2 Rey 7 - Kaqchiquel Bible

¹ K'ari' ri Eliseo xubij: Tiwak'axaj ri ruch'abel ri Jehová: Rija' nubij chi ke taq wa chua'q, xtibek'ayix ri lajuj libra k'ej chayun chi nik'aj onza saqipueq, y ri juwineq libra cebada xtibek'ayix chi nik'aj onza saqipueq; y re' kan ja re wawe' chuchi' ri tinamit Samaria xtibanatej-wi, xcha'.

² Y ri to'onel richin ri rey xubij chire ri Eliseo: Stape' ri Jehová nujeq ta pe ri kaj richin yojrutzuq, man xtibanatej ta ri nabij, xcha'. Jak'a ri Eliseo xubij: Rat kan xtatz'et rik'in ri runaq' taq awech; jak'a kan man jun xtatej chire ronojel re', xcha'.

³ Chiri' chuchi-el ri tinamit ek'o k'a e kaji' achi'a' ri k'o ri yabil chirij ri kich'akul ri kan nutaluj-ri'. Y rije' xkibij-qa chikiwech: ¿Achike roma ojk'o re wawe' y xaxe qoyoben ri qakamik?

⁴ Wi ta roj niqatej qaq'ij richin chi yojok-apo pa tinamit, xa xqojken chiri' roma wayjal. Y wi ta yojkanej kan wawe', chuqa' xa xqojken. Wakami k'a, jo' y qojq'ax-apo akuchi ek'o-wi-qa ri aj-labal ri aj-Siria. Wi rije' nikijoyowaj qawech, man xqojkikamisaj ta; y wi man keri' ta, kan xqojken k'ari', xecha'.

⁵ Y toq niq'equmer yan qa xeyakatej-el richin xebe akuchi ek'o-wi-qa ri aj-Siria. Y toq xe'apon chuchi', xkinabej chi xa man jun chik chike ri winaqi' ri' ri k'o ta kan chiri';

⁶ roma ri Jehová xuben chike ri aj-Siria chi xkak'axaj chi kan janila carruaje yeq'ajan; keri' chuqa' kaqen ri kiej, y janila aj-labal. Y xkibij k'a qa chikiwech: Wakami ri rey richin Israel xeberuk'ama-pe ri aj-labal hitita y ri aj-Egipto, richin nokibana' oyowal qik'in, xecha-qa.

⁷ Roma ri' ri aj-Siria xeyakatej-el y xe'animej-el ri tiqaq'ij ri', y xkimalij kan ri kachoch ri kibanon rik'in tzieq, y chuqa' ri kikiej y ri kibur. Kan ronojel k'a xkimalij kan roma xe'animej richin xkikol-el ri kik'aslen.

⁸ Toq ri kaji' achi'a' ri' xe'apon chuchi' ri akuchi xek'oje-wi ri aj-Siria, xe'ok-apo pa jun jay ri banon rik'in tzieq. Chiri' xewa' y xe'uk'ya', y chuqa' xkik'uaj-el saqipueq, q'anapueq y tzieq ri ek'o kan chiri', y xbekewaj kan ronojel. Chirij ri' xe'ok chik chupan jun chik jay, y chiri' k'o chuqa' xkik'uaj-el, y chuqa' xbekewaj kan.

⁹ K'ari' xkibij k'a qa chikiwech: Re yojtajin chubanik qayon roj xa man ruk'amon ta; roma wakami q'ij richin utzilej rutzijol roma re xqil. Jak'a wi niqoyobej chi niseqer na pe, xa kan k'o ruk'ayewal xtiqak'uluwachij. Wakami k'a, jo' y qojok-apo pa tinamit richin nibeqaya' ri utzilej rutzijol pa rachoch ri rey, xecha-qa.

¹⁰ Xebe k'a, y xesik'in-apo chike ri chajinela' richin ri ruchi' ri tinamit, y xkibij-apo chike: Roj xojbe akuchi ek'o-wi-qa ri aj-Siria, y xqatz'et kan chi man jun chik wineq k'o chiri', ni man jun chik ch'abel xqak'axaj; xaxe chik k'a ri kiej y ri bur ri e ximil kan chiri'. Ri akuchi xek'oje-wi, kan man jun naqon chire, xecha'.

