2 Crón 33 - Kaqchiquel Bible

Ri Manasés xuq'et-tzij pa Judá

¹ Ri Manasés k'o k'a kablajuj rujuna' toq xuchop nuq'et-tzij pa ruwi' ri ajawaren richin Judá chiri' pa Jerusalem, y kawineq wolajuj juna' xuq'et-tzij.

² Jak'a ri rubanobal kan man utz ta k'a chuwech ri Jehová; xa kan xuben achi'el ri xkiben ri winaqi' ri xek'oje' chiri' ojer, ri xerelesaj-el ri Jehová chikikojol ri israelita.

³ Rija' xuchojmirisaj chik el jun bey ri akuchi nikiya-wi kiq'ij ri wachibel ri pa ruwi' taq juyu' ri e ruyojon kan ri Ezequías, ri rutata'. Chuqa' xeruben chik q'anej jun bey ri porobel kichin ri Baal, y ri che' ruwachibel ri Asera. Xuya' kiq'ij ri ch'umila', ri ik' y ri q'ij,

⁴ y kan xupaba-q'anej porobel chupan ri rachoch ri Jehová, richin nuya' kiq'ij, stape' ri Jehová rubin chi chiri' pa Jerusalem kan xaxe rija' ri xtiya'ox ruq'ij richin q'asen.

⁵ Y xeruben ch'aqa' chik porobel chupan chi ka'i' ruwa-jay richin ri rachoch ri Jehová.

⁶ Chuqa' kan xeruporoj ri ralk'ual richin kamelabel chiri' pa taq'aj kojol juyu' richin Ben-hinom. Kan xeruk'ulubej k'a ri yech'on kik'in ri espíritu richin nretamaj ri peteneq chuwech, y chuqa' xch'on kik'in ri kaminaqi'. Xuya' q'ij chi xek'oje' chik ri aj-itza'. Kan xik'o k'a ruwi' ri itzel xuben. Ronojel re' kan man xqa' ta chuwech ri Jehová, y roma ri' xyakatej janila royowal.

⁷ Ri Manasés chuqa' xuben jun wachibel y xuya-apo pa rachoch ri Jehová, stape' ri Jehová kan xubij chike ri David y ri Salomón chi ri rachoch ri niban-q'anej pa Jerusalem, kan xucha' chikikojol ri tzobaj richin Israel, richin chi kan xaxe rija' niya'ox ruq'ij chiri'.

⁸ Y chuqa' xubij chi wi xtikitaqej ronojel ri nubij ri jalajoj ruwech pixa' ri ya'on chire ri Moisés, kan man jun bey chik xkerelesaj-el ri israelita chupan ri ruwach'ulew ri' ri ruya'on chik chike ri kati't-kimama'.

⁹ Jak'a ri Manasés xa xeruyuqej ri ruwinaq chubanik ri etzelal. Y kan xik'o chik k'a ruwi' ri etzelal ri xkiben rije' chikiwech ri ch'aqa' chik winaqi' ri xek'oje' chiri' ojer kan, ri xeruk'is kan ri Jehová chikiwech ri israelita.

¹⁰ K'ari' ri Jehová xch'on rik'in ri Manasés y kik'in konojel ri ruwinaq; jak'a rije' man xeniman ta chire.

¹¹ Y roma ri' ri Jehová xeruk'en-pe aj-raqen kichin ri aj-labal aj-Asiria chikij. Xkixim k'a el ri Manasés rik'in cadena ri banon rik'in q'enq'oj-pueq, y k'ari' xkik'uaj-el pa Babilonia.

¹² Y jak'a toq xuna' rukiy ri ruk'ayewal, k'ari' xch'on rik'in ri Jehová ri ru-Dios, ri ki-Dios kan ri rati't-rumama', y kan janila xuqasaj-ri' chuwech.

¹³ Y ri Dios kan xrak'axaj k'a, y xuben chire chi xtzolin-pe pa Jerusalem chupan ri ruq'atbal-tzij. K'ari' ri Manasés xq'ax chuwech chi kan xaxe ri Jehová ri qitzij Dios.

