2 Rey 14 - Kaqchiquel Bible

Ri q'atbel-tzij richin ri Amasías pa Judá

¹ Chupan ri ruka'n juna' chire ri q'atbel-tzij richin ri Joás ruk'ajol ri Joacaz, rey richin Israel, jari' toq xok kan rey ri Amasías ruk'ajol ri Joás rey richin Judá.

² Y ri Amasías k'o k'a juwineq wo'o' rujuna' toq xuchop nuq'et-tzij, y juwineq beleje' juna' xq'aton-tzij pa ruwi' ri ruwach'ulew Judá ri chiri' pa tinamit Jerusalem. Ri rute' rubini'an Joadán, aj-Jerusalem.

³ Ri Amasías kan janila choj xuben chuwech ri Jehová achi'el xuben ri David ri rumama', jak'a man xukuquba' ta ruk'u'x achi'el xuben rija'. Xa kan xuben chuqa' achi'el xuben ri Joás ri rutata'.

⁴ Roma ri' ri akuchi niya'ox-wi kiq'ij wachibel pa ruwi' taq juyu' man xe'elesex ta, y ri winaqi' k'a nikisuj na kamelabel chiri'. Chuqa' k'a nikiporoj na pom chiri'.

⁵ Toq ri Amasías jikil chik ri q'atbel-tzij pa ruq'a', xerukamisaj k'a ri samajela' ri xekamisan richin ri rutata'.

⁶ Jak'a man xerukamisaj ta k'a ri e kik'ajol rije'. Kan xuben achi'el ri tz'ibatel kan chupan ri pixa' ri xuya' ri Jehová chire ri Moisés, toq xubij chi man kekamisex ri te'ej-tata'aj koma ri alk'ualaxela', ni ri alk'ualaxela' koma ri te'ej-tata'aj. Xa kan chikijujunal xkeken chutojik ri kimak.

⁷ Chuqa' ri Amasías xerukamisaj e 10,000 aj-Edom chiri' kojol juyu' rubini'an Atz'an, y xuch'ek ri tinamit Selá. Y rija' xubij Jocteel chire ri tinamit ri', k'a re wakami.

⁸ K'ari' ri Amasías xuteq rutzijol rik'in ri Joás rey richin Israel, chi tikibana' oyowal.

⁹ Jak'a ri Joás xuteq rubixik chire ri Amasías, y xubij: Chiri' pa Líbano k'o jun ti q'ayis k'ix. Y xuteq rubixik chire ri nim tiox-che' chi tuya' ri rumi'al chire ri ruk'ajol ri k'ix richin nok rixjayil. Jak'a xe'ik'o nima'q taq chikopi' ri ek'o chiri', y xa xeq'ax-el pa ruwi' ri k'ix.

¹⁰ Kan qitzij na wi chi rat Amasías xe'ach'ek yan ri aj-Edom, y ri awánima kan animirisan y ayon rat aya'on-q'anej aq'ij. Xaxe kak'oje' k'a chiri' pan awachoch. ¿Achike roma naju-awi' pa jun ruk'ayewal, xaxe richin chi yabetzaq rat y ri aj-Judá chuqa'?, xcha' ri Joás rey richin Israel.

¹¹ Jak'a ri Amasías man xrak'axaj ta ri xbix chire, y roma ri' ri Joás xbe richin xberubana' oyowal rik'in ri Amasías, chiri' pa tinamit Bet-semes ri k'o pa ruwach'ulew Judá.

¹² Y ri ruwach'ulew Judá xch'akatej roma ri ruwach'ulew Israel, y roma ri' chikijujunal ri aj-Judá xkitaluj-el-ki' pa taq kachoch.

¹³ Y ri Joás rey richin Israel xuchop kan ri Amasías rey richin Judá chiri' pa Bet-semes. K'ari' xbe pa Jerusalem, y xuwulaj 107 jaj rik'in nik'aj chire ri tz'aq richin ri tinamit, nitiker-pe rik'in ri ruchi' ri tz'aq ri akuchi nibe-wi ri bey ri nibe pan Efraín y napon k'a rik'in ri ruchi' ri tz'aq ri k'o pa xaman.