¹¹ Ri yechajin ri ruchi' ri tinamit xesik'in richin xkiya' rutzijol chiri' pa rachoch ri rey.

¹² Y ri rey xyakatej k'a q'anej ri aq'a' ri', y xubij chike ri aj-raqen pa kiwi' ri aj-labal: Yin xtinq'alajirisaj chiwe ri achike nikajo' nikiben ri aj-Siria chiqe; Rije' ketaman chi yojnum; y roma ri' xe'el-el chiri' ri akuchi ek'o-wi-qa, y xbekewaj-ki' pa juyu'. Y xkibij-qa chi toq oj eleneq chik el chupan ri tinamit, xqojkichop keri' oj k'es, y xke'ok-pe chupan ri tinamit, xcha' ri rey.

¹³ K'ari' jun chike ri aj-raqen xubij: Keqataqa' na k'a el wo'o' achi'a' ri yech'oke' chirij kiej, re k'a ek'o kan wawe' pa tinamit. Wi yek'ase' o yeken kan, xa junan nikiben qik'in qonojel re ojk'o wawe'. Keqataqa' k'a el richin niqatz'et ri achike k'o, xcha'.

¹⁴ Xetaq k'a el achi'a' chupan ka'i' carruaje rik'in kiej akuchi ek'o-wi-qa ri aj-Siria. Y ri rey xubij-el chike ri achi'a' ri' chi tibekitz'eta' ri achike xbanatej.

¹⁵ Xebe k'a ri achi'a' ri', y xkitzeqelibej-el ri bey ri akuchi xeq'ax-wi ri aj-Siria, k'a xe'apon na chuchi' ri raqen-ya' Jordán. Y xkitz'et k'a chi chijun ri bey ri' nojineq chi tzieq y ch'aqa' chik ri xekitzaqala' kan pa bey, roma ri aj-Siria kan anineq xebe richin xe'animej. K'ari' ri achi'a' ri e taqon-el roma ri rey xetzolin-pe y xbekiya' rutzijol chire ri rey.

¹⁶ Chirij ri' konojel ri winaqi' xe'el-el pa tinamit, y xbekik'ama' k'a pe ronojel ri xkimalij kan ri aj-Siria. Chupan ri q'ij ri', kan xbanatej k'a achi'el ri xubij ri Jehová: Roma kan xk'ayix k'a ri lajuj libra k'ej chayun chi nik'aj onza saqipueq, y ri juwineq libra cebada xk'ayix chi nik'aj onza saqipueq.

¹⁷ Y ri rey xuya' k'a ri to'onel ri chuchi' ri tinamit, jak'a ri winaqi' xkitikmayij kan, xeq'ax k'a chirij y xken, xbanatej k'a achi'el xubij ri achin richin ri Dios toq xapon rik'in.

¹⁸ Y kan xbanatej k'a achi'el xubij ri Eliseo chire ri rey toq xubij chi ke taq wa chua'q, xtibek'ayix ri lajuj libra k'ej chayun chi nik'aj onza saqipueq, y ri juwineq libra cebada xtibek'ayix chi nik'aj onza saqipueq; y re' kan ja ri chuchi' ri tinamit Samaria xtibanatej-wi.

¹⁹ Toq ri to'onel richin ri rey xubij k'a chire ri Eliseo chi stape' ri Jehová nujeq ta pe ri kaj richin yerutzuq, man xtibanatej ta ri nubij ri Eliseo, jari' toq ri Eliseo xubij, chi rija' kan xtutz'et rik'in ri runaq'-ruwech; jak'a kan man jun xtutej chire ronojel ri'.

²⁰ Y kan keri' xbanatej: Ri tata'al ri' kan xken k'a roma ri winaqi' xa xeq'ax chirij toq rija' ruchajin ri ruchi' ri tinamit.