2 Sam 16 - Kaqchiquel Bible

Ri Sibá niberuk'ulu' ri David pa bey

¹ Toq ri David k'a juba' tuya' kan ri ruwa-juyu', jari' toq k'o jun achin rubini'an Sibá rusamajel ri Mefi-bóset xapon chuk'ulik ri David. Y e ruk'uan-el ka'i' taq bur ri ruya'on-el kixalma. Y chikijujunal kik'uan-el 200 kaxlan-wey, wok'al etabel uva ri chaqirisan, wok'al etabel wíkix ri chaqirisan y jun k'ojelibel ri banon rik'in tz'um nojineq-el chi vino.

² Ri David xuk'utuj chire ri Sibá ri achike roma ruk'uan-el ronojel ri'. Y rija' xubij chi ri taq bur richin yech'oke-el ri rixjayil y ri ralk'ual ri David. Ri kaxlan-wey, ri uva y ri wíkix richin nikitej ri aj-labal, y ri vino richin nikiqum ri janila chaqi'j kichi' pa tz'iran ruwach'ulew.

³ Ri rey xuk'utuj akuchi k'o-wi ri Mefi-bóset. Y ri Sibá xubij chi rija' xa xkanej kan pa Jerusalem, roma xuch'ob chi ri israelita xtikitzolij chire ri ruq'atbal-tzij ri ánima rumama'.

⁴ K'ari' ri rey xubij chire ri Sibá: Wakami k'a, ronojel ri rulew ri Mefi-bóset xtinwelesaj chire y xtinya' chawe rat, xcha'. K'ari' ri Sibá xubij: Yin ri in asamajel. Kan xtinqasaj k'a wi' chawech, y kan ta beneq ruwech xtinwil utzil awik'in rat, xcha'.

Ri Simí nuya' etzelanik pa ruwi' ri David

⁵ Y ri rey David ruchapon k'a el bey y napon yan pa tinamit Bahurim. Y pa bey xbe-el k'a pe jun achin rubini'an Simí rijatzul kan ri Saúl y ruk'ajol ri Guerá. Y nroyoj k'a itzel pa ruwi' ri David,

⁶ nuk'aqala' abej chirij rija', chikij ri e tata'al, ri aj-labal, y chikij ri e chajiy richin ri e beneq pa ruxokon y pa rijkiq'a' ri rey.

⁷ Rokik nuk'aqala' abej, ri Simí kere' k'a nubij chire ri David: Katel-el wawe' rat ri at banoy etzelal y at kamisanel.

⁸ Ri Jehová xuya' rutojbalil chawe ronojel ri kamik ri xe'aben rik'in ri rijatzul kan ri Saúl, ri xatok kan pa ruk'exel. Wakami ri Jehová xujech ri aq'atbel-tzij pa ruq'a' ri ak'ajol Absalón. Jak'a ruk'ayewal re' ri xqaqa pan awi' roma ri etzelal ri xe'abanala'; roma rat kan at jun kamisanel-wi, xcha'.

⁹ K'ari' ri Abisai ral ri Seruiá xubij chire ri rey: ¿Achike roma re jun kamineq tz'i' re', nroyoj itzel pan awi' rat nu-rey? Taya' q'ij chuwe richin yiq'ax-el y xtinwelesaj ri rujolon, xcha'.

¹⁰ Jak'a ri rey xubij: Rat ral ri Seruiá, man tayoj-awi' chupan re'. Wi rija' nroyoj itzel pa nuwi', kan tubij na, roma ja ri Jehová biyon chire chi nubij re' chuwe, xcha'.

¹¹ K'ari' ri David xubij chire ri Abisai y chike konojel ri e tata'al: Wi ri nuk'ajol ri walk'ualan, nrajo' nrelesaj nuk'aslen, ¡K'a ta la' chik k'a jun chike ri rijatzul kan ri Benjamín! Tiya' k'a q'ij chire richin nroyoj itzel pa nuwi', roma rik'in juba' kan ja ri Jehová biyon chire.

¹² Rik'in juba' ri Jehová xtutz'et ri tijoj-poqonal ri ninq'axaj, y kan xtujoyowaj nuwech pa ruk'exel ri itzel oyonik ri xuya' ri Simí pa nuwi', xcha'.

¹³ Y rokik ri David y ri ruwinaq e beneq pa bey, ri Simí beneq ri juk'an-apo chire ri siwan, y jantape' nroyoj k'a itzel pa ruwi' ri David. Nuk'aqala' abej y nutukukej poqolaj chirij.

¹⁴ Y toq ri rey y ri ruwinaq xe'apon chuchi' ri raqen-ya' Jordán, janila e kosinaqi' chik. Roma ri' xe'uxlan-qa chiri'.

Ri kipixabanik ri Ahitófel y ri Husai

¹⁵ Rokik xbanatej ri' rik'in ri David, ri Absalón y ri ruwinaq xe'apon pa Jerusalem. Y chikikojol rije' beneq ri Ahitófel.

¹⁶ Jari' toq ri Husai ri arquita, rachibil ri David, xapon rik'in ri Absalón y nisik'in xubij: ¡K'o ruq'ij ri rey! ¡Kan k'o-wi ruq'ij ri rey!, xcha'.

¹⁷ Y ri Absalón xuk'utuj chire ri Husai chi wi jare' ri matioxinik nuya' chire ri rachibil, y achike roma man xbe ta chirij.

¹⁸ Y ri Husai xubij chire: Yin k'o chi yik'oje' kan rik'in ri xucha' ri Jehová y ri xkicha' ri qawinaq. Roma ri' awik'in rat xkik'oje-wi kan.

¹⁹ Pa ruwi' ri', xa kan ruk'amon k'a chi xkatinsamajij rat, achi'el xinsamajij ri atata', xcha'.

²⁰ K'ari' ri Absalón xuk'utuj chire ri Ahitófel ri achike k'atzinel nikiben.

²¹ K'ari' ri Ahitófel xubij chire ri Absalón: Wakami, kak'oje' kik'in ri e ru-concubina kan ri atata', ri e ruya'on kan richin nikichajij ri rachoch rija'. Y keri' konojel k'a ri qawinaq xtikak'axaj chi rat kan xaqasaj ruq'ij ri atata'. Y kan xtik'oje-el awuchuq'a' rat y konojel ri ek'o awik'in, xcha'.

²² K'ari' xkiben k'a jun ti jay ri banon rik'in tzieq pa ruwi-q'anej ri rachoch ri David, y chiri' ri Absalón xk'oje' kik'in ri e ru-concubina ri rutata'. Y re' chikiwech konojel ri winaqi' xbanatej-wi.

²³ Chupan ri q'ij ri' ri pixabanik ri nuya' ri Ahitófel kan kibanon k'a chire chi achi'el xa ta kan ja ri Dios ri nich'on kik'in. Y roma ri' ri David jantape' xuk'ulubej, y keri' chuqa' xuchop rubanik ri Absalón.