2 Crón 36 - Kaqchiquel Bible

¹ Chirij ri' ri winaqi' richin ri Judá xbekik'ama-pe ri Joacaz, ruk'ajol kan ri Josías richin xkiya' kan rey chiri' pa Jerusalem pa ruk'exel ri rutata'.

² Ri Joacaz juwineq oxi' k'a rujuna' toq xuchop nuq'et-tzij, y xaxe oxi' ik' xq'aton-tzij,

³ roma ri rey richin Egipto xrelesaj-pe chiri' pa Jerusalem pa rutz'uyubal. Y xuben chire ri tinamit chi xesamej rik'in, y k'o chi xkiya' jubama oxk'al lajuj quintal saqipueq, y jubama oxi' arroba q'anapueq.

⁴ Chuqa' ri rey ri' xujikiba' ri Eliaquim, rach'alal ri Joacaz, richin xok kan rey pa ruwi' ri Judá y ri Jerusalem, y kan xujel ri rubi'. Xubij Joaquim chire, y ri Joacaz, ri rach'alal, xuk'uaj-el pan Egipto.

Ri q'atbel-tzij richin ri Joaquim pa ruwi' ri Judá

⁵ Toq xuchop nuq'et-tzij ri Joaquim pa Jerusalem, k'o k'a juwineq wo'o' rujuna', y xuq'et k'a tzij julajuj juna'. Kan xuben k'a ri man utz ta chuwech ri Jehová ri ru-Dios.

⁶ Y ri Nabucodonosor rey richin Babilonia xapon rik'in ri Joaquim y xuxim rik'in cadena ri banon rik'in q'enq'oj-pueq y xuk'uaj-el pa Babilonia.

⁷ Chuqa' ri Nabucodonosor xuk'uaj-el juba' samajibel ri k'o pa rachoch ri Jehová y kan xberuya' pa rachoch ri ru-dios rija'.

⁸ Ri ch'aqa' chik rubanobal ri Joaquim y ronojel ri itzel taq banobel ri xeruben chuwech ri Dios, xtz'ibatej kan chupan ri wuj kichin ri rey richin Israel y ri Judá. Y chirij rija', ri xk'oje' kan pa ruk'exel ja ri Joaquín ri ruk'ajol.

Ri Joaquín xuk'uex-el pa Babilonia

⁹ Ri Joaquín waqxaqlajuj*f15* k'a rujuna' toq xuchop nuq'et-tzij y xq'aton-tzij oxi' ik' y lajuj q'ij chiri' pa Jerusalem. Y kan man utz ta k'a ri xuben chuwech ri Jehová.

¹⁰ Pa rutikeribel ri jun chik juna', ri rey Nabucodonosor xuteq rubixik chi tuk'uex-el pa Babilonia ri Joaquín, junan rik'in ri samajibel ri k'o kejqalen ri ek'o pa rachoch ri Jehová. Y ja ri Sedequías, rach'alal ri Joaquín, xukusaj kan rey pa kiwi' ri aj-Judá y ri aj-Jerusalem.

Ri q'atbel-tzij richin ri Sedequías pa Judá

¹¹ Ri Sedequías k'o k'a juwineq jun rujuna' toq xuchop nuq'et-tzij, y xq'aton-tzij julajuj juna' chiri' pa Jerusalem.

¹² Jak'a ri rubanobal kan man utz ta k'a chuwech ri Jehová ri ru-Dios, y kan man xuqasaj ta ri' chuwech ri Jeremías ri q'alajirisey ruch'abel ri Dios ri taqon-pe.

¹³ Chuqa' kan xyakatej chirij ri rey Nabucodonosor, ri kan ruya'on rutzij chuwech pa rubi' ri Dios chi nijunamatej-kiwech rik'in. Y kan xunimirisaj-ri' y xukowirisaj ri ránima y kan xupaba-ri' chi kan man nitzolin ta chik rik'in ri Jehová ri Dios richin Israel.

