2 Rey 11 - Kaqchiquel Bible

Ri Atalía xuq'et-tzij pa Judá

¹ Toq ri Atalía ri rute' kan ri Ocozías xutz'et chi xken ri ral, jari' toq xyakatej chikij ri aj pa rachoch kan ri Ocozías, y kan xeruk'is konojel.

² Jak'a ri Joseba, rumi'al kan ri rey Joram y rana' kan ri Ocozías xanimej y pan ewel xrelesaj-el ri Joás ri ruk'ajol kan ri Ocozías richin chi man xkamisex ta. Xrewaj k'a ri Joás y ri raj-ik' chuwech ri Atalía, y xeruya' pa jun jay ri k'o chiri' pa rachoch ri Dios, akuchi niban-wi waran. Kere' k'a xuben chike richin chi man xekamisex ta.

³ Ri Joás y ri aj-ik' xek'oje' k'a chiri' waqi' juna', rokik ri Atalía xq'aton-tzij pa ruwi' ri ruwach'ulew Judá.

⁴ Y toq xtz'aqet wuqu' juna', jari' toq ri Joiadá, xuteq koyoxik konojel ri chajinela' richin ri rey y ri chajinela' richin ri rachoch rija'. Y xeruya' chupan ri rachoch ri Jehová y xjunamatej k'a kiwech rik'in, y kan xuben chike chi xkiya' kitzij chiri' chupan ri rachoch ri Jehová. K'ari' xuk'ut chikiwech ri Joás ri ruk'ajol kan ri rey Ocozías.

⁵ Y xuya' k'a ruchojmilal chike ri k'atzinel richin nikiben y xubij: Chupan ri q'ij richin uxlanibel, xtich'er-iwi' pa oxi' tzobaj. Jun tzobaj xtuchajij ri rachoch ri rey.

⁶ Ri jun chik tzobaj xtuchajij ri ruchi-jay rubini'an Sur, y ri jun chik xtuchajij ri ruchi-jay chikij ri ch'aqa' chik chajinela'.

⁷ Jak'a ri tzobaj chajinela' ri ye'el-el richin ye'uxlan nibekichajij ri rachoch ri Jehová y chuqa' ri rey.

⁸ Y kan xtisutij-rij ri rey, kan chi'ijujunal rik'in ri ikamisabal pan iq'a'; y xabachike k'a ri nok-apo chi'ikojol rix xtiken. Y kan xkixbe k'a chirij ri rey xabakuchi nrajo' nibe-wi, xcha' ri Joiadá.

⁹ Ri aj-raqen pa kiwi' ri chajinela' xkiben k'a ronojel achi'el xubij ri sacerdote Joiadá chike. Ri ye'ok-apo chupan ri kisamaj y ri ye'el-el chupan ri kisamaj chire ri q'ij ri', ri e ka'i' tzobaj ri' xebe chirij rija'.

¹⁰ Y ri Joiadá xuya' k'a chike ri aj-raqen, ri kum y ri tobel ri e richin kan ri rey David, ri ek'o kan pa rachoch ri Jehová.

¹¹ Y ri yechajin xkicholajij k'a ki' y kan kik'uan ri kikamisabal pa kiq'a', kichapon k'a pe pa rijkiq'a' chire ri rachoch ri Jehová, y napon k'a pa rajxokon, chunaqaj ri porobel, richin nikichajij ri rey.

¹² K'ari' ri Joiadá xrelesaj-pe ri Joás, y xuya' ri ru-corona y chuqa' xuya' ri wuj chire ri k'o ri pixa' chupan. K'ari' xuya' aceite pa ruwi' y xuq'alajirisaj chi ri Joás, ja rija' ri rey. Y konojel ri winaqi' xkipaq'apa' kiq'a' y xkibij: ¡Utz ruwa-ruq'ij ri rey, xecha'.

¹³ Jak'a ri Atalía toq xrak'axaj chi yesik'in ri winaqi' chiri' pa rachoch ri Jehová, jari' toq xok-apo.

¹⁴ Y xutz'et k'a chi ri k'ak'a' rey k'o chunaqaj ri pilar ri kan akuchi nik'oje-wi ri rey. Chuqa' xutz'et chi ri tata'al y ri yeq'ojoman ri trompeta ek'o chunaqaj ri Joás. Y konojel ri winaqi' yekikot y yenimaq'ijun, nikiq'ojomaj ri ki-trompeta. Jari' toq ri Atalía xuretz ri rutziaq y xsik'in y xubij: ¡Xiniq'ol! ¡Xiniq'ol!, xcha'.

¹⁵ Jak'a ri Joiadá xubij chike ri aj-raqen pa kiwi' ri chajinela' chi tikelesaj-el chiri' ri Atalía, y ri achike xketzeqeliben richin, xkeken chi espada. Rija' xubij kere' richin man jun tikamisex chiri' chupan ri rachoch ri Jehová.

¹⁶ Xkichuquqej-el ri Atalía y xkik'uaj akuchi k'o-wi ri kibey ri achi'a' ri yech'oke' chirij kiej richin ye'ok-apo pa rachoch ri rey, y chiri' xkikamisaj-wi kan.

¹⁷ K'ari' ri sacerdote Joiadá xuben jun jikibel-tzij chuwech ri Jehová, y chuwech ri rey y ri winaqi' richin ri tinamit, richin chi rije' nikitzeqelibej ri Jehová. Chuqa' xuben chi ri rey y ri tinamit xjunamatej-kiwech.

¹⁸ K'ari' konojel ri winaqi' xe'ok-apo chupan ri rachoch ri Baal, y xkiwulaj-el. Keri' chuqa' xkiwulaj-el jumul ri porobel y ri wachibel. Y xkikamisaj ri Matán sacerdote richin ri Baal chuwech-pe ri porobel. Y ri Joiadá xeruya' chajinela' chupan ri rachoch ri Jehová.

¹⁹ Y chiri' pa rachoch ri Jehová xerumol k'a ri aj-raqen pa kiwi' ri chajinela' richin ri rey y ri richin ri rachoch rija', y chuqa' ri winaqi', y chiri' xkik'uaj k'a el ri Joás ri akuchi niq'aton-tzij. Y ri rey Joás xtz'uye' k'a pa rutz'uyubal.

²⁰ Y chijun k'a tinamit richin ri ruwach'ulew xkikot, roma xk'oje' uxlanenri'il, y roma xkamisex ri Atalía.

²¹ Ri Joás k'o wuqu' rujuna' toq xuchop niq'aton-tzij pa ruwach'ulew Judá.