2 Crón 35 - Kaqchiquel Bible

Ri Josías nunimaq'ijuj ri q'ij toq ri Jehová xuya' ri Solbelri'il

¹ Ri Josías xunimaq'ijuj k'a ri q'ij toq ri Jehová xuya' ri Solbelri'il. Re nimaq'ij re' xuben chiri' pa Jerusalem, chupan ri q'ij kajlajuj chire ri nabey ik' chire ri juna', y xukamisaj k'a ri chikop richin ri nimaq'ij ri'.

² Chuqa' xeruya' pa kisamaj ri sacerdote y kan xuben chike chi xesamej chupan ri rachoch ri Jehová.

³ Y xch'on kik'in ri e levita ri kan kijachon-ki' chupan ri rusamaj ri Dios, ri yetijon chupan chijun ri ruwach'ulew y xubij chike: Ri loq'olej káxa richin ri jikibel-tzij kan tiya' k'a pa rachoch ri Jehová, ri rupaban kan ri Salomón ruk'ajol kan ri David rey richin Israel. Kan man xtik'uaj ta chik chuwi-itele'n. Wakami k'a rix tisamajij ri Jehová ri qa-Dios y chuqa' ri rutinamit Israel.

⁴ Tinuk'u' k'a iwi' achi'el ri iwach'alal-iwi', achi'el ri tz'ibatajineq kan roma ri rey David y ri Salomón ri ruk'ajol.

⁵ Y ja rix ri xkixok pa rachoch ri Jehová achi'el ri iwach'alal-iwi', richin nisamajij ri tinamit achi'el ri kitzobaj.

⁶ Ke'ikamisaj k'a ri taq chikopi' richin re nimaq'ij re', tich'ajch'ojirisaj-iwi' y kan tichojmirisaj k'a ronojel, richin keri' ri iwach'alal yetikir nikitaqej achi'el rubin kan ri Jehová chire ri Moisés, xcha'.

⁷ K'ari' ri rey Josías xusipaj chike ri winaqi'; alaji' achija' taq karne'l y alaji' taq tzuntzun, y ri kajlabal konojel re' e 30,000; y chuqa' xusipaj e 3,000 wákix, richin xe'ukusex richin ri nimaq'ij ri'. Ronojel re' kan ja ri rey ri xya'on.

⁸ Chuqa' ri e tata'al rik'in ri rey kan rik'in ronojel kánima xkiya' sipanik chike ri winaqi', chike ri e sacerdote y chike ri e levita. Keri' chuqa' ri yesamej pa rachoch ri Dios, ri kibini'an Hilquías, Zacarías y Jehiel, xekijech pa kiq'a' ri e sacerdote e 2,600 chikopi' richin re nimaq'ij re', y e 300 wákix.

⁹ Keri' chuqa' ri aj-raqen kichin ri e levita, ri kibini'an Conanías, Semaías, Hasabías, Jehiel, Josabad y Natanael e rachibilan ri rach'alal; rije' xekisipaj chike ri e levita e 5,000 chikopi' richin ri nimaq'ij, y e 500 wákix.

¹⁰ Toq ronojel k'o chik, jari' toq ri e sacerdote xkinuk'-ki' richin nikiben ri samaj, y ri e levita kan xkik'uaj-ki' pa taq tzobaj achi'el ri ruchojmilal ri rubin ri rey.

¹¹ K'ari' xekamisex k'a ri chikopi' richin nikinimaq'ijuj ri q'ij toq ri Jehová xuya' ri Solbelri'il. Y ri e levita nikiq'axaj k'a apo ri kik' chike ri sacerdote. Y rokik rije' nikichikaj ri kik' ri' pa ruwi' ri porobel, ri e levita yekich'ol ri taq chikopi' ri'.

¹² K'ari' xkelesaj ri ruq'anal ri chikop, y xkijech-el chike ri tzobaj achi'el ri kajlabal ri pa taq kachoch; y re' richin nikisuj chire ri Jehová, achi'el ri tz'ibatajineq kan chupan ri wuj richin ri pixa' ri ruya'on kan ri Moisés. Chuqa' kan keri' xeban kik'in ri wákix.

¹³ Chirij re' k'ari' xekisa' ri kich'akul ri taq chikopi' richin ri nimaq'ij ri', achi'el nubij ri pixa'. Y ri ch'aqa' chik ti'ij xechaq'irisex pa bojo'y y chupan ch'aqa' chik k'ojelibel; y kan anineq k'a xtalux chikiwech ri winaqi' richin ri tinamit.

¹⁴ Chirij ri' k'ari' ri levita xkichojmirisaj ri chikop ri kichin rije' y ri kichin ri e sacerdote, roma ri e sacerdote ri e rijatzul kan ri Aarón, kan chijun q'ij k'a xkisuj ri kamelabel richin niporox chijun ri chikop, y ri ruq'anal ri ch'aqa' chik sipanik; y roma ri' xuk'isibej kan ri kichin rije'.

