2 Crón 28 - Kaqchiquel Bible

¹ Ri Acaz k'o k'a juwineq rujuna' toq xuchop nuq'et-tzij pa ruwi' ri ajawaren Judá chiri' pa Jerusalem, y waqlajuj k'a juna' xq'aton-tzij, jak'a ri rubanobal kan man utz ta k'a chuwech ri Dios; man xuben ta achi'el xuben ri David ri rumama'.

² Xa kan xuben achi'el xkiben ri rey richin Israel ri ek'o pa xaman; kan xeruben k'a wachibel kichin ri Baal, ri banon rik'in q'eqapueq ya'erisan pa q'aq'.

³ Xuporoj k'a pom chiri' pa taq'aj kojol juyu' richin Ben-hinom. Chuqa' kan xeruporoj ralk'ual richin kamelabel achi'el xekiben ri winaqi' ri xek'oje' chiri' ojer. Re banobel re' man xqa' ta chuwech ri Jehová, y roma ri' xe'elesex-pe chikikojol ri israelita ri ojer taq winaqi' ri'.

⁴ Xuporoj pom, y xusuj kamelabel chupan ri kachoch ri ch'aqa' chik dios, chuqa' akuchi nikiya-wi kiq'ij ri wachibel ri pa ruwi' taq juyu', y chuxe' ronojel taq che' ri k'o kixaq.

⁵ Roma ri' ri Jehová Dios xerujech pa ruq'a' ri rey richin Siria richin xech'akatej, y e k'iy k'a winaqi' aj-Judá xe'uk'uex-el k'a pa Damasco. Chuqa' kan xerujech pa ruq'a' ri Pécah rey richin Israel y kan e k'iy k'a xerukamisaj.

⁶ Ri rey Pécah, ruk'ajol ri Remalías, y ri aj-labal aj-Israel xekikamisaj pa jun q'ij chiri' pa Judá e 120,000 achi'a' ri maneq xibinri'il chikiwech. Konojel k'a xekamisex roma xkimalij kan ri Jehová, ri ki-Dios kan ri kati't-kimama'.

⁷ Chuqa' ri Zicrí, jun achin ri kan k'o ruchuq'a' aj-Efraín, xerukamisaj kan ri Maaseías, ri ruk'ajol ri Acaz, ri Azricam aj-raqen richin ri jay akuchi niq'aton-wi-tzij ri Acaz, y ri Elcaná, ruka'n q'atoy-tzij chire ri rey.

⁸ Chirij re' ri aj-labal aj-Israel xekik'en-pe e 200,000 winaqi' aj-Judá: Chi ixoqi', xtani', alaboni' y kan xkimej k'a pe chuwi-kiq'a' ronojel ri kan k'o rejqalen richin xkik'uaj pa Samaria.

⁹ Y chiri' k'o k'a jun q'alajirisey ruch'abel ri Dios rubini'an Oded. Rija' xeberuk'ulu-el ri aj-labal ri xetzolin-pe pa Judá chiri' chuchi' ri Samaria, y xubij chike: Ri Jehová ri ki-Dios kan ri qati't-qamama' xpe royowal pa kiwi' ri aj-Judá, y roma ri' xerujech pan iq'a' rix. Jak'a rix xa kan rik'in janila iwoyowal xe'ikamisaj kan, y re banobel re' kan xapon-q'anej k'a chila' chikaj.

¹⁰ Keri' chuqa' rix kan ich'obon chi ri winaqi' aj-Judá y aj-Jerusalem, chi achi'a' chi ixoqi', ye'ok samajela' ri yeyuqe' pa samaj iwik'in. Jak'a rik'in ronojel re yixtajin chubanik, rix kan ix makuwineq chuwech ri Jehová ri qa-Dios.

¹¹ Y roma ri' tinimaj k'a ri xtinbij chiwe: Más utz, ke'ibetzolij kan re winaqi' re xe'ik'en-pe, roma rije' xa kan e iwach'alal chuqa'. Roma re ibanobal re' ri Jehová kan janila xyakatej royowal chiwij, xcha'

¹² Y ek'o k'a ka'i-oxi' achi'a' ri k'o más kiq'ij chiri' pa ruwach'ulew Efraín, y ja rije' xe'el-el richin xebepa'e' chikiwech ri e tzolejineq-pe pan oyowal. Rije' kibini'an Azarías ruk'ajol ri Johanán, ri Berequías ruk'ajol ri Mesilemot, ri Ezequías ruk'ajol ri Salum, y ri Amasá, ruk'ajol ri Hadlai.

¹³ Rije' xkibij k'a chike ri aj-labal: Man ye'ik'en ta pe wawe' ri winaqi' ri e ik'amon-pe pan oyowal, roma re' xa kan xtuben chiqe chi yojmakun más chuwech ri Jehová stape' ri qamak xa kan xik'o yan ruwi'. Wi rix xke'ik'en-pe ri winaqi' ri' wawe', ri Dios xa kan más k'a xtipe royowal chire ri qaruwach'ulew Israel, xecha' rije'.

