2 Crón 26 - Kaqchiquel Bible

¹ K'ari' ri winaqi' ri e richin ri Judá xkikusaj kan rey pa ruk'exel ri Amasías jun chike ri ruk'ajol, ri rubini'an Uzías,*f13* y k'o k'a waqlajuj rujuna' toq xok kan rey.

² Ja rija' xpaban chik q'anej ri tinamit Elat richin xok chik kan richin ri Judá.

³ K'o k'a waqlajuj rujuna' toq xok kan rey, y xuq'et k'a tzij kawineq kablajuj juna' pa ruwi' ri ajawaren richin Judá chiri' pa Jerusalem; ri rute' rubini'an Jecolías aj-Jerusalem.

⁴ Ri Ozías kan xutaqej k'a ri nubij ri pixa' richin ri Jehová, achi'el xuben ri Amasías ri rutata'.

⁵ Rokik k'es ri Zacarías ri rutijonel, ri Ozías kan xuya' ruq'ij ri Jehová, y roma ri' ri Jehová kan xuben chire chi utz xel chuwech ronojel.

⁶ Xberubana' k'a oyowal kik'in ri aj-Filistea y xuwulaj k'a ri tz'aq ri rusutin-rij ri tinamit Gat, ri rusutin-rij ri tinamit Jabnia y ri rusutin-rij ri tinamit Asdod. Rija' kan xerupaba-q'anej ch'aqa' chik tinamit chunaqaj ri tinamit ri', pa kiruwach'ulew ri aj-Filistea.

⁷ Ri Dios kan xuto' pa kiq'a' ri aj-Filistea, ri aj-Arabia ri ek'o pa ruwach'ulew Gur-baal y pa kiq'a' ri meunita.

⁸ Ri aj-Amón xkiya' k'a ri kan k'o chi nikitoj chire ri Ozías. Ri rutzijol ri rubanobal ri Ozías kan xbe k'a nej-naqaj, y xapon k'a pa ruk'ulba't ri Egipto roma kan xnimer ri ruchuq'a'.

⁹ Chuqa' kan xerupaba-q'anej kachoch ri chajinela' pa ruwi' ri tz'aq richin yechajix ri ruchi' ri tinamit Jerusalem; jun xuben chuxikin-apo ri ruchi' ri akuchi nusutij-el-ri' ri tz'aq, jun chik xuben chuxikin-apo ri ruchi' ri k'o chunaqaj ri tz'aq ri' y ri jun chik chuxikin-apo ri ruchi' ri k'o pa ruchojmilal ri taq'aj kojol juyu' ri k'o pa xokon chire ri tinamit.

¹⁰ Ri Ozías chuqa' xerupaba-q'anej kachoch ri chajinela' pa tz'iran ruwach'ulew. Rija' kan janila e k'iy rawej ek'o, y roma ri' xeruk'otola' k'iy pozo richin ye'uk'ya' ri rawej ri e ruya'on chuwa taq juyu' y ri ek'o chuchi' ri palou. Chuqa' ek'o rusamajela' ri yesamej ri akuchi rutikon-wi-qa uva y ri akuchi k'o-wi ri jalajoj ruwech rutiko'n ri e rubanon chuwi' taq juyu'; y kan k'iy k'a ruqejoj k'o roma kan niqa' chuwech ri samaj richin pa juyu'.

¹¹ Ri Ozías ek'o k'a janila chi aj-labal rik'in. Y e ruch'aralon pa taq tzobaj richin yebe pan oyowal. Ri kajlabal kan achi'el ri rubanon kan ri Jehiel ri tz'ibanel, y ri Maaseías jun chike ri aj-raqen pa kiwi' ri aj-labal, ri ek'o chuxe' rutzij ri Hananías, jun chike ri aj-raqen kichin ri rusamajela' ri rey.

¹² Y pa kiwi' ri jujun tzobaj, k'o jun aj-raqen ri kan k'o ruchuq'a' y maneq xibinri'il chuwech. Ri kajlabal konojel ri aj-raqen pa kiwi' ri tzobaj ri' e 2,600.

¹³ Y pa kiq'a' rije' ek'o 307,500 achi'a' ri janila kuchuq'a', ri kan yetikir nikito' ri rey chikiwech ri e etzelanel richin.

