2 Crón 32 - Kaqchiquel Bible

¹ Chirij k'a ronojel ri utzilej taq rubanobal ri Ezequías, jari' toq xapon ri Senaquerib rey richin Asiria, richin niberubana' oyowal chiri' pa Judá richin nich'akon chirij. Y xkisutij-kij ri tinamit ri jebel e tz'apen chi tz'aq.

² Toq ri Ezequías xutz'et chi ri Senaquerib xapon chiri', richin niberubana' oyowal pa Jerusalem,

³ jari' toq xubij chike ri e tata'al y ri aj-raqen pa kiwi' ri aj-labal chi ketz'apex ri ralaxbel taq ya' ri ek'o chirij-el ri tz'aq. Y rije' kan xqa' chikiwech.

⁴ K'ari' xkimol-ki' e k'iy winaqi' richin xbekitz'apej ronojel ri ralaxbel taq ya'; keri' chuqa' xbekitz'apej ronojel ri taq ch'uti'n raqen ya' y chuqa' ri rubey ya' ri napon pa Jerusalem. Keri' xkiben richin toq xke'apon ri rey richin Asiria e rachibilan ri aj-labal, man xtikil ta kiya'.

⁵ Y ri Ezequías kan rik'in k'a ronojel uchuq'a' xuteq ruchojmirisaxik ri tz'aq, y xeruben-q'anej jay kichin ri chajinela' pa ruwi', y chuqa' xuben jun chik tz'aq ri xk'oje-pe chuwech ri tz'aq ri kan k'o. Chuqa' xunojisaj chik chi ulew ri chuwech-pe ri tz'aq ri k'o chiri' pa tinamit richin ri rey David. Y xuteq rubanikil k'iy espada y tobel.

⁶ K'ari' xeruya' aj-raqen e richin oyowal pa kiwi' ri winaqi' ri ek'o pa tinamit. Y xerumol k'a chiri' chupan ri nima-ruwech bey richin molojri'il, y xuya' k'a pa taq kánima re ch'abel re':

⁷ ¡Kow k'a kixk'oje' y titija' iq'ij richin man nixibij-iwi'. Man timayamo-qa ri iwánima chuwech ri rey richin Asiria y chikiwech konojel aj-labal ri e rachibilan-pe, roma k'o más uchuq'a' qik'in roj ke chikiwech rije'.

⁸ Rija' xa achi'a' ri yeto'on richin; jak'a roj kan ja ri Jehová ri qa-Dios yojto'on chupan re oyowal re', xcha'. Toq xkak'axaj ri ruch'abel ri rey Ezequías, ri winaqi' kan xk'oje' k'a kuqubabel-k'u'x kik'in.

⁹ Chirij re' toq ri Senaquerib nuben oyowal pa tinamit Laquis rik'in konojel ri rutzobaj achi'a', jari' toq xeruteq-el pa Jerusalem ka'i-oxi' aj-raqen, richin nibekibij chire ri Ezequías y chike konojel ri ruwinaq ri ek'o pa Jerusalem re ch'abel re':

¹⁰ Ri Senaquerib, rey richin Asiria, kere' nubij: ¿Achoq ik'in ikuquban-wi ik'u'x rix richin chaq ixk'o-qa wawe' pa Jerusalem y roj xa kan qasurin chik iwij?

¹¹ Wi ri Ezequías nubij chiwe chi ri Jehová ri i-Dios yixrukol pa nuq'a', ri' xa yixruq'ol, xa kan rubanon chiwe chi yixbeken roma wayjal y chaqi'j-chi'ij.

¹² ¿Man xerelesaj ta kami el rija' ri akuchi niya-wi kiq'ij ri i-dios ri ek'o pa ruwi' taq juyu', y chuqa' xeruwulaj-el ri porobel, y xubij chiwe rix winaqi' aj-Judá y aj-Jerusalem, richin tiporoj pom xaxe pa ruwi' jun porobel y tiya' ruq'ij ri i-Dios chiri'?

¹³ ¿Man iwetaman ta k'a ri xinben yin y ri wati't-numama', chike ri ch'aqa' chik tinamit? ¿Xetikir kami ri ki-dios xekikol kan ri kiruwach'ulew pa qaq'a'?

¹⁴ ¿Achike kami chike ri dios kichin ri ruwach'ulew ri' ri xekich'ek ri wati't-numama', ri xtikir ta xerukol kan ri ruwach'ulew ri' pa nuq'a'? ¿Achike roma rix nich'ob chi ri i-Dios nitikir yixrukol kan?

¹⁵ Roma ri' man kixq'olotej pa ruq'a' ri Ezequías. Man tinimaj rutzij, roma man jun dios chuwech re ruwach'ulew ri xtikir xukol ri rutinamit pa kiq'a' ri wati't-numama'. ¡K'a ta la' chik k'a ri i-Dios rix xkixrukol kan pa nuq'a'! nubij ri Senaquerib, xecha'.

¹⁶ Y ri aj-raqen ri e rutaqon-el ri Senaquerib kan janila k'a xech'on itzel chirij ri Jehová Dios, y chirij ri Ezequías ri rusamajel.

¹⁷ Ri Senaquerib kan xuben k'a k'iy wuj, akuchi janila nuyoq'-wi ri Jehová Dios richin ri Israel, y kere' nubij chirij: Achi'el xkiben ri ch'aqa' chik dios kichin ch'aqa' chik ruwach'ulew, ri man xetikir ta xekikol pa nuq'a', keri' chuqa' ri ru-Dios ri Ezequías man xtitikir ta xkerukol pa nuq'a' ri rutinamit, nicha'.

