2 Rey 4 - Kaqchiquel Bible

Ri Eliseo xuto' jun malka'n ixoq

¹ K'o k'a jun q'ij jun ixoq rixjayil kan jun chike ri q'alajirisey ruch'abel ri Dios, xapon rik'in ri Eliseo y xubij chire: Ri wachijil xken yan; y rat awetaman chi rija' kan xutzeqelibej ri Jehová. Y wakami ri achin ri akuchi k'o-wi kan ri ruk'as peteneq richin yeruk'uaj-el re e ka'i' wal richin yeyuqe' pa samaj rik'in, xcha'.

² Y ri Eliseo xubij chire: ¿Achike ta k'a xtinben yin richin yatinto'? Tabij k'a chuwe achike k'o awik'in pan awachoch, xcha'. Y ri ixoq xubij chi kan man jun chik k'o rik'in, xaxe chik ti juba' aceite ri k'o pa bojo'y.

³ Y ri Eliseo xubij: Kabiyin y tabeqaja' bojo'y ri man jun k'o chupan. Tabeqaja' kik'in ri awachk'uljay, y kan k'iy k'a bojo'y taqaja'.

⁴ Y k'ari' katok k'a apo pan awachoch, y tatz'apej-awi' pa jay; rat y ri awal. Y taq'eja-qa aceite chupan ri bojo'y ri e aqajon. Y toq ninoj jun bojo'y, tajech'ej kan juk'an, y keri' naben chire ronojel, xcha'.

⁵ Y xbe k'a ri ixoq, y xutz'apej k'ari' pa jay; rija' y ri ral. Y rije' nikiq'axaj k'a apo ri bojo'y chire, y rija' kan nuq'ej-qa ri aceite chupan.

⁶ Toq ronojel bojo'y e nojineq chik, xubij chire jun chike ri ral: Tak'ama-pe jun chik bojo'y chuwe, xcha'. Y ri ral xubij chi maneq chik bojo'y. Y kan jari' toq xtane' chi nibiyin ri aceite.

⁷ Ri ixoq xberutzijoj k'a chire ri Eliseo, y ri Eliseo xubij chire: Kabiyin y tak'ayij ri aceite richin natoj ri k'as. Rat y ri e ka'i' awal xtiq'axaj iwi' rik'in ri aceite ri xkolotej kan, xcha'.

Ri Eliseo y ri ixoq aj-Sunem

⁸ Y k'o k'a jun q'ij ri Eliseo xq'ax-el pa tinamit Sunem. Y chiri' k'o k'a jun ixoq ri k'o ruq'ij, y re ixoq re' xutej ruq'ij richin ri Eliseo niwa-el kik'in. Y roma ri' toq rija' nik'o-el keri', niwa' k'a el kik'in ri ixoq y ri rachijil.

⁹ Y k'o k'a jun q'ij ri ixoq xubij chire ri rachijil: Yin niq'ax chinuwech chi re achin re niq'ax-el qik'in, re' kan jun nimalej rusamajel ri Dios.

¹⁰ Yin nink'utuj k'a utzil chawe chi tiqabana' jun ti jay, pa ruwi-q'anej re qachoch roj; y tiqaya' jun ch'at, jun mesa, jun ch'aket y jun candelero chupan; richin keri' toq nipe nik'oje' kan chupan ri ti jay ri', xcha'.

¹¹ K'o k'a jun q'ij toq ri Eliseo xapon chiri', y xbe'uxlan chupan ri jay ri xkiben.

¹² Rija' xroyoj ri rusamajel rubini'an Guehazí, y xubij chire chi troyoj-pe ri ixoq ri rajaw ri jay. Y toq xroyoj ri ixoq, ri ixoq kan chi'anin xapon-q'anej rik'in ri Eliseo.

¹³ K'ari' xubij chik chire ri Guehazí: Kere' tabij chire ri ixoq: Rat kan janila utzil a banon qik'in. Wakami k'a, ¿k'o ta jun utzil ri yojtikir niqaben awik'in rat? ¿Nawajo' richin yojch'on ta rik'in ri rey pan awi' rat o rik'in ri aj-raqen pa kiwi' ri aj-labal?, xcha'. Y ri ixoq xubij: Ni; matiox, roma yin kan utz nubanon chikikojol ri nuwinaq, xcha'.

¹⁴ Y ri Eliseo xubij chire ri Guehazí: ¿Achike ta k'a utzil yojtikir niqaben pa ruwi' rija'?, xcha'. Y ri Guehazí xubij chi ri ixoq ri' maneq ral; y pa ruwi' ri' ri rachijil xa janila ri'j chik.

¹⁵ K'ari' ri Eliseo xuteq chik el ri Guehazí richin nroyoj ri ixoq. Y ri ixoq xbe-q'anej y xpa'e' chuchi' ri jay.

