2 Crón 30 - Kaqchiquel Bible

Ri israelita xkinimaq'ijuj ri q'ij toq ri Jehová xuya' ri Solbelri'il

¹ K'ari' ri Ezequías xuteq rubixik chike ri winaqi' richin ri ruwach'ulew Israel y ri ruwach'ulew Judá chi kepe pa rachoch ri Jehová pa Jerusalem richin nikinimaq'ijuj ri q'ij toq ri Jehová xuya' ri Solbelri'il. Y chuqa' xuteq koyoxik ri aj-Efraín y ri aj-Manasés richin yek'oje' chupan ri nimaq'ij ri'.

² Ri rey toq xeruk'ulubej yan ri e tata'al y konojel ri winaqi' aj-Jerusalem, xkich'ob chi ja ri ruka'n ik' nikiben ri nimaq'ij ri'.

³ Xkich'ob nikinimaq'ijuj k'a chupan ri q'ij ri' roma man e k'iy ta sacerdote kich'ajch'ojirisan-ki', y chuqa' ri winaqi' man jani tikimol-ki' chiri' pa Jerusalem.

⁴ Ri ch'obonik ri' kan xqa' chuwech ri rey y chikiwech ri janila chi wineq.

⁵ Y jari' toq xkiteq k'a koyoxik chijun ruwach'ulew Israel, xtiker-el pa tinamit Beerseba, y xapon k'a pa tinamit Dan. Y xbix chike chi ke'apon pa Jerusalem richin nibenimaq'ijux ri q'ij toq ri Jehová xuya' ri Solbelri'il. Re nimaq'ij re' xa man banon ta k'a pe achi'el ri tz'ibatel kan.

⁶ Y keri' ri rey xeruteq k'a el ri e taluy wuj richin nibekiya' kan chupan chijun ri ruwach'ulew Israel y chuqa' chupan chijun ri ruwach'ulew Judá. Y kere' nubij ri wuj: Rix ri ix rijatzul kan ri Israel, titzolin-pe ik'u'x rik'in ri Jehová ri qa-Dios, y ri ki-Dios ri Abraham, ri Isaac y ri Israel, richin rija' xtitzolin-pe ruk'u'x iwik'in ri k'a ixk'o kan, rix ri xixkolotej kan pa kiq'a' ri rey richin Asiria.

⁷ Man tiben achi'el xkiben ri qate-qatata' y ri qach'alal. Rije' xa xeyakatej chirij ri Jehová ri Dios kichin kan ri qati't-qamama', y roma ri' rija' xuben chike richin xkik'uluwachij nima'q taq q'axo'n, y ri winaqi' richin ri ch'aqa' chik ruwach'ulew kan xkixibij k'a ki' toq xekitz'et. Y rix kan itz'eton k'a pe re'.

⁸ Man tikowirisaj k'a ri iwánima; man tiben achi'el xkiben ri qati't-qamama'. Xa kan tiqasaj k'a iwi' chuwech ri Jehová y kixanpe wawe' chupan re jay richin ri Jehová, ri kan rucha'on rija' richin niya'ox ruq'ij richin jantape'. Kan tisamajij k'a ri Jehová ri qa-Dios, richin xtik'o-el ri royowal chiqij.

⁹ Wi rix kan xtitzolin-pe ri iwánima rik'in ri Dios, rija' xtuben chi ri ye'etzelan iwichin xtikijoyowaj k'a kiwech ri iwach'alal y ri iwalk'ual, y kan xkekiteq k'a pe chupan re ruwach'ulew re'. Kere' xtuben ri Jehová ri qa-Dios roma rija' kan koch'onel-wi y xtujoyowaj iwech. Y kan xkixrak'axaj chik, wi rix kan xtitzolin-pe ik'u'x rik'in, xcha-el.

¹⁰ K'ari' ri e uk'uey rutzijol xebe y xeq'ax-el chupan ri kitinamit ri Efraín y ri Manasés y xe'apon k'a pa kiruwach'ulew ri Zabulón. Jak'a ri winaqi' xa xetze'en chikij y kan xekiyojobej k'a.

¹¹ Man rik'in ri' ek'o k'a ka'i-oxi' achi'a' ri e richin ri tzobaj ri Aser, ri Manasés y ri Zabulón ri xkiqasaj-ki' chuwech ri Dios, y xepe k'a pa Jerusalem.

¹² Chuqa' pa ruwach'ulew Judá, ri Dios kan xusiloj k'a ri kánima ri winaqi' richin tikibana' ri rubin kan rija' chire ri rey y ri e tata'al.

¹³ Y kan keri' ri xkiben. Kan e janila k'a e k'iy ri xkimol-ki' chupan ri ruka'n ik' chiri' pa Jerusalem richin xkinimaq'ijuj ri q'ij toq nitij ri kaxlan-wey ri maneq ch'amilej-q'or rik'in.

