k'o pa ruwi' ri okibel richin ri tinamit. Y rokik jotol-el janila k'a noq' y nubij: ¡Nuk'ajol Absalón, nuk'ajol, nuk'ajol Absalón, k'ate' ta yin xiken pan ak'exel rat nuk'ajol!, xcha'.