2 Sam 17 - Kaqchiquel Bible

¹ K'ari' ri Ahitófel xubij chire ri Absalón: Taya' q'ij chuwe richin yencha-el e 12,000 achi'a' y xtintzeqelibej ri David chupan re aq'a' re'.

² Y xkinapon k'a kik'in roma rije' janila e kosinaqi' chik y maneq chik kuchuq'a'. Xtinben k'a chike chi xtipe xibinri'il kik'in, y xa xke'animej. Y keri' kan xaxe k'a ri rey ri xtinkamisaj kan,

³ roma rat xaxe nawajo' ri rukamik rija'. Keri' k'a xtinben richin chi ri ruwinaq ri David xketzolin-pe awik'in. Y toq xetzolin yan awik'in chijun tinamit, xtik'oje' uxlanibel-k'u'x kik'in, xcha'.

⁴ Re jun na'oj re' xqa' chuwech ri Absalón y chikiwech ri e aj-raqen ri ek'o pa ruwi' ri tinamit.

⁵ Man rik'in ri', ri Absalón xa xubij chi tik'utux chik chire ri Husai ri arquita pa ruwi' ri xubij ri Ahitófel. Y wi man niqa' ta chuwech, nikak'axaj chik k'a ri nuch'ob rija'.

⁶ Toq ri Husai xapon, ri Absalón xutzijoj chire ronojel ri xubij ri Ahitófel. K'ari' xuk'utuj chire wi ruk'amon nikiben o ni. Y wi man ruk'amon ta, tubij k'a rija' ri ruk'amon chi nikiben.

⁷ K'ari' ri Husai xubij chire ri Absalón chi ri na'oj ri xuya' ri Ahitófel, man utz ta.

⁸ Y chuqa' ri Husai xubij chire: Rat awetaman chi ri atata' y ri achi'a' ri e beneq rik'in, e achi'a' ri man nikixibij ta ki'. Wakami rije' kan itzel kina'on y yakatajineq koyowal achi'el jun ixoq oso toq e majon-el ri taq ral chuwech. Chuqa' ri atata', rija' jun achin ri kan richin oyowal, y man xtuq'axaj ta re aq'a' re' junan kik'in ri ruwinaq.

⁹ Y re wakami yan, rik'in juba' rewan-ri' pa jun jul o juk'an chik. Y wi ek'o chike ri qawinaq xkeken kan, ri xke'ak'axan xa xtikibij chi roj xa xojch'akatej yan.

¹⁰ Y stape' ri qawinaq maneq xibinri'il chikiwech, achi'el ri koj, xa xkemayamo-qa, roma chijun tinamit Israel ketaman chi ri atata' jun achin ri maneq xibinri'il rik'in, y keri' chuqa' ri achi'a' ri ek'o rik'in rija'.

¹¹ Ninbij k'a, chi konojel ri achi'a' aj-Israel tikimolo-pe-ki' awik'in, ri nitiker-pe pa Dan, ri k'o pa xaman, k'a pa Beerseba ri k'o pa xokon. Kan janila k'a chi achi'a' ri xtikimol-pe-ki' awik'in, ri kajlabal kan achi'el k'a ri sanayi' ri k'o chuchi' ri palou. Y kan ja rat ri xkatik'o-el chiqawech richin yojbe pan oyowal.

¹² K'ari' xqojbe xabakuchi-k'o-wi ri atata', y xqojqaqa chirij rija' y ri ek'o rik'in, achi'el niqaqa ri raxq'ab pa ruwi' re ruwach'ulew toq nutz'apej ronojel. Y kan man xtiqaya' ta kan rik'in ruk'aslen rija' ni ri achi'a' ri ek'o rik'in.

¹³ Y wi nrewaj-ri' pa jun tinamit, qonojel roj rik'in kolo' xtiqasutij-rij ri tinamit ri', y k'ari' xtiqaqirirej-pe rik'in ri kolo' ri' k'a pa xulan, y xtiqatorij kan chijun ri tinamit chupan ri raqen-ya'. Y keri' kan chijun k'a xtiwuluwu' kan jumul, xcha'.

¹⁴ Ri Absalón y konojel ri israelita kan utz k'a xkak'axaj ri rupixabanik ri Husai arquita chuwech ri rupixabanik ri Ahitófel. Kere' xbanatej roma ri Jehová kan rubin chik chi ri rupixabanik ri Ahitófel xa xtiyojtej, richin chi xtiqaqa ri ruk'ayewal pa ruwi' ri Absalón.

¹⁵ K'ari' ri Husai xutzijoj chike ri e sacerdote Sadoc y ri Abiatar ronojel ri pixabanik ri xuya' ri Ahitófel y ri xuya' rija' chire ri Absalón y ri ek'o rik'in.