¹⁵ Y ri bixanela' e rijatzul kan ri Asaf chuqa' kan ek'o pa kisamaj achi'el ri pixa' ri ruya'on kan ri David, ri Asaf, ri Hemán y ri Jedutún ri nitz'eton ri peteneq chikiwech, ri nisamej rik'in ri rey. Keri' chuqa' ri chajinela' richin ri ruchi' ri ruwa-jay, man xesilon ta pa kik'ojelibal chijun q'ij roma ri e levita ja rije' ri xekichojmirisaj ronojel ri kichin rije'.

¹⁶ Keri' k'a xban chire ronojel ri samaj ri' richin xnimaq'ijux ri q'ij toq ri Jehová xuya' ri Solbelri'il, y richin xkiporoj ri chikop pa ruwi' ri porobel richin ri Jehová, achi'el ri ruchojmilal ri xuya' ri rey Josías.

¹⁷ Konojel k'a ri e rijatzul kan ri Israel ri ek'o-apo chiri' xkinimaq'ijuj k'a ri q'ij ri' y chuqa' ri nimaq'ij toq nitij kaxlan-wey ri maneq ch'amilej-q'or rik'in, ri xnimaq'ijux wuqu' q'ij.

¹⁸ Man jun bey k'a nimaq'ijun keri' ri q'ij ri' chupan chijun ri ruwach'ulew Israel; ni ta toq k'a k'es ri Samuel ri q'alajirisey ruch'abel ri Dios, ni kan man jun rey chike ri xe'el yan el. Kan man jun k'a banayon-pe re nimaq'ij re' achi'el xuben ri rey Josías kik'in ri e sacerdote, ri e levita, ri winaqi' aj-Judá, aj-Jerusalem y ri aj-Israel.

¹⁹ Re nimaq'ij re' xbanatej chupan ri juna' waqxaqlajuj chire ri q'atbel-tzij richin ri Josías.

Ri rukamibal ri Josías

²⁰ Chirij k'a ronojel re' toq ri Josías xuchojmirisaj yan ri rachoch ri Jehová, jari' toq ri Necao rey richin Egipto, xq'ax-el pa Judá richin nibe k'a pa tinamit Carquemis ri k'o chuchi' ri raqen-ya' Éufrates, richin niberubana' oyowal. Y ri Josías xel k'a pe richin nuben oyowal rik'in.

²¹ Y ri Necao xeruteq-pe rusamajela' rik'in ri Josías richin xokibij chire: Man kinaneq rat rey richin Judá, roma man chawij ta rat in peteneq-wi. Xa kan rik'in chik jun ruwach'ulew xtinbenbana-wi oyowal. Y ri Dios xubij chuwe chi kan chi'anin tinbana' ri oyowal ri'. Man tapaba-awi' chuwech ri Dios roma kan ja rija' beneq wik'in yin; roma man xa karukamisaj kan, xcha' ri Necao.

²² Jak'a ri Josías man xunimaj ta; xa kan xujel-el ruwech richin xberubana' oyowal rik'in ri Necao. Kan man xunimaj ta rutzij ri Necao stape' xubij ri rubin ri Dios chire. Y rija' kan xbe pan oyowal chiri' pa taq'aj kojol juyu' pa Meguido.

²³ Y ri ch'abnela' aj-Egipto xkiq'ijuj ri rey Josías, y kan xkimej. K'ari' rija' xubij chike ri rusamajela': Kiniwelesaj-el re wawe' roma kan janila xisokotej yan, xcha'.

²⁴ K'ari' ri rusamajela' xkelesaj-el chupan ri carruaje richin oyowal y xkiq'axaj chik chupan jun ruka'n carruaje, y k'ari' xkik'uaj-el pa Jerusalem, y chiri' xken-wi ri rey Josías. Xmuq k'a ri akuchi e muqun-wi ri rute-rutata'. Y konojel k'a aj-Jerusalem y ri aj-Judá janila xkibisoj ri rey Josías.

²⁵ Y ri Jeremías kan xuben k'a jun bix richin bis. Y k'a re q'ij re' konojel ri bixanela' chi alaboni' chi xtani' noqaqa chikik'u'x ri rey Josías toq nikibixaj ri bix richin bis; y re' kan xok k'a kan jun ruchojmilal chiri' pan Israel, y re bix re' xtz'ibatej kan chupan ri wuj richin bis.

²⁶ Ri ch'aqa' chik rubanobal ri Josías y ri utzilej taq rubanobal ri xqa' chuwech ri Dios, y chi xutaqej ri tz'ibatajineq kan chupan ri wuj richin ri rupixa' ri Jehová,

²⁷ ronojel re' tz'ibatajineq kan chupan ri wuj kichin ri rey ri e richin Israel y ri Judá.