2 Rey 16 - Kaqchiquel Bible

Ri Acaz xuq'et-tzij pa Judá

¹ Toq k'a k'es na ri Pécah, y chupan ri juna' wuqlajuj chire ri ruq'atbal-tzij, jari' toq xok kan rey ri Acaz ruk'ajol ri Jotam rey richin Judá.

² K'o k'a juwineq rujuna' toq xok kan rey, y xuq'et-tzij waqlajuj juna' pa ruwi' ri Judá. Y rija' kan man xuben ta k'a ri utzilej taq banobel chuwech ri Jehová. Kan man xuben ta k'a achi'el xkiben ri ch'aqa' chik e rijatzul kan ri David.

³ Rija' xa xuben k'a achi'el xkiben ri rey richin Israel. Kan xusuj k'a ri ruk'ajol richin kamelabel, achi'el ri itzel taq banobel kichin ri tzobaj winaqi' ri kan ek'o chiri'. Y roma ri', ri Jehová xerelesaj-el chikikojol ri israelita.

⁴ Keri' chuqa' xusuj kamelabel, y xuporoj pom chiri' ri akuchi nikiya' kiq'ij ri wachibel pa ruwi' ronojel taq juyu', y chuxe' ronojel taq che' ri janila ruxaq.

⁵ K'ari' ri Resín rey richin Siria y ri Pécah ruk'ajol ri Remalías rey richin Israel, xejote-el pa Jerusalem richin xbekibana-q'anej oyowal. Xkisutij-rij ri tinamit richin nikich'ek, jak'a xa man xetikir ta.

⁶ Chupan ri q'ij ri' ri Resín xtikir xuch'ek chik kan ri tinamit Elat, y xerelesaj k'a el chiri' ri winaqi' aj-Judá. Chirij re' ri aj-Edom xe'apon k'a chiri' pan Elat y kan xek'oje' k'a chiri' k'a re wakami.

⁷ K'ari' ri Acaz xeruteq k'a el rusamajela' rik'in ri Pul rey richin Asiria, richin xubij-el chire: Yin kan in asamajel y kan achi'el jun chike ri ak'ajol. Katanpe k'a, y kinakolo-el pa ruq'a' ri rey richin Siria, y chuqa' pa ruq'a' ri rey richin Israel, ri kan e yakatajineq chuwij, xcha-el.

⁸ Y ri Acaz kan xuk'uaj k'a el ronojel ri saqipueq y ri q'anapueq ri k'o chiri' chupan ri rachoch ri Jehová y chuqa' ri k'o chupan ri yakonabel ri chiri' pa rachoch rija'. Y xuteq k'a el re sipanik re' chire ri Pul.

⁹ Y rija' kan xrak'axaj k'a ri xbix chire, y kan xyakatej k'a chirij ri tinamit Damasco. Kan xuch'ek y kan xeruk'uaj k'a el ri winaqi' pa tinamit Quir. Chuqa' xukamisaj k'a kan ri Resín.

¹⁰ K'ari' ri rey Acaz xbe rik'in ri Pul chiri' pa Damasco. Y chiri' ri Acaz xutz'et jun porobel richin kamelabel. Jari' toq xuteq-el jun ruwachibel ri porobel ri' chire ri sacerdote Urías ri k'o pa Judá, richin kan keri' rubanik niban chire.

¹¹ Y ri sacerdote Urías xupaba-q'anej ri porobel ri', achi'el ri wachibel ri xuteq-el ri Acaz, rokik rija' nitzolin-pe pa Damasco.

¹² Y toq ri Acaz xapon pa Judá, rija' xberutz'eta' ri porobel y kan jari' xukusaj richin xusuj kamelabel pa ruwi'.

¹³ Kan jari' k'a xusuj ri chikop ri niporox chijun y ri sipanik richin jalajoj ruwech ixin. Chuqa' kan xutix vino pa ruwi' y xuchikaj chuxikin ri porobel ri kikik'el ri chikopi' ri xusuj richin nuq'alajirisaj chi junan ruwech rik'in ri Dios.

¹⁴ Ri porobel ri' banon rik'in q'eqapueq, ri Acaz xrelesaj-el ri porobel ri k'o-pe chuwech ri rachoch ri Dios, y xuya-qa ri k'ak'a' porobel ri akuchi k'o-wi ri rubanon kan. Y ri nabey porobel xk'oje' kan pa xaman chire ri k'ak'a' porobel. Y rija' xk'oje' kan chukojol ri k'ak'a' porobel y ri rachoch ri Jehová.

¹⁵ K'ari' ri rey Acaz xuteq k'a el rubixik rik'in ri sacerdote Urías, y xubij-el chire chi pa ruwi' ri k'ak'a' porobel xtuporoj-wi ri chikop ri nisuj nimaq'a' y ri tiqaq'ij, chuqa' ri chikop ri nusuj ri rey, y ri nikisuj ri winaqi' y ri sipanik richin vino. Y ri kik' richin ri poron chikop nuchikaj pa ruwi' ri porobel. Jak'a ri porobel ri' kan k'o xaxe richin rija' richin nuk'ulubej ri achike nik'uluwachitej.

¹⁶ K'ari' ri Urías xuben k'a ronojel achi'el xubij ri rey Acaz chire.

¹⁷ Y kan xuchoy k'a ri ripireq ch'ich' ri ek'o pa taq ruxikin ri carretón richin yakbel-ya'. Chuqa' xerelesaj ri yakbel taq ya' ri'. Chuqa' xrelesaj ri nimalej yakbel-ya' ri k'o pa kiwi' ri wachibel bóyix ri e banon rik'in q'eqapueq, y k'ari' xuya' pa ruwi' ulew y xerutemej rik'in abej.

¹⁸ Keri' chuqa' xrelesaj-el ri ruwi-jay ri banon rik'in tzieq ri nik'atzin chupan ri q'ij richin uxlanen, ri k'o chuwech-pe ri rachoch ri Dios. Xrelesaj chuqa' ri ruchi-jay ri akuchi nel-nok ri rey. Xuben ronojel re' richin xkikot ri rey richin Asiria rik'in.

¹⁹ Ri ch'aqa' chik rubanobal ri Acaz kan tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Judá.

²⁰ Y toq xken, xmuq pa rutinamit kan ri rey David, ri akuchi e muqun-wi ri rute-rutata'. Y ri xq'aton kan tzij pa ruk'exel ja ri ruk'ajol rubini'an Ezequías.