¹⁴ K'ari' ri aj-labal xekiya' kan ri winaqi' ri e kik'amon-pe pan oyowal; keri' chuqa' ri xkimej-pe ri k'o rejqalen chuwi-kiq'a' ri aj-Judá, y xekijech kan pa kiq'a' ri achi'a' ri' y pa kiq'a' ri winaqi' ri aj chiri'.

¹⁵ K'ari' xekanox achi'a' richin xekichop ri winaqi' ri xejach kan pa kiq'a', y xekiwiq ri maneq kitziaq kikusan, rik'in ri k'o rejqalen ri majon-pe chuwi-kiq'a' ri aj-Judá. Chuqa' xya'ox kixajab ri maneq kixajab; Xetzuq k'a y xya'ox-el jubulej taq aq'om chikij. Chirij re' xech'okobex-el chikij taq bur konojel ri maneq kuchuq'a' richin yebiyin, y xebekiya' kan k'a pa tinamit Jericó, ri chuqa' nibix Tinamit Richin Palma chire, y xebeya'ox kan kik'in ri kachkiwinaq. K'ari' rije' xetzolin pa Samaria.

¹⁶ Chupan ri q'ij ri', ri Acaz rey richin Judá xeruteq achi'a' rik'in ri rey richin ri ruwach'ulew Asiria, richin xuk'utuj-el to'onik,

¹⁷ roma ri aj-Edom xepe richin nikiben oyowal kik'in ri aj-Judá y kan ek'o winaqi' xekik'uaj-el.

¹⁸ Keri' chuqa' ri aj-Filistea xe'ok chupan ri tinamit ri e richin Judá ri ek'o chuwa taq juyu' y ri ek'o pa xokon chire ri Judá. Xekich'ek k'a ri tinamit Bet-semes, ri Aialón, ri Guederot, y chuqa' ri Socó, ri Timná y ri Guimzó, kachibilan ri kokoj taq kitinamit. Y ri aj-filistea kan xebek'oje' k'a chiri'.

¹⁹ Rik'in re' ri Jehová xuqasaj kiq'ij ri aj-Judá roma ri Acaz kan xeruk'uaj ri ruwinaq chupan ri itzel bey, kan achi'el ri rumak rija'.

²⁰ K'ari' ri rey richin Asiria ri rubini'an Tiglat-piléser, xbe rik'in ri Acaz, jak'a pa ruk'exel richin xuya' ta ruchuq'a', xa xuya' pa k'ayew.

²¹ Ri Acaz xuya' ronojel ri kan k'o rejqalen richin pa rachoch ri Jehová, y ri ek'o pa rachoch rija' y ronojel ri kichin ri e tata'al, richin xuya' chire ri rey richin Asiria. Stape' kan kere' xuben, man xuto' ta.

²² Stape' ri itzel rey Acaz kan k'o k'a pa ruk'ayewal, kan jantape' k'a nimakun chuwech ri Jehová.

²³ Ri Acaz kan xusuj kamelabel chuwech ri ki-dios ri aj-Damasco roma xa xch'akatej pa kiq'a' rije'. Xubij k'a rija': Ri rey richin Siria xeto'ox koma ri ki-dios; yin chuqa' kan xtinsuj k'a kamelabel chikiwech richin yinkito', xcha-qa. Y roma ri' xpe wululen pa ruwi' rija' y pa ruwi' ronojel ri ruwach'ulew Judá.

²⁴ Ri Acaz kan xerumol ruchi' ronojel samajibel richin ri rachoch ri Dios, y kan xerupaxila' kan, y xutz'apej k'a ruchi' ri rachoch ri Jehová, y xubij chi keban k'iy porobel kichin ri ch'aqa' chik dios ri chiri' pa Jerusalem.

²⁵ Chuqa' xuben ri akuchi nikiya-wi kiq'ij ri wachibel ri pa ruwi' taq juyu' chiri' chupan ronojel ri tinamit richin Judá, akuchi yeporox-wi pom chikiwech ri ch'aqa' chik dios, y re' kan xuben richin xuyek royowal ri Jehová ri ki-Dios ri rati't-rumama'.

²⁶ Ri ch'aqa' chik rubanobal ri Acaz, ri pa rutikeribel k'a pa ruk'isibel chire ri ruk'aslen, xtz'ibex kan chupan ri wuj kichin ri rey richin Judá y richin Israel.

²⁷ Y toq xken, xmuq kik'in ri rati't-rumama' chupan ri Jerusalem, jak'a man xmuq ta chikikojol ri rey e richin Judá. Ri xk'oje' kan pa ruk'exel ja ri Ezequías, ri ruk'ajol.