¹⁴ Ri Ozías xunaba' k'a chike ri achi'a' ronojel ri tobel, ri kum, ri rutobal kijolon, ri tobel ruwa-kik'u'x, ri rute-ch'ab y ri ikeq'.

¹⁵ Chuqa' xeban k'aqbel taq abej y rute-ch'ab ri chiri' pa Jerusalem, ri xeya'ox pa kiwi' ri jay kichin ri chajinela' y ri más pa jotol chire ri tz'aq, richin chi k'a chiri' yek'aq-wi pe ri ch'ab y ri nima'q taq abej. Ri rutzijol ri rubanobal ri Ozías kan nej k'a xapon-wi roma kan ja ri Dios ri xya'on ri runa'oj y xuto', y roma ri' kan xnimer ri ruchuq'a'.

Ri Ozías xujech'ej kan ri' rik'in ri Jehová

¹⁶ Jak'a toq xuna' chi k'o chik ruchuq'a' jebel chupan ri ruq'atbal-tzij, jari' toq janila xunimirisaj-ri', y jari' xbanon chire chi xtzaq. Rija' man xunimaj ta ri rutzij ri Jehová ri ru-Dios, y roma ri' ja rija' xbeporon ri pom pa rachoch ri Jehová pa ruwi' ri porobel.

¹⁷ Chirij rija' xok-apo ri nimalej sacerdote Azarías e rachibilan k'a el e jumuch' sacerdote ri e richin ri Jehová, achi'a' ri maneq xibinri'il chikiwech.

¹⁸ Y xkipaba' k'a ki' chuwech ri rey Ozías, y xkibij chire: Rey Ozías, man naporoj pom chuwech ri Jehová, roma re samaj re' man ruk'amon ta chi rat yabano, ja roj ri oj sacerdote ri oj rijatzul kan ri Aarón ri oj cha'on kan richin niqaben. Katel-pe chiri' qajaw, chupan ri jay richin ri Dios, roma kan yamakun-wi chuwech ri Jehová, rija' kan man xtunimirisaj ta ri abi' roma ri naben, xecha' chire.

¹⁹ Ri sacerdote y ri Ozías ek'o k'a pa runik'ajal ri rachoch ri Jehová akuchi k'o-wi ri porobel richin pom. Ri Ozías kan ruk'uan k'a pa ruq'a' jun porobel-pom richin nusuj pom chuwech ri Dios. Toq xrak'axaj ri xkibij ri sacerdote, jari' toq xyakatej royowal chikij; y kan chupan k'a ri ramaj ri', chikiwech rije', xbek'ulun-pe jun itzelej yabil nik'aj-ruwech ri kan nutaluj-ri'.

²⁰ Jari' toq ri Azarías y ri ch'aqa' chik sacerdote xkitz'et chi xbe'el-pe ri jun itzel yabil ri' nik'aj-ruwech, y rije' kan chi'anin k'a xkelesaj-pe chiri'; y rija' kan man xupaba' ta chik ri', roma kan ja ri Jehová xya'on re ruk'ayewal re' pa ruwi'.

²¹ Chirij ri' ri rey Ozías kan xk'oje' k'a ri yabil ri' chirij janipe' chik q'ij xk'ase-el. Xch'ar k'a el ruyon pa jun jay, y kan man xya'ox ta chik q'ij chire richin xapon pa rachoch ri Jehová. Y ja ri Jotam ri ruk'ajol, ri xk'oje' kan pa ruwi' ri jay richin q'atbel-tzij, y chuqa' pa ruwi' ri ruwach'ulew.

²² Ri rutikeribel y ri ruk'isibel chire ri rubanobal ri Ozías xutz'ibaj kan ri q'alajirisey ruch'abel ri Dios rubini'an Isaías, ruk'ajol kan ri Amós.

²³ Toq xken ri Ozías, xa ja ri akuchi yemuq-wi ri ach'alalri'il kichin ri e rey xmuq-wi, roma k'o ri yabil ri' chirij. Y ri xk'oje' kan pa ruk'exel ja ri Jotam, ri ruk'ajol.