2 Sam 1 - Kaqchiquel Bible

Toq ri David xrak'axaj ri rukamik ri Saúl

¹ Xk'uluwachitej k'a chi toq ri David e ruch'akon chik kan ri winaqi' ri e rijatzul kan ri Amalec, xtzolej k'a pe, y xbek'oje' chiri' pa tinamit Siclag. Y jari' k'a chuqa' toq ri Saúl xa kamineq chik kan pan oyowal.

² Y pa rox q'ij chi tapon ri David pa Siclag, xapon k'a jun ala' ri peteneq ri akuchi xek'oje-wi ri aj-labal ri xek'oje' rik'in ri Saúl. Y re ala' re' kan tzeretzik k'a rutziaq peteneq, y ruya'on-pe ulew pa rujolon, retal richin nibison. Toq rija' xapon rik'in ri David, kan xuqasaj-ri' chuwech richin xuya' ruq'ij.

³ Y ri David xuk'utuj chire ri ala' ri' akuchi peteneq-wi. Y rija' xubij chi animajineq-pe ri akuchi xek'oje-wi ri aj-labal israelita.

⁴ K'ari' xuk'utuj chire achike xbanatej chiri'. Y rija' xubij chi ek'o aj-labal israelita ri xe'animej, y e k'iy xeken kan. Y xubij chi ri Saúl y ri ruk'ajol Jonatán xeken kan chuqa'.

⁵ Y xuk'utuj k'a chire ri ala' ri' achi'el toq retaman rija' chi ri Saúl y ri Jonatán xeken kan.

⁶ K'ari' ri ala' xubij: Yin chaq k'ate' xinapon chiri' pa juyu' Guilboa, y jari' toq xintz'et ri Saúl ruxik'ik'en-ri' chirij ri rukum. Y chirij rija' e peteneq aj-labal aj-Filistea ri ye'apon yan rik'in; ek'o e beneq pa ki-carruaje y ek'o ri e ch'okol-el chirij kiej.

⁷ Ri Saúl xtzu'un k'a chirij y jari' toq xirutz'et yin. Xiroyoj k'a, y yin xink'utuj chire ri achike nrajo'.

⁸ Y rija' xuk'utuj chuwe in achike yin. Y yin xinbij chi in rijatzul kan ri Amalec.

⁹ K'ari' ri Saúl xuk'utuj utzil chuwe richin ninkamisaj jumul, roma man nukoch' ta chik ri rukiy ri sokotajik ri ruk'uan y xa niken yan.

¹⁰ Y yin xintz'et chi kan man nik'achoj ta chik, y roma ri' xijel-apo rik'in richin xinkamisaj kan. K'ari' xinwelesaj-pe re ru-corona y re ch'ich' tobel ruq'a'. Y jare' xenk'en-pe chawe rat, wajaw yin, xcha' chire ri David.

¹¹ Toq ri David xrak'axaj chi keri' xbanatej, xuretz ri rutziaq chirij roma bis, y chuqa' keri' xkiben konojel achi'a' ri ek'o-apo rik'in.

¹² Y rije' xebison, xe'oq' y xemewayin chijun ri q'ij ri' k'a toq xokoq'a' na qa, roma ri rukamik ri Saúl y ri Jonatán y roma konojel ri aj-labal israelita y ri ch'aqa' chik kiwinaq ri xekamisex chi espada.

¹³ Y ri David xuk'utuj k'a chire ri ala' aj akuchi rija'. Y ri ala' xubij chi rija' ruk'ajol jun achin amalecita, jak'a xa chiri' pan Israel ek'o-wi.

¹⁴ Y ri David xubij k'a chire: ¿Man xak'en ta k'a rukiy toq xakamisaj ri rey ri rucha'on ri Jehová?, xcha'.

¹⁵ K'ari' ri David xroyoj jun chike ri aj-labal richin nukamisaj ri ala' ri'. Y keri' xch'ay k'a ri ala' ri' richin nikamisex.

¹⁶ Y toq niken yan qa, jari' toq ri David xubij chire: Ja rat k'o amak roma kan xaya' chawij chi ja rat xakamisan ri rey ri rucha'on ri Jehová, xcha'.

Bix richin ri rukamik ri Saúl y ri Jonatán

¹⁷ Chirij ri' ri David xuben jun bix richin bis richin natabel kichin ri Saúl y ri Jonatán.

¹⁸ Y xubij chi re jun bix re' k'o chi nik'ut chikiwech konojel ri ruwinaq israelita. Re bix re' rubini'an Ri Bix Richin Rute' Ch'ab, y tz'ibatel kan chupan ri wuj ri nibix Jaser chire. Kere' k'a nubij ri bix:

¹⁹ ¡Ri ruwaq'ijaj richin ri qatinamit Israel xa kan xek'is k'a kan, xa kan xek'is k'a kan ri chiri' pa ruwi' taq juyu'! Kan xetzaq k'a ri maneq xibinri'il chikiwech.

²⁰ Man tiya'ox rutzijol chiri' pa tinamit Gat. Man titzijox ri pa taq nima'q ruwech bey richin molojri'il chiri' pan Ascalón; richin man yekikot ri kimi'al ri aj-Filistea; richin man yetzopin roma kikoten ri kimi'al ri achi'a' ri man e qawinaq ta.

²¹ Ri Dios xtuben ta k'a chi man ta chik xtiqaqa raxq'ab pa ruwi' ri juyu' Guilboa. Xtuben ta chi man ta chik xtiqaqa ri job pa ruwi'. Ri tiko'n man ta chik xtiwachin richin maneq ta chik xtikikusaj richin ri kisipanik. Roma chiri' xepune-wi kan ri kitobal ri maneq xibinri'il chikiwech; ri rutobal ri Saúl xa man xtz'intz'ot ta chik chiri'.

²² Chiri' ri rute-ruch'ab ri Jonatán xuben chi xbiyin janila kik'. Ri ru-espada ri Saúl xuben chi chiri' xbiyin ri kiq'anal ri achi'a' ri maneq xibinri'il chikiwech.

²³ Ri Saúl y ri Jonatán kan janila xe'ajowex qoma roj israelita. Rije' kan janila k'a jebel xkik'uaj-ki' toq k'a k'o kik'aslen, chuqa' man jun xch'aron kichin chupan ri kamik. Rije' kan más k'a e anineq chikiwech ri kot, Kan ik'owineq chik ruwi' ri kuchuq'a' chikiwech ri koj.

²⁴ Rix ixoqi' aj-Israel, wakami xa tzieq k'a richin bis tikusaj roma ri rukamik ri Saúl. Wakami man achi'el ta chik toq xixruwiq*f1* rik'in tzieq keq ri jebel rubanik, toq xuya' ri jebelej taq wiqobel ri e banon rik'in q'anapueq chiwe.

²⁵ Achi'el paqe' toq xeken kan ri maneq xibinri'il chikiwech ri chiri' pa juyu' Guilboa; achike k'a roma chiri' xpune-wi kan ri ruch'akul ri Jonatán.

²⁶ Yin yibison janila awoma rat Jonatán, roma rat kan at achi'el jun wach'alal. Kan janila k'a at jebel xaben wik'in; janila jebel ri awajowabal ri xak'ut chinuwech yin; kan más k'a jebel chuwech ri kajowabal ri ixoqi'.

²⁷ ¡Achike roma toq xetzaq ri maneq xibinri'il chikiwech! xa chiri' k'a xk'is-wi kan ri kamisabel richin ri labal, xcha' ri David.