¹⁴ Chirij k'a ronojel re', rija' xupaba-q'anej ri tz'aq chirij ri Ófel, ri rutinamit ri David, ri nitiker-el chiri' pa qajbel-q'ij chire ri ralaxbel-ya' Guihón, y napon k'a rik'in ri ruchi' ri akuchi ye'el ye'ok-wi ri e k'ayil taq ker. Toq xk'achoj kan chire ri tz'aq ri', k'ari' xusutij-rij chijun ri Ófel. Ri tz'aq ri' kan janila nim rujotolen xuben chire. Y kan xeruya' aj-raqen kichin aj-labal pa taq tinamit ri sutin-kij chi tz'aq, chiri' pa Judá, richin nikichajij chijun ri ruwach'ulew.

¹⁵ Chuqa' xerelesaj-el ri ch'aqa' chik dios, ri wachibel ri niya' kiq'ij y ronojel ri porobel ri e paban-q'anej chiri' pa rachoch ri Jehová y chuqa' ri ek'o chupan ri tinamit. Y kan ronojel re' xeberuk'aqa' kan chirij-el ri tinamit.

¹⁶ Xuchojmirisaj chik el ri porobel richin ri Jehová, y pa ruwi' ri' xusuj-wi ri sipanik richin nuq'alajirisaj chi junan ruwech rik'in ri Jehová y chuqa' ri sipanik richin matioxinik. Y xubij chike konojel winaqi' aj-Judá chi tikisamajij ri Jehová, ri ki-Dios.

¹⁷ Jak'a ri winaqi' xa k'a nikisuj na kamelabel ri akuchi xkiya-wi kiq'ij ri wachibel ri pa ruwi' taq juyu', xaxe wakami kan ja ri Jehová ri ki-Dios ri nikiya' ruq'ij chiri'.

¹⁸ Ri ch'aqa' chik rubanobal ri Manasés, ri ruch'owen rik'in ri Dios y ri kich'abel ri yetz'eton ri peteneq chikiwech ri xech'on pa rubi' ri Jehová ri Dios richin Israel; ronojel k'a re' xtz'ibatej kan chupan ri ch'aqa' chik wuj richin ri kibanobal ri rey e richin Israel.

¹⁹ Chuqa' ri ruch'owen rik'in ri Dios, y toq xak'axatej ronojel ri rumak ri xuben toq man xunimaj ta rutzij ri Dios, keri' chuqa' toq xeruben ri akuchi xkiya-wi kiq'ij ri wachibel ri pa ruwi' taq juyu', toq xeruben ri paban-che' richin Asera y ri ch'aqa' chik wachibel richin xuya' kiq'ij, y toq man jani tuqasaj-ri' chuwech ri Dios; ronojel k'a re' xtz'ibatej kan chupan ri kiwuj ri yetz'eton ri peteneq chikiwech.

²⁰ Xken k'a ri Manasés, y xmuq k'a chiri' chuwa-jay chire ri jay richin ri q'atbel-tzij. Y ja ri Amón, ri ruk'ajol ri xk'oje' kan pa ruk'exel.

Ri Amón xuq'et-tzij pa Judá

²¹ Ri Amón k'o k'a juwineq ka'i' rujuna' toq xuchop nuq'et-tzij pa ruwi' ri ajawaren richin Judá chiri' pa Jerusalem, y ka'i' k'a juna' ri xuq'et-tzij chiri'.

²² Jak'a xa kan xuben achi'el ri itzel rubanobal ri Manasés ri rutata' roma xa xusuj kamelabel chikiwech ri wachibel ri rubanon kan ri rutata', y xerusamajij. Re banobel re' kan man xqa' ta k'a chuwech ri Jehová.

²³ Kan man jun bey k'a xuqasaj-ri' chuwech ri Jehová, stape' ri rutata' xuqasaj-ri' chuwech ri Jehová. Rija' xa kan xunimirisaj ri rumak.

²⁴ Y ri e tata'al kan xeyakatej k'a chirij y xkikamisaj kan pa rachoch.

²⁵ Jak'a konojel ri winaqi' richin ri ruwach'ulew ri' xa xekikamisaj ri e tata'al ri xekamisan richin ri rey Amón. Chirij ri' xkikusaj kan rey ri Josías, ri ruk'ajol ri Amón, pa ruk'exel rija'.