2 Rey 13 - Kaqchiquel Bible

Ri q'atbel-tzij richin ri Joacaz pan Israel

¹ Toq k'a k'es na ri Joás ruk'ajol ri Ocozías rey richin Judá, y chupan ri juna' juwineq oxi' chire ri ruq'atbal-tzij, jari' toq xok kan rey pa ruwi' ri ruwach'ulew Israel ri Joacaz ruk'ajol ri Jehú; y xuq'et-tzij wuqlajuj juna' chiri' pa tinamit Samaria.

² Kan xuben k'a ri itzel chuwech ri Jehová, y kan xutzeqelibej ri mak achi'el xuben ri Jeroboam ri ruk'ajol ri Nabat, toq xuben chike ri aj-Israel richin xemakun. Y kan man xuch'er ta k'a kan ri' chire ri mak ri'.

³ Y ri Jehová kan xyakatej janila royowal pa ruwi' ri tinamit Israel, y k'iy juba' juna' xerujech pa ruq'a' ri Hazael rey richin Siria, y pa ruq'a' ri Ben-hadad ri ruk'ajol.

⁴ K'ari' ri Joacaz xuk'utuj utzil chire ri Jehová, y ri Jehová kan xrak'axaj, roma xutz'et ri poqonal ri nuk'owisaj ri tinamit Israel, roma ri rey richin Siria.

⁵ Y xuya' k'a chire ri tinamit Israel jun ri nikolon kichin. Y keri' kan xekolotej pa kiq'a' ri aj-Siria y kan xek'ase' k'a chi utzil pa taq kachoch, achi'el ri kibanon-pe.

⁶ Jak'a man rik'in ri', man xkiya' ta kan ri mak ri xkiben ri Jeroboam y ri rijatzul, toq xuben chike ri aj-Israel richin xemakun. Xa kan xkitzeqelibej k'a ri rubanobal ri Jeroboam, y chuqa' xk'oje' na chiri' pa Samaria ri ruwachibel ri Asera.

⁷ Y kan man e k'iy ta chik aj-labal ri xek'oje' kan rik'in ri Joacaz, xaxe chik k'a e kawineq lajuj achi'a' ri yech'oke' chirij kiej, e lajuj carruaje y 10,000 aj-labal ri nikiben oyowal chikaqen, ri xekanej kan rik'in; roma ri rey richin Siria kan xeruk'is k'a konojel, kan xuben chike achi'el ri poqolaj.

⁸ Ri ch'aqa' chik rubanobal ri Joacaz y ri nimalej ruchuq'a' ri xk'oje', tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

⁹ Y toq ri Joacaz xken, xbekimuqu' kan akuchi e muqun-wi ri rute-rutata' pa Samaria, y ri xk'oje' kan pa ruk'exel ja ri Joás ri ruk'ajol.

Ri Joás xuq'et-tzij pan Israel

¹⁰ Toq k'a k'es na ri Joás rey richin Judá, y chupan ri juna' juwineq wuqlajuj chire ri ruq'atbal-tzij, jari' toq xok kan rey ri Joás ruk'ajol ri Joacaz; y xuq'et-tzij waqlajuj juna' pa ruwi' ri ruwach'ulew Israel ri chiri' pa tinamit Samaria.

¹¹ Rija' xuben ri itzel chuwech ri Jehová. Kan man xuch'er ta k'a kan ri' rik'in ri mak ri xuben ri Jeroboam ruk'ajol ri Nabat, toq xuben chike ri aj-Israel richin xemakun.

¹² Ri ch'aqa' chik rubanobal ri Joás, ri nimalej ruchuq'a' y achike rubanik xuben oyowal rik'in ri Amasías rey richin Judá, ronojel re' kan tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

¹³ Y toq xken ri Joás, xmuq akuchi e muqun-wi ri rey richin Israel. Y ri xk'oje' kan pa ruk'exel, ja ri Jeroboam ri ruk'ajol.

