2 Rey 2 - Kaqchiquel Bible

Toq ri Elías xbe chikaj

¹ Chirij k'a ronojel re', ri Elías rachibilan ri Eliseo e peteneq chupan ri bey ri nipe pa tinamit Guilgal. Y kan xnaqajub yan k'a pe ri q'ij toq ri Jehová xtuk'uaj-el ri Elías chila' chikaj, pa jun surkum.*f1*

² Y ri Elías xubij chire ri Eliseo: Wakami kakanej kan wawe', roma ri Jehová yiruteq pa tinamit Betel, xcha'. Y ri Eliseo xujikiba' rutzij chire ri Elías chi kan chuwech ri Jehová y chuwech ri Elías nubij chi kan man xtuya' ta kan. Y k'ari' xebe junan k'a pa Betel.

³ Y chiri' pa tinamit Betel ek'o k'a ri e q'alajirisey ruch'abel ri Dios. Y rije' xbekik'ulu' ri Eliseo y xkibij chire: ¿Awetaman chi ri Jehová xtrelesaj-el ri awajaw chawech chupan re q'ij re'?, xecha'. Y rija' xubij: Ja' wetaman chik. Man jun chik tibij, xcha' chike.

⁴ Y ri Elías xubij chik jun bey chire ri Eliseo: Wakami kakanej kan wawe', roma ri Jehová yiruteq pa tinamit Jericó, xcha'. Y ri Eliseo xujikiba' rutzij chire ri Elías chi kan chuwech ri Jehová y chuwech ri Elías nubij chi kan man xtuya' ta kan. Y xebe k'a junan pa Jericó.

⁵ Y chiri' pa tinamit Jericó ek'o k'a jun chik tzobaj e q'alajirisey ruch'abel ri Dios. Y rije' xbekik'ulu' ri Eliseo y xkibij chire: ¿Awetaman chi ri Jehová xtrelesaj-el ri awajaw chawech chupan re q'ij re'?, xecha'. Y rija' xubij: Ja, wetaman chik. Man jun chik tibij, xcha'.

⁶ Y ri Elías xubij chire: Nink'utuj utzil chawe chi kak'oje' kan wawe', roma ri Jehová yiruteq richin yibe pa raqen-ya' Jordán, xcha'. Y ri Eliseo xujikiba' rutzij chire ri Elías chi kan chuwech ri Jehová y chuwech ri Elías nubij chi kan man xtuya' ta kan. Y junan k'a xebe chi e ka'i'.

⁷ Y e kitzeqeliben k'a e kawineq lajuj chike ri e q'alajirisey ruch'abel ri Dios, y rije' xepa'e' kan nej chike ri Elías y ri Eliseo ri ek'o chunaqaj ri raqen-ya' Jordán.

⁸ K'ari' ri Elías xuchop ri ko'ol raqen rutziaq y xubolqotij. Y rik'in ri' xukajij ri ya'. Y ri ya' ri' xch'aratej pa ka'i', y xeq'ax-el pa chaqi'j ri juk'an chik ruchi' ri ya'.

⁹ Toq xeq'ax yan k'a, ri Elías xubij chire ri Eliseo: Tak'utuj ri achike nawajo' chi ninben awik'in, rokik k'a ink'o awik'in, xcha'. Y ri Eliseo xuk'utuj utzil chire chi tuya' kan chire ka'i' mul ri uchuq'a' ri chiri' chikiwech konojel ri ch'aqa' chik ri xetzeqeliben richin ri Elías, richin chi rija' nok kan aj-raqen.

¹⁰ Y ri Elías xubij: Kan janila k'ayew ri xak'utuj chuwe. Jak'a wi rat xkinatz'et-el toq xkibe, keri' xtibanatej awik'in; y wi man xkinatz'et ta el, kan man xtibanatej ta k'a ri nawajo', xcha'.

¹¹ Y toq rije' yetzijon e beneq pa bey, chaq k'ate' xok'ulun jun carruaje qiriren-pe koma kiej, y ri kiej y ri carruaje kan pa ruxaq q'aq' k'a e peteneq-wi. Y re' kan xeruch'er k'a ri Elías y ri Eliseo, y ri Elías xuk'uex k'a el chikaj pa jun surkum.