¹⁴ Xekiwulaj k'a el ronojel ri ch'aqa' chik porobel richin chikop y richin pom ri ek'o chiri' pa Jerusalem, y k'ari' xebek'aq kan pa siwan ri akuchi niq'ax-wi ri ch'uti'n raqen-ya' Cedrón.

¹⁵ Chupan k'a ri q'ij kajlajuj chire ri ruka'n ik' chire ri juna', ri winaqi' xkikamisaj k'a ri karne'l ri nikikusaj chupan ri nimaq'ij ri'. Roma ri' ri e sacerdote, y ri e levita kan janila k'a xek'ixbitej, y jari' toq xbekich'ajch'ojirisaj-pe-ki', y xkik'en-pe ri chikop richin niporox chijun.

¹⁶ Y toq k'o chi yek'oje' chiri', kan xek'oje' k'a chiri', achi'el nubij ri pixa' ri ruya'on kan ri Moisés ri rusamajel ri Dios. Y ri e sacerdote nikikaq'uj k'a ri kikik'el ri chikopi' chiri', ri niya'ox-apo chike koma ri e levita.

¹⁷ Jak'a man konojel ta ri winaqi' kich'ajch'ojirisan-ki' richin nikijech chire ri Dios ri ti chikop. Roma ri' ri e levita k'o chi xekikamisaj ri chikopi' richin ri nimaq'ij ri' ri kichin rije'.

¹⁸ Y kan e k'iy k'a winaqi' ri man kich'ajch'ojirisan ta ki' chupan ri kitzobaj ri Efraín, ri Manasés, ri Isacar y ri Zabulón. Man rik'in ri', rije' kan xewa' k'a chupan ri nimaq'ij ri', stape' man achi'el ta ri tz'iban kan. Y roma ri' ri Ezequías xch'on rik'in ri Dios pa kiwi' rije', y xubij: Jehová; rat ri kan janila at utz y kan k'o kuyubel awik'in, tabana' utzil takuyu' kimak re winaqi' re ek'o wawe', ri kan choj ri kánima y ri yatkikanoj rat.

¹⁹ Jehová Dios kichin ri qati't-qamama'; takuyu' kimak, stape' man kich'ajch'ojirisan ta ki' achi'el ri tz'ibatel kan chupan ri pixa', xcha'.

²⁰ Y ri Jehová kan xrak'axaj k'a ri xuk'utuj ri Ezequías, y kan xukuy k'a kimak ri winaqi'.

²¹ Chi wuqu' k'a q'ij ri israelita xkinimaq'ijuj k'a ri q'ij toq nitij kaxlan-wey ri maneq ch'amilej-q'or rik'in, ri chiri' pa Jerusalem. Ronojel re q'ij re' ri e sacerdote y ri e levita kan xkinimirisaj k'a ruq'ij ri Jehová rik'in bix y rik'in q'ojom.

²² Ri Ezequías xumatioxij k'a chike ri e levita ri kan k'o nojibel kik'in richin xkiben re samaj re'. Kan xkitej k'a ri ti'ij ri xsuj richin kamelabel chupan ri wuqu' q'ij ri', y chuqa' ri ti'ij ri richin ri sipanik ri nuq'alajirisaj chi ri winaqi' junan kiwech rik'in ri Jehová.

²³ Y konojel k'a ri winaqi' xkibij chi yenimaq'ijun chik wuqu' q'ij pa ruwi' ri xban yan, y kan keri' xkiben rik'in janila kikoten.

²⁴ Y roma ri' ri Ezequías, rey richin Judá, xusipaj chike ri winaqi' e 1,000 nima-alaji' achija' taq wákix y e 7,000 karne'l y tzuntzun. Chuqa' ri e tata'al xkisipaj chike ri winaqi' e 1,000 alaji' achija' taq wákix y e 10,000 karne'l y tzuntzun. Y k'ari' e k'iy chik sacerdote ri xkich'ajch'ojirisaj-ki'.

²⁵ Ri e sacerdote y ri e levita kan janila k'a xekikot, e kachibilan konojel ri aj-Judá, ri israelita ri e peteneq pa xaman y ri winaqi' ri man e israelita ta ri ek'o-qa chikikojol.

²⁶ Kan janila k'a kikoten xk'oje' chiri' pa Jerusalem, roma k'a ja re' xnatex chik re nimaq'ij re' ri kan pa ruq'ijul kan ri Salomón ruk'ajol kan ri rey David ri banon kan.

²⁷ Chirij ronojel re', ri e sacerdote y ri e levita keri' e pa'el xkiya' urtisanik pa kiwi' ri winaqi'. Y ri Dios kan xrak'axaj k'a ri kich'owen k'a chila' chikaj, akuchi k'o-wi Rija'.