2 Rey 18 - Kaqchiquel Bible

Ri q'atbel-tzij richin ri Ezequías

¹ Toq k'a k'es na ri Oseas ruk'ajol ri Elá rey richin Israel, chupan ri rox juna' richin ri ruq'atbal-tzij, jari' toq xok kan rey ri Ezequías ruk'ajol ri Acaz.

² Ri Ezequías xok rey toq k'o juwineq wo'o' rujuna', y juwineq beleje' juna' ri xuq'et-tzij pa ruwach'ulew Judá chiri' pa Jerusalem. Ri rute' rubini'an Abí rumi'al ri Zacarías.

³ Y ri Ezequías kan utz k'a xuben chuwech ri Jehová achi'el xuben ri rey David, ri ruxikin-rumama'.

⁴ Rija' xrelesaj k'a ri akuchi nikiya-wi kiq'ij wachibel pa ruwi' taq juyu'. Xerupaxij ri dios ri e banon rik'in abej y xuqupij-el ri paban-che' richin ri Asera. Chuqa' xuwulaj ri kumetz ri banon rik'in q'enq'oj-pueq ri chuqa' xkibij Nehustán*f7* chire. Ri winaqi' kan nikiya-wi k'a ruq'ij ri kumetz y kan nikiporoj pom chuwech.

⁵ Kan rik'in k'a ri Jehová Dios richin Israel xukuquba-wi ruk'u'x, y ja rija' ri más utz chikikojol konojel ri rey richin ruwach'ulew Judá ri xeq'ax yan y ri xkepe chirij rija',

⁶ roma rija' kan xutzeqelibej ri Jehová, y kan man xuch'er ta kan ri' rik'in. Xa kan xutaqej ronojel ri pixa' ri xuya' ri Jehová chire ri Moisés.

⁷ Ri Jehová kan xk'oje' k'a rik'in rija', y xabakuchi nibe-wi richin nuben oyowal, kan utz k'a nel chuwech ronojel ri nuben. Y kan xyakatej k'a chirij ri rey richin Asiria y kan man xrilij ta ri rey ri'.

⁸ Rija' xeruch'ek k'a ri aj-Filistea y xapon k'a pa tinamit Gaza. Xuchop-pe kik'in ri kokoj tinamit y xapon k'a kik'in ri nima'q taq tinamit.

Toq xch'akatej ri Samaria

⁹ Chupan ri ruwuq juna' chire ri q'atbel-tzij richin ri Oseas ruk'ajol ri Elá, rey richin Israel, ri Salmanasar rey richin Asiria xyakatej-pe chirij ri tinamit Samaria y xorusutij-rij chi oyowal. Re' xbanatej chupan ri rukaj juna' toq niq'aton-tzij ri Ezequías ri chiri' pa Judá.

¹⁰ Rije' xkiben k'a oyowal oxi' juna' chiri' pa Samaria, y kan xech'akon k'a chirij. Re' xbanatej chupan ri juna' beleje' toq niq'aton-tzij ri Oseas rey richin Israel, y chupan ri ruwaq juna' richin ri q'atbel-tzij richin ri Ezequías.

¹¹ Y ri Salmanasar xeruk'uaj-el ri winaqi' israelita pa ruwach'ulew Asiria. Xeruya' k'a pa tinamit Halah, chiri' pa raqen-ya' Habor ri k'o chuchi' ri ruwach'ulew Gozán y chupan ri kiruwach'ulew ri aj-Media.

¹² Rije' xkik'uluwachij keri' roma kan man xkinimaj ta rutzij ri Jehová ri ki-Dios. Xa kan xkiq'ej k'a ri rujikibel-tzij. Ronojel ri rubin ri Moisés ri rusamajel, rije' man xkak'axaj ta k'a ni man xkiben ta.

Toq ri aj-Asiria xeyakatej chirij ri Jerusalem

¹³ Chirij ri', chupan k'a ri juna' kajlajuj chire ri q'atbel-tzij richin ri Ezequías, ri Senaquerib rey richin Asiria y ri aj-labal xekichop k'a chi oyowal ri ruwach'ulew Judá, y xekich'ek konojel tinamit ri e tz'apen-kij chi tz'aq.

