2 Rey 3 - Kaqchiquel Bible

Ri Joram xuq'et-tzij pan Israel

¹ Chupan k'a ri juna' waqxaqlajuj chire ri q'atbel-tzij richin ri Josafat rey richin Judá, jari' toq xuchop niq'aton-tzij ri Joram, ruk'ajol ri Acab; y xuq'et-tzij kablajuj juna' pa ruwi' ri ruwach'ulew Israel ri chiri' pa tinamit Samaria.

² Y xuben k'a ri man utz ta chuwech ri Jehová stape' man xuq'i' ta ri kibanobal ri rute-rutata'; roma xrelesaj-el ri paban-abej richin ri Baal, ri rubanon kan ri Acab ri rutata'.

³ Man rik'in ri', xa kan xmakun achi'el xuben ri Jeroboam ruk'ajol ri Nabat, y xuben chire ri tinamit Israel chi xmakun, y kan man xuya' ta kan ri mak ri'.

Toq ri Eliseo xuq'alajirisaj ri ch'akonik pa ruwi' ri Moab

⁴ Ri rey richin ri ruwach'ulew Moab rubini'an Mesá; rija' rajaw jun nimalej tzobaj awej, y kan nutoj ri k'o chi nitoj chire ri rey richin Israel. Ronojel juna' nuya' 100,000 alaji' taq karne'l y ri kisumal e 100,000 achija' karne'l.

⁵ Jak'a toq xken ri Acab, ri Mesá xupaba-ri' chuwech ri rey richin ri ruwach'ulew Israel.

⁶ Roma ri' ri rey Joram xel-pe chiri' pa tinamit Samaria richin xerumol konojel ri aj-labal chupan chijun ruwach'ulew Israel.

⁷ Y chuqa' xuteq rubixik chire ri Josafat rey richin Judá, y xubij-el chire chi ri rey richin Moab xupaba-ri' chuwech. Roma ri' nuk'utuj utzil chire ri rey richin Judá chi nibe ta chirij richin nibekibana' oyowal rik'in ri tinamit Moab. Y ri Josafat xubij-el chi kan nibe-wi y yeruk'uaj-el ri e aj-labal y ri rukiej.

⁸ Y ri Josafat chuqa' xuk'utuj ri achike bey xkebe-wi. Y ri Joram rubin-el chi yebe chupan ri bey ri nibe pa tz'iran ruwach'ulew richin ri Edom.

⁹ Xe'el k'a el ri rey richin Israel, ri rey richin Judá y chuqa' xkachibilaj-el ri rey richin ri ruwach'ulew Edom. Ri bey ri napon pa Moab kan man choj ta k'a, y roma ri' xebiyin ri pa tz'iran ruwach'ulew wuqu' q'ij. Y roma ri' kan xk'is k'a ri kiya' ri aj-labal y keri' chuqa' ri kiya' ri chikopi' ri e kik'uan-el.

¹⁰ K'ari' ri Joram xubij: Ri Jehová xa xojruk'en-pe choj oxi' roj richin yojrujech pa kiq'a' ri aj-Moab, xcha'.

¹¹ Jak'a ri Josafat xubij: ¿Maneq kami wawe' jun q'alajirisey ruch'abel ri Jehová, richin niqak'ulubej, y ja rija' ri xtiq'axan ri qatzij?, xcha'. Y jun k'a chike ri aj-raqen rik'in ri Joram xubij chi chiri' k'o ri Eliseo, ruk'ajol ri Savat, ri xto'on richin ri Elías.

¹² Y ri Josafat xubij: Rija' xtubij chiqe ri achike nubij ri Jehová, xcha'. Y ri Josafat rey richin Israel, y ri rey richin Edom xebe-qa rik'in ri Eliseo.

¹³ K'ari' ri Eliseo xubij chire ri rey richin Israel: ¿Achike roma wik'in yin xape-wi? Ke'abek'ulubej ri e q'alajirisey ruch'abel ri ki-dios kan ri ate-atata', xcha' Y ri Joram xubij chire: Ni; roj oj peteneq awik'in rat q'alajirisey ruch'abel ri Jehová, roma ja rija' ri xoyon qichin re oj oxi' rey richin yojrujech pa ruq'a' ri tinamit Moab, xcha'.

¹⁴ K'ari' ri Eliseo xubij: Kan k'es-wi ri Jehová ri k'iytisanel richin ronojel, ri achoq chuwech ink'o-wi: Xa roma k'a peteneq ri Josafat iwik'in, roma ri' yich'on-el iwik'in. Wi man ta peteneq rija', man ta yatinwak'axaj, ni man ta nintzu-el awech, rat rey Joram.

