2 Crón 8 - Kaqchiquel Bible

¹ Ri Salomón pa juwineq juna' xuk'achojirisaj ri rachoch ri Jehová y ri rachoch rija'.

² Chirij ri' xupaba' chik q'anej ri tinamit ri xtzolix kan chire roma ri rey Hiram, y xeruyala' k'a ri ruwinaq israelita chupan.

³ K'ari' xbe chik pa tinamit Hamat richin Sobá y xuch'ek k'a kan richin xok kan richin rija'.

⁴ Chuqa' xupaba' chik q'anej jun bey ri tinamit Tadmor ri k'o pa tz'iran ruwach'ulew, y ronojel tinamit richin yakonabel richin ronojel ri yetij ri ek'o chunaqaj ri tinamit Hamat.

⁵ Chuqa' xupaba' chik q'anej jun bey ri tinamit Bet-horón ri k'o pa xulan y ri Bet-horón ri k'o pa jotol; ri ka'i' tinamit ri' e sutin-kij rik'in tz'aq y ri kichi' jebel e tz'apen y ya'on ch'ich' chikij.

⁶ Chuqa' xerupaba' chik q'anej ri tinamit Baalat y ri ch'aqa' chik tinamit akuchi yeyak-wi ronojel ri k'atzinel y ronojel ri jay akuchi ek'o-wi ri carruaje richin oyowal, ri jay kichin ri winaqi' ri yech'oke' chirij kiej y ronojel ri xrajo' xupaba-q'anej pa Jerusalem, y chuqa' pa ruwach'ulew Líbano y chupan ronojel ri ruwach'ulew ri k'o pa ruq'a'.

^7-8 Ri Salomón xeruya' pa taq kowilej samaj ri winaqi' ri e kijatzul kan ri man e kiwinaq ta, ri man xe'elesex ta kan, chupan ri kiruwach'ulew Israel. Konojel re winaqi' re' ja ri hitita, ri amorreo, ri heveo, ri ferezeo, y ri jebuseo; rije' kan yesamej k'a rik'in ri rey y keri' nikiben.

⁹ Y man xuben ta chike ri ruwinaq rija' richin xexime' pa samaj, xa xerukusaj richin xe'ok aj-labal, e aj-raqen pa kiwi' ri achi'a' ri', aj-raqen pa kiwi' ri ye'uk'uan carruaje y aj-raqen pa kiwi' ri achi'a' ri yech'oke' chirij kiej.

¹⁰ Konojel k'a ri achi'a' ri e aj-raqen ri e ruwinaq ri Salomón e 250.

¹¹ Ri Salomón kan xupaba' yan k'a q'anej jun jay richin ri rixjayil, rumi'al ri rey richin Egipto. Xrelesaj k'a el chiri' chupan ri tinamit richin kan ri rey David, roma xuch'ob chi ri rixjayil man ruk'amon ta nik'oje' chiri' pa rachoch kan ri David, roma kan chiri' xk'oje-wi ri káxa richin ri rujikibel-tzij ri Dios, y ri chiri' kan janila rejqalen. Ri Salomón xuq'axaj k'a q'anej ri rixjayil chupan ri k'ak'a' jay ri'.

¹² Chirij ri' ri Salomón xerusuj pa ruwi' ri porobel, chikopi' ri yeporox jumul

¹³ chupan ri jalajoj ruwech taq nimaq'ij, achi'el ri rubin kan ri Moisés; ri q'ij richin uxlanen, ri q'ij toq nalex ri k'ak'a' ik' y ri oxi' nimaq'ij ri yeban pa jun juna': Ri nimaq'ij richin ri kaxlan-wey ri maneq ch'amilej-q'or rik'in, ri nimaq'ij richin Pentecostés*f4* y ri nimaq'ij richin ri taq jay banon rik'in tzieq.

¹⁴ Ri Salomón chuqa' xuya' pa ruchojmilal ri kisamaj ri e sacerdote. Chuqa' keri' xuben kik'in ri e levita ri yek'oje' pa kiwi' ri nikiya' ruq'ij ri Jehová y yekito' ri e sacerdote rik'in ri nik'atzin chike q'ij-q'ij. Chuqa' keri' xuben kik'in ri yechajin ronojel ri ruchi' ri rachoch ri Jehová; y ronojel re' xuben achi'el rubin kan ri David ri rutata', ri rusamajel ri Dios.

¹⁵ Y kan man xkijech'ej ta kan ki', chire ri ruchojmilal ri ruya'on ri Salomón pa kiwi' ri e sacerdote y ri e levita, y keri' chuqa' xkiben rik'in ri beyomel richin ri rachoch ri Jehová,

¹⁶ Ronojel ri k'atzinel chi ri Salomón nuben-qa, kan keri' xuben; kan chupan ri q'ij toq xkiya-qa ri ruxe' ri jay y k'a toq xk'achoj-q'anej jumul ri rachoch ri Jehová.

¹⁷ Chirij ronojel re' ri Salomón xbe-qa pa tinamit Esión-guéber y pa tinamit Elat, ri chiri' pa taq'aj chuchi' ri ruq'a-ya' ri k'o pa xokon chire ri ruwach'ulew Edom.

¹⁸ Y ri Hiram xuteq-pe jun molaj barco, y chuqa' ri rusamajela' ri kan ketaman nikik'uaj barco, xekachibilaj k'a el ri e rusamajela' ri Salomón xebe pa ruwach'ulew Ofir richin xbekik'ama' q'anapueq, y xkik'en k'a pe más juba' 310 quintal q'anapueq chire ri rey Salomón.