¹⁸ Ri aj-raqen kichin ri aj-labal aj-Asiria xkireq-apo kichi' chike ri winaqi' ri ek'o pa ruwi' ri tz'aq, y xech'on-apo pa kich'abel ri aj-Judá richin yekixibij y nikisech kik'u'x ri winaqi', y keri' yetikir nikich'ek ri tinamit.

¹⁹ Kan janila k'a yech'on chirij ri Dios richin ri Jerusalem, achi'el xech'on chikij ri ch'aqa' chik dios kichin ch'aqa' chik tinamit richin ch'aqa' chik ruwach'ulew, ri dios ri xa e banon koma achi'a'.

²⁰ Jak'a ri rey Ezequías y ri q'alajirisey ruch'abel ri Dios rubini'an Isaías, ruk'ajol kan ri Amós, xech'on rik'in ri Dios y xkik'utuj to'onik chila' chikaj.

²¹ Y ri Jehová xuteq-pe jun ángel richin xeruk'is konojel ri aj-labal aj-Asiria ri ek'o chiri'; chuqa' xek'is konojel ri aj-raqen y ri achi'a' ri k'o más kiq'ij. Chirij re' ri Senaquerib xtzolin pa rutinamit rik'in janila k'ix. Y k'o k'a jun q'ij, xapon pa rachoch ri ru-dios, y kan chiri' k'a xkamisex-wi kan chi espada koma ri ralk'ual.

²² Kere' xuben ri Jehová rik'in ri Ezequías y ri aj-Jerusalem; kan xerukol k'a pa ruq'a' ri Senaquerib, y chuqa' pa kiq'a' ri ch'aqa' chik winaqi' ri xeyakatej-pe chikij. Ri Jehová xuya' k'a uxlanenri'il chikikojol rije' y ri tinamit ri ek'o chunaqaj.

²³ K'ari' e k'iy k'a winaqi' ri man e aj-Judá ta xe'apon pa Jerusalem rik'in jalajoj ruwech sipanik ri xalex-pe pa kánima richin xkiya' chire ri Jehová. Chuqa' xkiya' sipanik ri janila rejqalen chire ri Ezequías, rey richin Judá. Jari' k'a toq xnimer kan ri rubi' chikiwech ch'aqa' chik ruwach'ulew.

²⁴ Y k'o k'a jun q'ij ri Ezequías xuk'uluwachij jun nimalej yabil. Jak'a rija' xch'on rik'in ri Jehová, y ri Jehová kan xuk'uluba-pe ri ruch'abel y kan xuya' jun retal chire chi keri' niberubana' rik'in.

²⁵ Jak'a man rik'in ri', rija' xa man xumatioxij ta ri xuben ri Dios rik'in. Xa xpe pa ránima richin janila xunimirisaj-ri', y roma ri' ri Jehová xuya-pe ri royowal pa ruwi' rija' y pa kiwi' konojel ri aj-Judá.

²⁶ Jak'a xa kan xuqasaj chik ri' chuwech ri Dios, y keri' chuqa' xkiben konojel ruwinaq chiri' pa Jerusalem. Y roma ri' ri Jehová man chik xuya' ta pe ruk'ayewal pa kiwi' rije' rokik k'a k'es na ri Ezequías.

Ri Ezequías xeruk'ul-apo ri aj-Babilonia ri e taqon-el

²⁷ Rija' kan xk'oje' k'a janila ruq'ij y rubeyomel, kan pa ruk'iyal k'a xk'oje' rik'in, ri saqipueq, q'anapueq, jalajoj jebelej taq abej, jubulej taq aq'om, tobel y jalajoj ruwech ri kan k'o kejqalen.

²⁸ Chuqa' xuben kiyakonabal ri jalajoj ruwech ixin, ri ruya'al uva y ri aceite. Keri' chuqa' xeruben kachabal ri jalajoj kiwech taq awej, y kiqejoj ri kokoj taq awej.

²⁹ Chuqa' xeruben-q'anej ch'aqa' chik tinamit. Ri karne'l kan pa q'ataj k'a xek'oje' rik'in, y kan keri' chuqa' ri ruwákix; ronojel re' roma ri Dios xuya' k'iy beyomel chire.

³⁰ Rija' xutz'apej k'a ri jun ruq'a-ya' ri nalex-pe pa Guihón ri k'o pa jotol, y xaxe jun rubey xuben chire ri nibe pa xulan. Y k'ari' xuk'uaj pa qajbel-q'ij pa rutinamit kan ri David. ronojel k'a ri xuben, kan utz xel chuwech.

³¹ K'o k'a jun q'ij ek'o ka'i-oxi' tata'al richin Babilonia xe'apon pa Jerusalem richin xebetzijon rik'in ri Ezequías pa ruwi' ri meyel banobel ri xbanatej pa ruwi' ri ruwach'ulew. Ri Dios xuya' q'ij chire ri Ezequías chi tuch'obo' ri k'atzinel richin nuben xaxe richin nutejtobej y niq'alajin ronojel ri k'o pa ránima.

Rukamik ri Ezequías

³² Ri ch'aqa' chik rubanobal ri Ezequías, y ri rujoyowanik ri xuben, xtz'ibex kan chupan ri wuj richin ri q'alajirisey ruch'abel ri Dios rubini'an Isaías, ruk'ajol ri Amós, y chupan ri kiwuj ri rey richin ri ruwach'ulew Judá y richin ri ruwach'ulew Israel.

³³ Y toq xken ri Ezequías, xmuq kik'in ri rati't-rumama' pa Jerusalem, kik'in ri e ralk'ual ri David. Y konojel winaqi' aj-Judá y aj-Jerusalem kan xkinimirisaj k'a ri rubi'. Y ri xk'oje' kan pa ruk'exel ja ri Manasés, ri ruk'ajol.