¹⁶ Y ri Eliseo xubij chire chi ke taq wa juna' apo, xtuch'elej jun ti ral. Y ri ixoq xubij: Ni, rusamajel ri Dios; tabana' utzil man kinaq'ol, xcha'.

¹⁷ Chirij ri', ri ixoq kan xyawej k'a kan; y xk'oje' na wi jun ti ral chupan ri jun chik juna', achi'el xubij kan ri Eliseo chire.

¹⁸ Y k'o k'a jun q'ij toq ri ak'ual xk'iy yan q'anej y xbe rik'in ri rutata', ri k'o kik'in ri rusamajela' ri yeq'aton pa juyu'.

¹⁹ Y toq k'o chiri', chaq k'ate' xq'axon-pe rujolon y xubij chire ri rutata': ¡Yin janila niq'axon nujolon!, xcha' chire. Y ri rutata' xubij chire jun chike ri rusamajela': Tawejqaj-el y tak'uaj rik'in ri rute', xcha'.

²⁰ Y ri samajel xrejqaj-el ri ak'ual y xuk'uaj rik'in ri rute'. K'ari' ri te'ej xutz'uyuba' chuwa-ruch'ek k'a xapon na nik'aj-q'ij, y jari' toq ri ak'ual xken-qa.

²¹ K'ari' xuk'uaj-q'anej ri ti ral chupan ri ti jay ri akuchi nik'oje-wi kan ri Eliseo, y xuliba' pa ruwi' ri ruch'at. Xutz'apej kan ri ruchi' ri jay, y xel-pe chiri'.

²² Xuteq k'a royoxik ri rachijil, y xubij chire: Tabana' utzil tataqa-el jun samajel wik'in, y taya-el jun bur chuwe richin chi yin yibe chi'anin rik'in ri achin richin ri Dios, y xa yitzolin yan pe, xcha'.

²³ Y ri rachijil xubij: ¿Achike roma nabetz'eta' re wakami? Roma wakami man nimaq'ij ta richin ri k'ak'a' ik', ni man q'ij ta richin uxlanen, xcha'. Y rija' xubij chire ri rachijil: Man taxibij-awi', xcha'.

²⁴ K'ari' ri ixoq xuben chi chi'anin tichojmirisex-el ri bur, y xubij chire ri samajel: Tabujujej-el ri bur chi'anin, y man kapa'e-qa pa bey, k'a xtinbij na yin chawe k'ari' yapa'e-qa, xcha'.

²⁵ Xbe k'a ri ixoq, y toq napon yan rik'in ri juyu' Carmelo ri akuchi k'o-wi ri Eliseo, ri rusamajel ri Dios, k'a chiri' xutz'et-pe ri ixoq, y xubij chire ri Guehazí: Tatz'eta', la ixoq la peteneq chila', la' ja ixoq aj-Sunem la'.

²⁶ Tabana' utzil kabiyin chi'anin, tabek'ulu', y tabij chire: ¿Utz awech rat? ¿Utz ruwech ri awachijil y ri awal? kacha' chire, xcha'. Y toq ri samajel xubij re ch'abel re', ri ixoq xubij chi ronojel utz.

²⁷ Toq xe'apon chiri' pa juyu' Carmelo, ri ixoq xxuke-qa y xuq'etej ri raqen ri Eliseo. Y ri Guehazí xjel-apo richin nrelesaj-pe chiri' ri ixoq, jak'a ri Eliseo xubij chire: Taya' kan, roma rija' kan niq'axon ránima, y ri Jehová man ruq'alajirisan ta chinuwech achike roma kela' rubanon, xcha'.

²⁸ K'ari' ri ixoq xubij chire ri Eliseo: ¡Yin man jun bey xink'utuj ta jun wal chawe! Y chuqa' xinbij chawe chi man kinaq'ol, xcha'.

²⁹ Ri Eliseo xq'ax k'a chuwech ri nrajo' nubij ri ixoq, y roma ri' xubij chire ri Guehazí: Tajitz'a-el ri apan, tak'uaj-el ri nuch'ame'y, y kabiyin junanin. Y wi k'o jun xtak'ul, man taq'ejela' kan; wi k'o jun xkaq'ejelon, man kapa'e-qa rik'in richin naq'ejela' kan. Y toq xkatapon pa rachoch ri ixoq, xtaya' ri nuch'ame'y pa ruwi' ri rupalej ri ak'ual, xcha'.

³⁰ Jak'a ri rute' ri ak'ual xubij: Ninya' nutzij chuwech ri Jehová y chawech rat, chi man xkatinya' ta kan, xcha'.

³¹ K'ari' ri Eliseo xtzolin rik'in ri ixoq. Y ri Guehazí xik'o yan el chikiwech, y xberuya' ri ruch'ame'y ri Eliseo chupalej ri ak'ual. Jak'a ri ak'ual man niq'ajan ta pe, ni man xuna' ta ruwech. Y keri' ri Guehazí xtzolin richin xberuk'ulu' ri Eliseo pa bey, y xubij chire chi ri ak'ual man runa'on ta ruwech.

