2 Sam 13 - Kaqchiquel Bible

Ri Amnón y ri Tamar ri yijrana'

¹ Jun k'a chike ri ralk'ual ri David rubini'an Amnón. Y ri Amnón k'o k'a jun yijrana' rubini'an Tamar, ri kan jebel ok nitzu'un. Y ri Amnón kan xbe k'a ránima chirij ri Tamar.

² Ri Amnón kan man nril ta k'a achike nuben richin nik'oje' rik'in, roma man niya'ox ta q'ij chi jun xten nik'oje' chikikojol alaboni' y ri achi'a'. Y roma ri' ri Amnón sachineq ruk'u'x y kan xuyabij.

³ Ri Amnón k'o k'a jun rachibil rubini'an Jonadab, ri kan janila nowineq. Y rija' ruk'ajol ri Simá ri rach'alal ri David.

⁴ Y ri Jonadab xuk'utuj chire ri Amnón ri achike roma q'ij-q'ij más yawa' nitzu'un, stape' kan ruk'ajol ri rey. Y xubij chire chi tuq'alajirisaj chuwech. K'ari' ri Amnón xubij chi keri' rubanon roma janila nrajo' ri Tamar ri rana' ri Absalón.

⁵ Y ri Jonadab xubij chire: Kakotz'e' pan ach'at, y tabana' chi at yawa'. Y toq ri atata' xtipe chi aq'ejeloxik, tabij chire chi tutaqa-pe ri Tamar awik'in richin chi norubana' kan away, richin keri' kan natz'et-apo, y keri' ja rija' xkatzuqu, xcha'.

⁶ Xkotz'e' k'a qa ri Amnón, y xujaluj-qa chi yawa'. Y toq xapon k'a ri rey chuq'ejeloxik, ri Amnón xubij chi nurayij chi ja ta ri Tamar ri yijrana' ri nibebanon kan ka'i' taq rukaxlan-way y kan ja ta rija' ri niya'on-apo chire.

⁷ Y ri David xuteq rubixik pa rachoch ri Tamar chi rija' tibe pa rachoch ri Amnón, y tiberubana' ri k'o chi nutej ri Amnón.

⁸ Xapon k'a ri Tamar chirachoch ri Amnón, y toq xapon xberila' kotz'ol. Ri Tamar xuben k'a qa ka'i-oxi' kaxlan-wey y xuchaq'arisaj. Y ronojel re' rutzuliben-apo ri Amnón.

⁹ Toq xchaq'aj, xroyoj ri Amnón richin niwa'. Jak'a rija' man xrajo' ta. Y xa xubij chi ke'el-el konojel ri winaqi' ri ek'o-apo rik'in. Y xe'el k'a el konojel.

¹⁰ K'ari' ri Amnón xubij chire ri Tamar chi tuk'uaj-apo ri kaxlan-wey ri xuben k'a pa ruch'at, richin chi kan ja rija' nitzuqun-apo. Ri Tamar kan xuk'uaj k'a apo ri kaxlan-wey pa ruwarabel ri Amnón richin nutzuq.

¹¹ Jak'a toq xuya-apo chuwech, ri Amnón xa xuchop chuq'a' y xubij chire chi tikotz'e-qa rik'in.

¹² Jari' toq ri Tamar xubij chire: Ni, nuxibal, man taben keri' chuwe, roma ri keri' kan jun mak. Y re' kan man ruk'amon ta nibanatej wawe' pan Israel. Man taben re jun ruk'ixbilal re' chuwe.

¹³ Roma ¿akuchi k'a xkibe-wi yin rik'in ri nuk'ixbilal? Y rat chuqa' xa xtaqasaj aq'ij y keri' xtuben chi xa man jun chik awejqalen re wawe' pan Israel. Nink'utuj utzil chawe chi kach'on rik'in ri rey y rija' xtuya' q'ij richin xkinok awixjayil, xcha'.

¹⁴ Jak'a ri Amnón man xrak'axaj ta ri yijrana', y roma kan janila ruchuq'a', xtikir chirij ri yijrana' y xk'oje' rik'in.

¹⁵ Chirij ri' ri Amnón xubij chire ri Tamar chi tiyakatej-el y tibe. Y kan xretzelaj k'a rik'in ronojel ránima. Kan más k'a xretzelaj ke chuwech toq xrajo'.

¹⁶ Jak'a ri Tamar xubij chire ri ruyijxibal: Man ruk'amon ta chi kere' naben chuwe, roma más nim mak re naben chuwe chi yinawoqotaj-el, ke chuwech ri xaben chuwe, xcha'. Jak'a ri Amnón man xrak'axaj ta ri xubij.

¹⁷ K'ari' ri Amnón xroyoj ri rusamajel ri nilin richin y xubij chire chi trelesaj-el ri ixoq ri' ri chiri', y tutz'apej-el ri ruchi-jay chuwech.

¹⁸ Ri samajel ri' kan xrelesaj k'a el y xutz'apej-el ri ruchi-jay. Y ri Tamar rukusan k'a el jun rutziaq jalajoj nitzu'un, ri nikikusaj ri xtani' e kimi'al ri rey.

¹⁹ K'ari' ri Tamar xuretz-el ri rutziaq ri', y xujopij-el chaj pa rujolon, Y k'ari' xuya-el ri ruq'a' chupalej y noq' xbe.

