2 Crón 19 - Kaqchiquel Bible

Ri Jehú xuch'olij ri Josafat

¹ Ri Josafat rey richin Judá xtzolin-el rik'in uxlanibel-k'u'x chirachoch chiri' pa Jerusalem.

² Y xbek'ul roma jun achin ri nitz'eton ri peteneq chiqawech y rija' rubini'an Jehú, ruk'ajol ri Hananí y xubij chire ri Josafat: ¿Achike roma ye'ato' ri maneq Dios chikiwech, y at kachibil ri e etzelanel richin ri Jehová? Roma re banobel re', ri Jehová xpe royowal chawe.

³ Jak'a ri Dios k'o ch'aqa' utz ri rutz'eton chawij, roma xe'awelesaj-el chupan re ruwach'ulew ri kiwachibel Asera, y kan atijon-pe aq'ij richin nakanoj ri Dios rik'in ronojel awánima, xcha' ri Jehú.

Ri Josafat xerukanoj to'onela'

⁴ Xk'oje' k'a ri Josafat chiri' pa Jerusalem, jak'a nibe-nipe xuben chupan chijun ri ajawaren, nitiker-el pa Beerseba y napon k'a chuwi' taq juyu' richin Efraín. Xuben k'a chike ri winaqi' richin yetzolin rik'in ri Jehová ri ki-Dios ri kati't-kimama'.

⁵ Xeruya' k'a to'onela' chupan ri jalajoj tinamit ri tz'apen-kij chi tz'aq richin ri ajawaren.

⁶ Y xubij chike ri to'onela': Titz'eta' jebel ri niben, roma man niq'et ta tzij pa ruk'exel ri wineq; xa kan yixq'aton k'a tzij pa ruk'exel ri Jehová, y ja rija' k'a ri xtik'oje' chi'ikojol toq rix xtiq'et-tzij.

⁷ Tik'oje' rukiy ri Jehová ri qa-Dios chiwech y titz'eta' jebel ri ye'iben, roma rija' man utz ta nutz'et ri man pa ruchojmilal ta ye'iben, chuqa' chi man junan ta niben kik'in ri winaqi' y toq yepuaqix ri q'atoy taq tzij.

⁸ Chuqa' ri Josafat xeruya' to'onela' ri chiri' pa Jerusalem. Xerucha' k'a ri levita, ri sacerdote, y aj-raqen pa kiwi' ri tzobaj winaqi' richin ja rije' ri yechojmirisan ri yebanatej pa ruwi' ri rusamaj ri Dios, y pa ruwi' ri ch'ojikil chikiwech ri winaqi' aj-Jerusalem.

⁹ Y kere' xubij-el chike konojel ri to'onela': Rix kan jantape' k'a tik'oje' rukiy ri Jehová chiwech, y tibana' k'a ronojel rik'in ruch'ajch'ojil iwánima y man tijel rubanik ri iq'atoj-tzij.

¹⁰ Chupan xabachike ch'ojinik ri nikik'en-pe chiwech ri iwinaq ri ek'o pa taq jalajoj tinamit, kan tiq'ata' k'a tzij pa ruchojmilal richin chi rije' nich'uch'u-el kánima, y keri' man yemakun ta chuwech ri Dios, ni chiwech rix, ni chikiwech rije' chi kachibil-ki'. Wi keri' xtiben, rix kan maneq k'a imak chire ri achike xtikiben rije', stape' pa ruwi' jun kamik o wi nikik'utuj chiwe chi tiq'alajirisaj chikiwech ri jalajoj ruwech pixa'.

¹¹ Jak'a ri Amarías ri nimalej sacerdote, ja rija' ri xtiq'aton-tzij pa ruwi' ronojel ri rusamaj ri Jehová, y ja ri Zebadías ruk'ajol ri Ismael, ri tata'al pa kiwi' ri aj pa rachoch ri Judá, ja rija' ri xtik'oje' pa ruwi' ronojel ri nibanatej chupan ri ajawaren. Chuqa' ri e levita kan ja rije' ri xketo'on iwichin chupan re samaj re'. Kan titija' k'a iq'ij richin niben ri samaj, y ja ri Jehová xtik'oje' iwik'in wi utz xkixsamej, xcha' ri rey.