Ri Eliseo xk'oje' kan pa ruk'exel ri Elías

¹² Y toq ri Eliseo xutz'et keri', xsik'in y xubij: ¡Nata' yin, nata' yin, ri Jehová kan rubanon k'a chawe chi kan at jun nimalej to'onel y aj-labal richin ri tinamit Israel, xcha'. Y keri' kan man jun bey chik k'a xutz'et ruwech ri Elías. Chirij ri', ri Eliseo xuchop k'a ri rutziaq ri rukusan, y xuretz pa ka'i'.

¹³ Chuqa' xusik'-el ri ko'ol raqen rutziaq ri Elías, ri xutzeq kan toq xbe, y keri' xtzolin chuchi' ri raqen-ya' Jordán, y chiri' xpa'e-wi.

¹⁴ Y rik'in ri tzieq ri', ri Eliseo xukajij ri ya' achi'el xuben ri Elías toq xeq'ax-apo, y xubij: ¿Akuchi k'o-wi ri uchuq'a' ri xuya' ri Jehová chire ri Elías?, xcha'. Y ri ya' ri' kan xch'aratej chik pa nik'aj, y keri' ri Eliseo xq'ax-apo ri juk'an chik ruchi' ri raqen-ya'.

¹⁵ Y toq k'o chik chiri', ri tzobaj e q'alajirisey ruch'abel ri Dios ri aj-Jericó, xkibij-qa: Ri Eliseo xk'oje' kan pa ruk'exel ri Elías, xecha'. Y xbekik'ulu' y xexuke-qa chuwech.

¹⁶ Y xkibij chire: Wawe' ojk'o oj kawineq lajuj achi'a' ri k'o quchuq'a'; taya' q'ij chiqe richin nibeqakanoj ri qajaw. Rik'in juba' ri Jehová xuk'uaj-el, y xberuya' pa jun juyu' o pa jun taq'aj, xecha' chire. Y ri Eliseo xubij chike chi man tikiben keri'.

¹⁷ Man rik'in ri', kan xkitej kiq'ij chirij chi yebe, y roma ri' xubij chike chi kebe. K'ari' ri e kawineq lajuj achi'a' ri' xbekikanoj ri Elías, y oxi' k'a q'ij xkikanoj y man xkil ta.

¹⁸ Y toq xetzolin rik'in ri Eliseo, chiri' pa Jericó, rija' xubij chike: ¡Yin kan xinbij chiwe chi man kixbe!, xcha'.

Ri nabey taq rusamaj ri Eliseo

¹⁹ Y ri achi'a' richin ri tinamit Jericó xkibij chire ri Eliseo: Re wawe' ri akuchi k'o-wi re tinamit yalan utz, achi'el natz'et rat; jak'a ri ya' janila itzel, y ri ulew man niwachin ta, xecha'.

²⁰ K'ari' rija' xubij: Tik'ama-pe chuwe jun xára k'ak'a' ri nojineq chi atz'an, xcha' ri Eliseo. Y rije' xkik'en k'a pe chire.

²¹ Y xbe k'a rija' chuchi' ri ralaxbel-ya'; y xujopij-qa ri atz'an chupan, y xubij: Kere' rubin ri Jehová: Yin ninwaq'omaj re ralaxbel-ya' re'. Man chik jun xtiken roma re ya' re'; keri' chuqa' ri ulew kan xtiwachin, xcha'.

²² Y ri ya' ri' kan xaq'omatej; k'a re wakami, achi'el xubij ri Eliseo.

²³ K'ari' xbe pa Betel; y toq jotol-el pa bey, xe'el-pe alaboni' pa tinamit, y yetze'en chirij y nikibij: ¡Wakami kabiyin chik k'a el rat tz'anet rujolon achin! Kabiyin chik k'a el rat tz'anet rujolon achin! yecha'.

²⁴ Y ri Eliseo xtzu'un k'a kan chirij y xerutz'et, y kan xuya' etzelanik pa kiwi' pa rubi' ri Jehová. Y xe'el k'a pe ka'i' ixoq taq oso chikij, y xekik'is e kawineq ka'i' chike rije'.

²⁵ K'ari' ri Eliseo xbe pa ruwi' ri juyu' Carmelo, y chirij ri' xtzolej pa tinamit Samaria.