2 Rey 1 - Kaqchiquel Bible

Ri q'atbel-tzij richin ri Ocozías pan Israel

¹ Toq xken yan ri rey Acab, ri winaqi' aj-Moab xeyakatej chikij ri israelita stape' ek'o chuxe' ri kiq'atbal-tzij.

² Y ri Ocozías, rey richin ri ruwach'ulew Israel, xbetzaq-pe pa ventana ri k'o-q'anej pa ruka'n wiq y janila xkajtej. Y roma ri' xeroyoj ri rusamajela', y xubij-el chike chi tibekik'ulubej ri Baal-zebub, ri dios kichin ri winaqi' aj-Ecrón, y tikik'utuj chire wi nik'achoj-q'anej chire ri kajtajik.

³ Rokik ri samajela' ri' e beneq, ri ángel richin ri Jehová xch'on rik'in ri Elías ri aj-Tisbé, y xubij chire chi tibiyin y keberuk'ulu' ri e rutaqon-pe ri Ocozías rey richin Samaria, y tubij chike: ¿Maneq k'a Dios pan Israel, richin chi yixbe rik'in ri Baal-zebub dios kichin ri aj-Ecrón?

⁴ Roma ri', ri Jehová nubij chi ri rey Ocozías man xtiyakatej ta chik chuwech ri warabel; xa kan xtibeken k'a, xcha' ri ángel chire ri Elías. K'ari' ri Elías xel-pe richin xeberuk'ulu' ri samajela' y xubij chike ri xubij ri Dios chire.

⁵ Roma ri' ri samajela' xa xetzolin, y ri Ocozías xuk'utuj chike achike roma xetzolin yan pe.

⁶ Y rije' xkibij chire: Xqak'ul jun achin y xubij chiqe: Kixtzolin rik'in ri rey ri xixtaqon-pe, y tibij chire: Kere' rubin-pe ri Jehová: ¿Maneq k'a Dios pan Israel, richin chi yixbe rik'in ri Baal-zebub dios kichin ri aj-Ecrón? Roma ri', ri Jehová kere' nubij: Rey Ocozías, rat kan man xkayakatej ta chik chuwech ri warabel; xa kan xkabeken k'a, xcha-pe chiqe, xecha' ri e taqon-el.

⁷ K'ari' ri Ocozías xuk'utuj chike achike rubanik ri achin ri xkik'ul, ri xbin-pe re ch'abel re' chike.

⁸ Y rije' xkibij chire chi ri achin ri' rukusan jun sale'y richin chikop, y rukusan jun tz'um ximibel rupan. K'ari' ri rey xubij: ¡Ri', ja ri Elías ri aj-Tisbé!, xcha'.

⁹ K'ari' ri Ocozías xuteq k'a el jun aj-raqen ri k'o pa kiwi' e kawineq lajuj aj-labal, y re achi'a' re' xebe-el akuchi k'o-wi ri Elías ri tz'uyul pa ruwi' jun juyu'. Y ri aj-raqen xubij chire: Rat ri at achin richin ri Dios, ri rey xuteq-pe rubixik chi kaqaqa-el re wawe', xcha'.

¹⁰ Y ri Elías xubij chire ri aj-raqen: Wi yin kan in jun achin richin ri Dios, tiqaqa-pe q'aq' chila' chikaj, y karuk'isa' rat y ri e kawineq lajuj aj-labal, xcha'. Y xqaqa k'a pe q'aq' chila' chikaj, y xeruk'is ri e kawineq lajuj aj-labal y ri aj-raqen.

¹¹ K'ari' ri rey xuteq chik k'a el jun chik aj-raqen y e kawineq lajuj aj-labal. Y toq xe'apon rik'in, ri aj-raqen xubij chire ri Elías: Rat ri at achin richin ri Dios, ri rey xuteq-pe rubixik chi kaqaqa-el chi'anin, xcha'.

¹² Y ri Elías xubij chuqa' chire: Wi yin kan in jun achin richin ri Dios, tiqaqa-pe q'aq' chila' chikaj, y karuk'isa' rat y ri e kawineq lajuj aj-labal, xcha'. Y xqaqa k'a pe q'aq' chila' chikaj, y xeruk'is ri e kawineq lajuj achi'a' y ri aj-raqen.

¹³ Y ri Ocozías xuteq chik k'a el ri rox aj-raqen rik'in chik e kawineq lajuj aj-labal. Y re aj-raqen re' xjote' k'a el y xxuke-qa chuwech ri Elías, y xubij k'a chire: Táta, ri at q'alajirisey ruch'abel ri Dios, nink'utuj utzil chawe chi kan k'o ta rejqalen chawech rat ri nuk'aslen, y ri kik'aslen ri e kawineq lajuj achi'a' ri ek'o wik'in.

¹⁴ Roma ri ka'i' tzobaj ri xepe nabey y ri e ka'i' aj-raqen kan xqaqa-pe q'aq' chila' chikaj chikij, y kan xeruk'is konojel. Wakami k'a, tabana' utzil tajoyowaj qawech y man tawelesaj ri qak'aslen roj, xcha'.

¹⁵ K'ari' ri ángel richin ri Jehová xubij chire ri Elías chi tibe rik'in y man tuxibij-ri'. Y ri Elías xyakatej k'a pe y xbe rik'in ri rey.

¹⁶ Toq xapon rik'in, xubij chire: Kere' rubin-pe ri Jehová: Rat kan xaben chi achi'el xa ta maneq Dios wawe' pan Israel roma xa xak'ulubej chik jun. Roma xe'ateq-el achi'a' rik'in ri Baal-zebub dios kichin ri aj-Ecrón; roma ri' man xkayakatej ta chik chuwech ri warabel y xa xkabeken, kere' nubij ri Dios, xcha' ri Elías.

¹⁷ Keri' xken ri Ocozías achi'el xbix chire ri Elías roma ri Jehová. Y ri Ocozías kan man jun k'a ralk'ual xk'oje', y roma ri' ja ri Joram ri rach'alal ri xk'oje' kan pa ruk'exel richin xq'aton kan tzij pa ruwi' ri ruwach'ulew Israel. Ronojel re' xbanatej chupan ri ruka'n juna' toq ri jun chik Joram, ri ruk'ajol ri Josafat niq'aton-tzij pa Jerusalem pa ruwi' ri ruwach'ulew Judá.

¹⁸ Ri ch'aqa' chik rucholajen ri ruk'aslen ri Ocozías, tz'ibatel kan chupan ri Wuj Ri Cholan Nich'on ronojel ri xkiben ri e rey richin Israel.