Ri xuq'alajirisaj ri Eliseo

¹⁴ Toq k'a k'es na ri Joás, rey richin Israel, xberutz'eta' kan juba' ri Eliseo roma janila yawa' y kan niken yan. Y ri Joás kan janila k'a xoq', xuq'etej y xubij chire: Wajaw, ja rat ri más oj ato'on chikiwech ronojel ri carruaje richin oyowal y ri achi'a' ri yech'oke' chirij kiej, xcha'.

¹⁵ Y ri Eliseo xubij chire chi tuchapa' ri rute-ruch'ab, y jujun kokoj raqen ch'ab. Y ri rey kan keri' xuben.

¹⁶ K'ari' xubij chire chi tuchojmirisaj-ri' richin nuk'eq ri ruch'ab. Y ri rey kan keri' k'a xuben. Chirij ri' ri Eliseo xuya' ri ruq'a' chirij ri ruq'a' ri rey.

¹⁷ Y xubij chire chi tujaqa' ri ventana ri nitzu'un pa relebel-q'ij. Y toq xujeq, xubij chik chire chi tuk'aqa' ri ch'ab ri'. Y ri Joás kan xuk'eq. K'ari' ri Eliseo xubij chire: Ja ko'ol raqen ch'ab re' ri nuk'exewachuj ri kolotajik ri xtuya-pe ri Jehová. Y jare' ri xkech'ako ri aj-Siria chiri' pa tinamit Afec, y kan xkek'is, xcha'.

¹⁸ Y ri Eliseo xubij chire chi tuchapa' ri kokoj raqen ch'ab. Y toq ri Joás xuchop yan, ri Eliseo xubij chire chi tukajij ri ulew. Y rija' xaxe oxi' mul xukajij, y man xuben ta chik.

¹⁹ Jari' toq xyakatej janila royowal chirij ri rey y xubij: Xakajij ta wo'o' o waqi' mul richin xke'ach'ek ta ri aj-Siria, y kan man ta jun xk'oje' kan chike. Jak'a re wakami xaxe oxi' mul xke'ach'ek, xcha'.

Ri rukamibal ri Eliseo

²⁰ Chirij ri' ri Eliseo xken y ri winaqi' xkimuq. Ronojel k'a juna', k'o jun tzobaj achi'a' eleq'oma' aj-Moab ri ye'ok-apo pa ruwach'ulew Israel richin yebe'eleq'.

²¹ Y k'o k'a jun bey toq ri aj-Moab xepe richin ye'eleq', y ri israelita ye'ajin chumuqik jun achin kamineq. Toq xekitz'et k'a ri eleq'oma', janila xkixibij-ki' y roma ri' xkik'eq kan ri kamineq, ri akuchi muqun-wi ri Eliseo y xe'animej. Y toq ri ruch'akul ri kamineq ri' xutun-ri' rik'in ri ruch'akul ri Eliseo, jari' toq ri kamineq ri' xk'astej chik jun bey y xpa'e-q'anej.

²² Ri Hazael rey richin Siria kan xeruya' k'a pa poqon ri aj-Israel janipe' xq'aton-tzij ri Joacaz.

²³ Jak'a ri Jehová kan xujoyowaj kiwech ri aj-Israel, y kan xeruto' chupan ri ruk'ayewal ri' roma ri jikibel-tzij ri xuben ojer kik'in ri Abraham, ri Isaac y ri Jacob. Y k'a re wakami, man e rumalin ta kan, ni man e ruk'ison ta el chuwech re ruwach'ulew.

²⁴ Y toq xken ri Hazael, ri xk'oje' kan pa ruk'exel ja ri Ben-hadad ri ruk'ajol.

²⁵ K'ari' ri Joás ruk'ajol ri Joacaz, xuben chik oyowal rik'in ri Ben-hadad, y xuch'ek oxi' mul. Chuqa' xeruch'ek chik kan ri tinamit ri e rumajon kan ri Hazael.