²⁰ Jari' k'a toq xberuk'ulu-pe ri Absalón, y xutzijoj ronojel chire. Y ri Absalón xubij chire: ¡Wakami wetaman chik chi ja ri Amnón ri xbanon ronojel re' chawe! Man rik'in ri' man k'a katoq', roma xa qach'alal chuqa'. Man taya-awi' pa q'axo'n, xcha'. Stape' keri' xubij ri Absalón, ri Tamar kan janila k'a xbison. Y xbek'oje' kan pa rachoch ri Absalón ri ruxibal.

²¹ Y toq ri David xrak'axaj ronojel re', kan janila k'a xyakatej royowal. Jak'a man jun xubij chire ri Amnón roma kan jari' ri nabey ruk'ajol, y janila nrajo'

²² Jak'a ri Absalón man jun xubij chire ri Amnón, ni utz ni itzel, stape' pa ránima kan janila xretzelaj ri Amnón, roma xk'oje' rik'in ri Tamar ri rana'.

Ri Absalón xuben ruk'exel chire ri Amnón

²³ Toq q'axineq chik k'a ka'i' juna', ri Absalón ek'o k'a rusamajela' ri yesokan kisumal karne'l kela' pa tinamit Baal-hazor, ri k'o chunaqaj ri ruwach'ulew Efraín.

²⁴ Chuqa' xbe rik'in ri David ri rutata' y xubij chire chi ri rusamajela' rija' nikisokaj kisumal ri karne'l ri pa juyu'. Y xuk'utuj k'a utzil chire ri rutata' chi tibe rik'in, rija' y ri nima'q taq rusamajela'.

²⁵ Jak'a ri rey xubij chi man yebe ta konojel richin chi man nikiya' ta pa latz'. Y stape' ri Absalón xutej ruq'ij, ri rey man xrajo' ta xbe. Y xaxe k'a xuya-el urtisanik pa ruwi'.

²⁶ K'ari' ri Absalón xubij chi wi rija' man nitikir ta nibe, stape' xaxe k'a ri Amnón ri runimal ri nibe rik'in. Y ri rey xuk'utuj chire achike roma nrajo' chi nibe ri Amnón rik'in.

²⁷ Jak'a ri Absalón kan xutej ruq'ij chuk'utuxik, y roma ri' ri David xuya-el q'ij chire ri Amnón y xebe chuqa' konojel ri kach'alal.

²⁸ Y ri Absalón xubij chike ri e rusamajela' chi toq xtikitz'et chi ri ránima ri Amnón kan nikikot roma ri vino; y toq rija' xtubij chi tikikamisaj, kan jari' xtikikamisaj, y man tikixibij-ki', roma ja rija' ri xbin. Y xubij chuqa' chi tikitija' kiq'ij richin nikiben, y man tikixibij-ki'.

²⁹ Toq xbanatej yan k'a ri rubin ri Absalón chike ri rusamajela' richin xkikamisaj ri Amnón, jari' toq konojel ri e ralk'ual ri rey chi'anin xech'oke-el chirij ri kikowilej taq kiej richin xe'animej.

³⁰ Rokik e animajineq ri ch'aqa' chik ralk'ual ri David, kan ja yan ri' xapon rutzijol rik'in rija', chi ri Absalón xerukamisaj konojel ri rach'alal, y man jun xk'oje' kan.

³¹ K'ari' ri David xyakatej-q'anej, y roma ri rubis xuretz ri rutziaq chirij, y xuqasaj-ri' k'a pan ulew. Y chuqa' konojel ri rusamajela' ri ek'o-apo rik'in keri' xkiben.

³² Jak'a ri Jonadab, ri ruch'utik'ajol ri David, xch'on-apo y xubij: Wajaw, man tanimaj chi kan konojel ri awalk'ual xekamisex, roma xaxe ri Amnón ri xkamisex. Re' kan rurayibel-wi k'a ri Absalón, kan chupan-pe ri q'ij toq ri Amnón xk'oje' rik'in ri Tamar ri yijrana'. Kan jari' toq rubin-pe richin k'o chi nukamisaj.

³³ Roma ri' man naya' pan awánima ri nitzijox toq nikibij chi konojel ri awalk'ual xekamisex, roma kan xaxe ri Amnón ri xkamisex kan, xcha'.

³⁴ Rokik ri', ri Absalón xanimej. Chirij ri' jun chike ri chajinel ri k'o pa ruwi' ri tz'aq ri rusurin-rij ri Jerusalem, xutz'et chi e peteneq e k'iy winaqi' pa bey ri k'o pa ruchojmilal ri juyu' Horonaim.

³⁵ Jari' toq ri Jonadab xubij chire ri rey chi jari' e peteneq ri e ralk'ual, achi'el ri xubij rija' chire.

³⁶ K'a juba' tich'on-qa ri Jonadab, jari' toq xe'apon ri ralk'ual ri rey y kan xe'oq'. Chuqa' ri rey xoq' kik'in roma ri bis y keri' chuqa' ri rusamajela'.

³⁷ Ri Absalón xanimej k'a el y xberewaj-ri' pa ruwach'ulew Guesur rik'in ri Talmai ruk'ajol ri Amihud ri rey richin ri ruwach'ulew ri'. Jak'a ri David ronojel k'a q'ij noq' roma ri rukamik ri Amnón.

³⁸ Y keri' k'a xuben ri Absalón richin xrewaj-ri', y xk'oje' oxi' juna' chiri' pa Guesur.

³⁹ Rokik ri' ri rey David xukuquba' ruk'u'x chi xken ri Amnón, y xpe rayibel rik'in richin nutz'et chik ruwech ri Absalón.