¹⁴ Roma ri' ri Ezequías xuteq rubixik chire ri Senaquerib ri k'o chiri' pa tinamit Laquis, y kere' rubin-el chire: Yin wetaman chi ximakun chawech. Roma ri' katel-el re wawe' y xtintoj janipe' ri xtak'utuj chuwe, xcha-el. Y rik'in ri xubij-pe ri rey richin Asiria, ri Ezequías rey richin Judá xuya-el 220 quintal saqipueq y juwineq quintal q'anapueq.

¹⁵ Keri' ri Ezequías xuya' k'a ronojel ri saqipueq y ri q'anapueq ri xril chupan ri rachoch ri Jehová y ri k'o chupan ri beyomel ri k'o chiri' chupan ri rachoch rija'.

¹⁶ K'ari' ri Ezequías xrelesaj-el ri ruchi' ri rachoch ri Jehová y ri ru-marko ri kan ja rija' yoyon q'anapueq chirij, y xuya-el chire ri Senaquerib.

¹⁷ Chiri' pa tinamit Laquis akuchi-k'o-wi ri Senaquerib, ek'o chuqa' e oxi' aj-raqen pa kiwi' konojel ri aj-labal. Y ri Senaquerib xeruteq-el re oxi' aj-raqen re' e kachibilan-el e k'iy aj-labal, richin xe'apon pa Jerusalem akuchi-k'o-wi ri rey Ezequías. Toq xe'apon pa Jerusalem, xek'oje' k'a qa chunaqaj ri yakbel-ya' ri k'o-q'anej pa jotol, ri k'o pa bey ri akuchi yeban-wi tzieq.

¹⁸ K'ari' rije' xesik'in chirij ri Ezequías. Y e oxi' aj-raqen richin ri Ezequías xe'el richin xokik'ulu-ki' kik'in ri aj-raqen richin ri Senaquerib. Y rije' kibini'an; Eliaquim, ruk'ajol ri Hilquías, aj-raqen pa ruwi' ri rachoch ri rey; ri Sebná aj-tz'ib; y ri Joah ruk'ajol ri Asaf, ri nipixaban richin ri rey.

¹⁹ K'ari' ri aj-raqen richin ri Senaquerib xech'on pa kich'abel ri aj-Jerusalem y xkibij chike ri e oxi' aj-raqen: Tibij k'a chire ri Ezequías: Jare' ri rubin-pe ri nimalej rey richin Asiria: ¿Achike roma janila akuquban ak'u'x?

²⁰ Rat xa e maneq e k'iy aj-labal awik'in. ¿Nach'ob rat chi xaxe rik'in ri ach'abel yojach'ek? ¿Achoq ik'in k'a akuquban ak'u'x roma xayakatej chuwij yin?

²¹ Yin ninch'ob chi xa kik'in ri aj-Egipto akuquban-wi ak'u'x, y rije' xa man xketikir ta xkatkito', y rix xa xkixsokotej kan. Roma rije' xa e achi'el jun aj paxineq ri xa nuteq'uj pa ruq'a' ri nichapo richin, jak'a xa nusok-ri'.

²² Y wi rix nibij chuwe chi k'o nimabel-ik'u'x rik'in ri Jehová ri i-Dios, ¿man xrelesaj ta kami ri Ezequías ri akuchi niya'ox-wi ruq'ij ri Dios y akuchi nisuj kamelabel chuwech Rija', y xubij chi ri winaqi' aj-Judá y aj-Jerusalem nikiya' ruq'ij ri Dios xaxe pa ruwi' ri porobel ri k'o pa Jerusalem?

²³ Yin xtinben k'a jun jikibel-tzij awik'in rat pa rubi' ri nu-rey: Yin xtinya' 2,000 kiej chawe, wi rat ye'awil 2,000 achi'a' yech'oke' chirij kiej.

²⁴ Rat ni man yatikir ta naben chire chi nanimej ri aj-raqen ri más maneq rejqalen chikikojol ri aj-labal richin ri nu-rey. ¿Y nawoyobej na chi ri aj-Egipto yekiteq-pe carruaje richin oyowal, y achi'a' ri yech'oke' chirij kiej?