¹⁶ Y ri Husai xubij k'a chike chi chi'anin tikitaqa' rutzijol chire ri David chi man tikanej-qa re jun aq'a' re' chuchi' ri tz'iran ruwach'ulew, xa kan tuk'owisaj chi'anin ri raqen-ya' Jordán, richin man nikamisex ta rija' y ri ek'o rik'in.

¹⁷ Y ri Jonatán y ri Ahimaas man pa Jerusalem ta k'a ek'o-wi; rije' xa ek'o pan En-roguel. Y roma man utz ta chi yetz'etetej rije' chiri' pa tinamit Jerusalem, ri e ka'i' sacerdote xa jun ixoq aj-ik' ri xkiteq-el chuya'ik re rutzijol re' chike rije'. Y rije' kan xebe k'a richin nibekibij chire ri David.

¹⁸ Jak'a ri e ka'i' uk'uey rutzijol ri' xa xetz'etetej roma jun ala' toq xe'el-el chiri'. Y re ala' re', xberubij chire ri Absalón. Jak'a ri e uk'uey rutzijol anineq xebe y xe'apon pa Bahurim. Y xe'ok pa jun jay ri akuchi k'o jun pozo. Y rije' xe'ok-qa chupan ri pozo ri'.

¹⁹ Y ri rixjayil ri rajaw ri jay ri' xurik'-qa jun tzieq pa ruwi' ri pozo richin xutz'apej ruwi'. Y pa ruwi' ri' xusa-qa ixin. Y keri' kan man jun k'a netaman chi rije' ek'o pa pozo.

²⁰ Pa rachoch re ixoq re' xe'apon rusamajel ri Absalón ri e kitzeqeliben-el ri Jonatán y ri Ahimaas. Y xkik'utuj k'a chire ri ixoq akuchi ek'o-wi. Y ri ixoq xubij chike chi xeq'ax-el keri' y xkiq'axaj yan el ri jun ch'uti'n raqen-ya' ri k'o chiri'. Toq xkak'axaj-el ri', rije' xebekikanoj, jak'a xa man xekil ta. Y roma ri' xetzolin pa Jerusalem.

²¹ Y toq xebe yan ri e tzeqelibeyon kichin, ri kewan-ki' pa pozo xe'el-pe, y xebe richin xbekibij chire ri David chi chi'anin keyakatej-el, y tikiq'axaj ri raqen-ya' Jordán, roma ri Ahitófel k'o ri ruch'obon chikij.

²² K'ari' ri David xyakatej-el y chuqa' konojel ri winaqi' ri ek'o rik'in. Y konojel k'a xkiq'axaj ri raqen-ya' chupan ri aq'a' ri'.

²³ Jak'a toq ri Ahitófel xunabej chi man xban ta ri xubij rija', xuben-el ruchojmil ri rukiej, xch'oke' k'a el chirij y xbe chirachoch pa rutinamit. Xuchojmirisaj k'a kan ronojel y k'ari' xberujitz'aj-ri'. Y keri' xken y xmuq akuchi muqun-wi ri rutata'.

²⁴ Chirij ri' ri David xel-el chuchi' ri raqen-ya' y xapon pa tinamit Mahanaim. Ri Absalón chuqa' xuq'axaj ri raqen-ya' Jordán kik'in ri ruwinaq ri e richin oyowal.

²⁵ Pa ruk'exel ri Joab, ri Absalón xuya' kan ri Amasá aj-raqen pa kiwi' ri aj-labal. Ri Amasá ruk'ajol kan jun ismaelita rubini'an Itrá. Y ri rute' ja ri Abigail ri rumi'al ri Nahas, y rach'alal ri Seruiá ri rute' ri Joab.

²⁶ Ri Absalón y ri e beneq rik'in xek'oje-qa pa ruwach'ulew Galaad.

²⁷ Y toq ri David xapon pa Mahanaim, xe'apon k'a rik'in e oxi' achi'a' ri e peteneq pa kitinamit. Ri jun rubini'an Sobí ruk'ajol ri Nahas, ri peteneq pa Rabá ri pa ruwach'ulew Amón. Ri jun chik rubini'an Maquir ruk'ajol ri Amiel, ri peteneq pa tinamit Lodebar. Y ri jun chik rubini'an Barzilai ri peteneq pa tinamit Roguelim ri k'o pa ruwach'ulew Galaad.

²⁸ Rije' e kik'amalon k'a pe chire ri David: Ch'at, nima'q taq k'ojelibel, bojo'y, jalajoj ruwech ixin, cebada, k'ej ri chayun, k'ilin trigo, aus, lenteja, k'ilin garbanzo,

²⁹ kab ri nikiya' taq chikopi', mantequilla, karne'l y queso. Ronojel re' kik'uan-el roma xkibij-qa chi ri David y ri winaqi' ri ek'o rik'in janila chik yenum, e kosinaqi' y chaqi'j kichi' roma e peteneq pa tz'iran ruwach'ulew.