³² Y toq ri Eliseo xapon chiri' pa rachoch ri ixoq, ri ak'ual kamineq chik y li'an pa ruwi' ri ruch'at rija'.

³³ Ri Eliseo xok k'a apo chupan ri ti jay, xutz'apej k'a pe ri ruchi' y xch'on rik'in ri Jehová.

³⁴ K'ari' xjote-q'anej pa ch'at y xjupe-qa pa ruwi' ri ak'ual. Xuya' ri ruchi' pa ruwi' ri ruchi' ri ak'ual, y ri runaq'-ruwech pa ruwi' ri runaq'-ruwech, y ri ruq'a' xuya' pa ruwi' ri ruq'a'; y keri' xjupe-qa pa ruwi'. K'ari' ri ruch'akul ri ak'ual xbemeq'e-pe.

³⁵ K'ari' ri Eliseo xyakatej k'a pe pa ruwi' ri ak'ual, xqaqa-pe chupan ri ch'at y xbiyaj chupan ri ti jay ri'. Chirij ri' xjote' chik q'anej pa ch'at rik'in ri ak'ual y xjupe' chik jun bey pa ruwi'. K'ari' ri ak'ual xat'ixem wuqu' mul, y xuna' ruwech.

³⁶ K'ari' ri Eliseo xroyoj ri Guehazí, y xubij chire chi troyoj ri ixoq. Y rija' xroyoj. Y toq ri ixoq xapon chuchi' ri jay, ri Eliseo xubij chire: Ja ti awal re'; tak'uaj-el, xcha'.

³⁷ Xeri' xok-apo ri ixoq pa jay, y xxuke-qa y xuqasaj-ri' k'a pan ulew chuwech ri Eliseo; y k'ari' xuchop-apo ri ti ral y xel-pe, ruk'amon-pe ri ti ral.

Ri nimalej rubanobal ri Dios pa kiwi' ri e q'alajirisey ruch'abel

³⁸ Chirij ronojel re', ri Eliseo xtzolin pa Guilgal, y chiri' janila wayjal k'o. Y ri e q'alajirisey ruch'abel ri Dios e tz'uyul k'a apo rik'in rija'. Ri Eliseo xubij k'a chire ri rusamajel: Taya-qa jun bojo'y nim pa ruwi' q'aq', y tabana' kiq'utun ri e q'alajirisey ruch'abel ri Dios, xcha'.

³⁹ K'ari' jun chike rije' xbe pa juyu' richin xberukanoj ichaj. Y xa xril k'a ruwech jun q'ayis ri man tijel ta. Y xunojisaj k'a pe ri rutziaq rik'in ri ruwech ri q'ayis ri'. Y xtzolin k'a; xuk'ajij k'a ri ruwech q'ayis, y xuya-qa chupan ri bojo'y.

⁴⁰ Toq xchaq'aj yan, xujech-apo ri q'utun richin yewa' ri achi'a'. Jak'a toq yewa' chik, rije' xkireq kichi' y xkibij: ¡Achin richin ri Dios; re q'utun re' xa nikamisan!, xecha'. Y roma ri' kan man xkitej ta.

⁴¹ K'ari' ri Eliseo xuk'utuj juba' k'ej, y xuchipipej-qa chupan ri bojo'y. Y k'ari' xubij chi tijach ri kiq'utun. Y konojel k'a ri e q'alajirisey ruch'abel ri Dios xewa', roma ri q'utun xa xban yan raq'omal, y kan utz chik richin nitij.

⁴² K'o k'a jun q'ij xapon rik'in ri Eliseo jun achin aj-Baal-salisá; y re achin re' ruk'uan-apo chire ri Eliseo juwineq kaxlan-wey ri banon rik'in ri nabey taq ruwech cebada, y chuqa' kan ruk'uan k'a apo juba' trigo ri k'a k'o pa rij. Y ri Eliseo xubij chire ri rusamajel chi tuya' ri kaxlan-wey ri' chikiwech ri winaqi' richin yewa'.

⁴³ Y ri rusamajel xubij: Re juba' kaxlan-wey re' man nuben ta chi yentzuq re e wok'al achi'a' re ek'o wawe', xcha'. Jak'a ri Eliseo xubij chik jun bey chire: Taya' kiway ri winaqi' richin yewa', roma ri Jehová nubij chi kan xkewa' jebel y kan k'a k'o na xtikolotej kan, xcha'.

⁴⁴ K'ari' ri samajel xuya-apo ri kaxlan-wey chikiwech ri e q'alajirisey ruch'abel ri Dios richin xewa', y kan k'a k'o na wi ri xkolotej kan, achi'el xubij ri Jehová.