¹⁴ Chuqa' konojel ri k'o más kiq'ij ri ek'o pa tinamit Judá, ri e sacerdote y konojel winaqi' kan xkinimirisaj ri kimak; xa kan xekitzeqelibej ri banobel ri man niqa' ta chuwech ri Dios. Xkiben achi'el ri yekiben ri ch'aqa' chik ruwach'ulew, y kan xekibanala' k'a ri itzel taq banobel pa rachoch ri Jehová, ri akuchi ruch'aron rija' richin niya'ox ruq'ij chiri' pa Jerusalem.

¹⁵ Ri Jehová ri ki-Dios ri kati't-kimama' kan jantape' k'a xuya' rutzijol chike koma ri q'alajirisey ruch'abel, roma rija' kan nujoyowaj ruwech ri rutinamit y ri rachoch.

¹⁶ Jak'a rije' xa xetze'en chikij ri e rutaqon ri Dios, xa xketzelaj ri ruch'abel y xeyojoben chikij ri e q'alajirisey ruch'abel. Y roma ri' ri Jehová xpe royowal chirij ri rutinamit, y rije' kan man jun chik xetikir xkiben.

Ri aj-Judá xe'uk'uex-el pa Babilonia

¹⁷ K'ari' ri Jehová xuben chire ri rey richin ri Babilonia, richin xerukamisaj chi espada ri alaboni', stape' ek'o chupan ri rachoch ri Dios. Kan man xupoqonaj ta ri kik'aslen ri alaboni', ni ri xtani', ni ri rijita'q taq winaqi'. Konojel re' ri Jehová kan xerujech pa ruq'a' ri rey richin Babilonia.

¹⁸ Keri' chuqa' ronojel samajibel ri ek'o pa rachoch ri Dios chi ch'uti'q chi nima'q, ronojel ri beyomel ri ek'o chiri', y chuqa' ri beyomel ri k'o pa rachoch ri rey y kichin ri e tata'al; ronojel re' xuk'uaj-el pa Babilonia.

¹⁹ Y ri rachoch ri Dios xkiporoj kan, y xkiwulaj kan ri tz'aq chirij ri Jerusalem. Chuqa' xkiporoj kan ri jay richin ri rey ri akuchi niq'aton-wi-tzij, y xekiyoj kan ronojel ri k'o rejqalen.

²⁰ K'ari' xeruk'uaj-el pa Babilonia konojel ri winaqi' ri xekolotej kan chuwech ri kamik rik'in espada; y xe'ok rusamajela' ri xeyuqe' pa samaj rik'in rija', y kik'in ri ralk'ual rija'. Keri' xek'oje' k'a ja toq xapon na ri q'atbel-tzij richin Persia.

²¹ Ronojel re' xbanatej richin xtz'aqet ri rubin ri Jehová chire ri Jeremías ri q'alajirisey ruch'abel. Keri' ri ruwach'ulew Judá xk'oje' kan rik'in uxlanenri'il, k'a toq xtz'aqet na oxk'al lajuj juna' richin xuxlan.

Ri pixa' richin Ciro

²² Chupan ri nabey juna' richin ri q'atbel-tzij richin ri Ciro rey richin Persia, richin nibanatej achi'el rubin kan ri Jehová chire ri Jeremías, ri Jehová xusiloj ránima ri rey ri' y xuben chire chi tutaluj rutzijol y tutaluj wuj chupan chijun ruq'atbal-tzij. Y ri Ciro kere' k'a xubij:

²³ Ri Ciro rey richin Persia kere' nubij: Ri Jehová Dios ri rajaw ri kaj, xuya' chuwe ronojel q'atbel taq tzij richin ri ruwach'ulew; y rija' yiruteq richin ninbenpaba-q'anej jun rachoch pa Jerusalem ri k'o pa ruwach'ulew Judá. Achike k'a chiwe rix ri kan k'o chupan ri rutinamit ri Jehová, ja ri Jehová ri xtito'on richin y xtibe chila' pa Jerusalem. Y ja ri Jehová ri ru-Dios ri xtuk'uan richin, xcha' ri Ciro.