²⁵ ¿Rat nach'ob chi yin xipe richin nonbana' oyowal y nonk'isa' re jun ruwach'ulew re' y man jun xubij-pe ri Jehová Dios chuwe? Ri Jehová xubij chuwe chi yijote-pe chupan re ruwach'ulew re' y yenk'is kan, xcha'.

²⁶ K'ari' ri Eliaquim, ri Sebná y ri Joah xkibij k'a chike ri aj-raqen ri': Tibana' utzil, kixch'on qik'in pa ch'abel arameo, roma roj niq'ax chiqawech ri ch'abel ri'. Man kixch'on qik'in pa qach'abel, richin chi konojel winaqi' ri ek'o chiri' pa ruwi' ri tz'aq man niq'ax ta chikiwech, xecha'.

²⁷ Jak'a jun chike ri aj-Asiria xubij: Roj man oj peteneq ta richin xaxe yojch'on iwik'in rix; xa kan chike chuqa' ri winaqi' ri ek'o pa ruwi' la tz'aq. Roma k'o k'a jun q'ij toq iwonojel rix xtitej ri nipamaj y xtiqum ri chulaj, xcha'.

²⁸ K'ari' ri aj-raqen ri' xpa'e-q'anej y rik'in ronojel ruchuq'a' xch'on pa kich'abel hebreo y xubij chike: Tiwak'axaj k'a ri nubij ri nimalej rey richin Asiria:

²⁹ Man kixq'olotej, roma ri Ezequías. Rija' man xtitikir ta xkixrukol pa nuq'a'.

³⁰ Man nikuquba' ik'u'x rik'in ri Jehová toq ri Ezequías nubij chiwe chi ri Jehová kan xkixrukol, y chuqa' chi ri itinamit man xtijach ta pa nuq'a', nicha' ri rey richin Asiria.

³¹ Man k'a tinimaj rutzij ri Ezequías. Jak'a wi xtinimaj rutzij ri rey richin Asiria y xtijech-iwi', rija' kan xtuya' q'ij chiwe richin chi'ijujunal xkixtikir xtitej ruwech ri itiko'n, ri ruwech ri i-uva, ri ruwech ri iwíkix y kan xtiqum chuqa' ya' ri niwelesaj chupan ri i-pozo.

³² K'ari' rija' xkixruk'uaj-el pa jun chik ruwach'ulew ri junan rik'in ri iruwach'ulew rix. Y chiri' xkixtikir xtitik-qa jalajoj ruwech ixin y ri uva. Chiri' xtiben kaxlan-wey y vino. Ri ruwach'ulew ri' xtuya' aceite richin olivo, kab ri nikiya' ri taq chikopi'. Y keri' rix man xkixken ta, jak'a xa kan xkixk'ase' kan. Jak'a man tiwak'axaj ri nubij ri Ezequías roma rija' xa yixruq'ol toq nubij chi ri Jehová xkixrukol.

³³ Roj kan e qach'akon k'iy ruwach'ulew. ¿K'o kami jun chike ri ki-dios kichin ri winaqi' ri' ri tikirineq ta rukolon ri ruwach'ulew chiqawech?

³⁴ ¿Akuchi k'o-wi ri dios richin ri ruwach'ulew Hamat y ri Arpad? ¿Akuchi k'o-wi ri dios richin ri ruwach'ulew Sefarvaim, ri Hená y ri Ivá? ¿Xetikir kami xkikol ri Samaria pa qaq'a'?

³⁵ ¿Achike ta k'a chike konojel re dios kichin re ruwach'ulew re' tikirineq ta rukolon ri ruwach'ulew pa ruq'a' ri rey richin Asiria, richin chi ri Jehová nukol ri tinamit Jerusalem pa ruq'a'?, xcha'.

^36-37 Jak'a ri Eliaquim, ri Sebná y ri Joah man jun xkibij; roma ri rey Ezequías kan keri' rubin-el chike. K'ari' rije' xkiretz k'a ri kitziaq chikij y xebe chutz'etik ri rey Ezequías richin xbekitzijoj chire ri xubij ri aj-raqen aj-Asiria.