¹⁴ Y xuk'en k'a pe ronojel ri q'anapueq, ri saqipueq y ronojel ri xkil-pe ri k'o chiri' pa rachoch ri Jehová, y ri k'o chiri' chupan ri yakonabel richin ri rey. Y chuqa' xeruk'uaj ka'i-oxi' winaqi', y xtzolin-pe pa Samaria.

¹⁵ Ronojel ri xuben ri Joás, chuqa' ri nimalej taq banobel ri xuben chupan ri labal ri xuben rik'in ri Amasías rey richin Judá, tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

¹⁶ Y toq xken ri Joás, xmuq pa Samaria junan kik'in ri rey richin Israel. K'ari' ri xk'oje' kan pa ruk'exel ja ri Jeroboam ri ruk'ajol.

¹⁷ Chirij ri rukamik ri Joás ri ruk'ajol ri Joacaz rey richin Israel, ri Amasías xk'ase' chik kan wolajuj juna'.

^18-20 Y k'o k'a jun q'ij xeyakatej k'a jujun achi'a' chirij ri Amasías chiri' pa Jerusalem, y roma ri' xanimej-el y xbe pa tinamit Laquis. Jak'a xa xkitzeqelibej-el, y chiri' xkikamisaj-wi. K'ari' xkik'en-pe chirij kiej y xkimuq pa Jerusalem ri akuchi e muqun-wi ri rute-rutata', chiri' pa rutinamit kan ri rey David. Ri ch'aqa' chik rubanobal ri Amasías tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Judá.

²¹ K'ari' konojel winaqi' richin ri ruwach'ulew Judá xbekik'ama-pe ri Azarías*f4* ruk'ajol ri Amasías, stape' k'ari' k'o waqlajuj rujuna', y ja rija' xkiya' kan pa ruk'exel ri rutata'.

²² Y ri Azarías xuch'ek chik kan ri tinamit rubini'an Elat, y ja rija' xpaban chik q'anej ri tinamit ri'.

Toq xuq'et-tzij ri jun chik Jeroboam pan Israel

²³ Toq k'a k'es na ri Amasías rey richin Judá, y chupan ri juna' wolajuj chire ri ruq'atbal-tzij, jari' toq xok kan rey ri Jeroboam ruk'ajol ri Joás. Y rija' xuq'et-tzij kawineq jun juna' pa ruwi' ri Israel chiri' pa Samaria.

²⁴ Jak'a xa xuben ri man niqa' ta chuwech ri Jehová, y man xujech'ej ta kan ri' rik'in ronojel ri mak ri xeruben ri nabey Jeroboam ruk'ajol ri Nabat, toq xuben chike ri aj-Israel richin xemakun.

²⁵ Y ri Jeroboam ruk'ajol ri Joás xuch'ek chik jun bey ri ruwach'ulew Israel ri majon kan, nitiker-el chuchi' ri ruwach'ulew Hamat ri k'o pa xaman, y napon k'a pa Tzayi-Choy. Ronojel re' xbanatej achi'el rubin ri Jehová chire ri Jonás ri q'alajirisey ruch'abel. Ri Jonás ri' ruk'ajol ri Amitai, ri aj-Gat-héfer.

²⁶ Y ri Jehová xutz'et k'a ri nimalej poqonal ri nuk'owisaj ri tinamit Israel, y chiri' kan man jun nikolon kichin, stape' jun samajel yuqul pa samaj o man samajel ta.

²⁷ Y roma ri Jehová kan man ruch'obon ta richin nrelesaj-el ri tinamit Israel pa ruwi' ri ruwach'ulew, roma ri' kan xerukol k'a. Y ja k'a ri Jeroboam ri ruk'ajol ri Joás ri xucha' richin chi ja rija' yekolo.

²⁸ Y ri Jeroboam xuben k'iy labal y kan xuch'ek. Chuqa' xeruk'en chik kan ri ruwach'ulew Damasco y ri Hamat. Y ronojel ri xuben tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

²⁹ Y toq xken ri Jeroboam, xmuq k'a akuchi e muqun-wi ri rey. Y ri xkanej kan pa ruk'exel ja ri Zacarías ri ruk'ajol.