¹⁵ Wakami k'a tak'ama-pe jun achin ri niq'ojoman, xcha' chire. Y toq k'o chik chiri' ri achin y xuchop niq'ojoman, jari' toq ri uchuq'a' richin ri Jehová xuteq-pe pa ruwi' ri Eliseo.

¹⁶ Xch'on k'a ri Eliseo y xubij: Kere' rubin-pe ri Jehová: Ke'ibanala' k'a k'iy jul rubey taq ya' chukojol re nima'q taq juyu'.

¹⁷ Stape' kan man xtipe ta jun nimalej kaq'iq'; Stape' man xtipe ta ri job; Jak'a ri jul ri xtiben pa taq'aj kojol juyu', kan xkenoj k'a chi ya'. Kan xkixuk'ya' k'a rix; Kan xke'uk'ya' chuqa' ri iwawej y ri chikopi' ri ek'o iwik'in e richin ejqa'n.

¹⁸ Y re' kan ti juba' ok chire ronojel ri nuben ri Jehová; Pa ruwi' re' rija' kan xkerujech k'a pan iq'a' ri aj-Moab.

¹⁹ Rix kan xke'iwulaj k'a ronojel ri nima'q taq kitinamit ri tz'apen kij chi tz'aq; Xke'iwulaj k'a ronojel ri tinamit ri janila kejqalen; Xke'ichoy k'a ronojel ri jebelej taq che' ri ek'o kik'in; Xke'itz'apej k'a ronojel ri ralaxbel taq ya'; Y xtinojisaj chik k'a kan chi abej ri qasanbel taq kulew.

²⁰ Ri ruka'n q'ij, toq nisuj ri kamelabel richin nimaq'a' pa Jerusalem, ¡Jari' toq xebek'ulun-pe ya' pa taq bey chiri' pan Edom, y ronojel ri taq'aj kojol juyu' kan xenoj chi ya'!

²¹ Y konojel ri aj-Moab kan kak'axan chik chi ri e oxi' tzobaj winaqi' xe'apon richin nibekibana' oyowal kik'in rije'. Roma ri' xekoyoj konojel achi'a'; chi alaboni', chi rijita'q y ri ch'aqa' chik achi'a' richin nikiben oyowal. Y xebek'oje' k'a chiri' pa k'ulba't richin ri Edom.

²² Toq ri aj-Moab xeyakatej ri nimaq'a', xkitz'et chi ri q'ij nich'ich'an pa ruwi' ri ya', y xkitz'et k'a chi ri ya' keq-keq nitzu'un achi'el kik'.

²³ Roma ri' xkibij: ¡Titz'eta' la kik'. La' kikik'el ri e rey. Jujik, xa xkikamisala-qa-ki' chikiwech rije' chi espada. Wakami k'a, jo'; tiqamaja' chikiwech ri e etzelanel qichin ronojel ri k'o rejqalen, xecha'.

²⁴ Jak'a toq xe'apon-qa ri akuchi ek'o-wi-qa ri israelita, jari' toq xebeyakatej-pe chikij ri aj-Moab y xekikamisaj e k'iy. Y ek'o k'a ri xe'animej chikiwech. Y ri israelita kan xekitzeqelibej y xekikamisaj.

²⁵ Chirij ri' ri israelita xekiwulaj k'a ri kitinamit ri aj-Moab. Y chikijujunal xkik'aqala' jujun abej chupan ri qasanbel taq ulew ri ek'o akuchi yeq'ax-wi. Y keri' xekinojisaj chi abej ronojel ri qasanbel taq ulew. Chuqa' xekitz'apej ronojel ri ralaxbel taq ya', y xekichoy ri che' ri jebel yewachin. Keri' xkiben, k'a toq xaxe chik ri tinamit Quir-haréset ri pa'el kan. Jak'a ri yek'aqon ikeq' chikikojol ri israelita, xa xkisutij-rij y xkik'eq chi abej.

²⁶ Y toq ri rey richin Moab xutz'et chi xch'akatej yan, jari' toq xeruk'uaj-el e 700 aj-labal ri kan yetikir nikiben oyowal rik'in espada, y xbekibana' oyowal rik'in ri rey richin ri ruwach'ulew Edom. Jak'a xa man xetikir ta.

²⁷ K'ari' xuchop ri nimalaxel ruk'ajol ri kan k'o chi nik'oje' kan pa ruk'exel richin nuq'et-tzij, y xusuj richin kamelabel. Xuporoj k'a pa ruwi' ri tz'aq. Y re' xuyek k'a koyowal ri israelita, y roma ri' xe'el-el chiri' y xetzolin pa kiruwach'ulew.