2 Crón 18 - Kaqchiquel Bible

Ri rey Josafat xjunamatej ruwech rik'in ri rey Acab

¹ Toq ri Josafat k'o chik pa ruk'iyal ri rubeyomel y kan k'o chik ruq'ij, jari' toq xok rachjinan ri Acab, rey richin Israel.

² Xq'ax yan k'a ka'i-oxi' juna', y ri Josafat xbe-qa pa tinamit Samaria richin xberuq'ejela' ri rey Acab, y roma ri' ri Acab xerukamisaj e k'iy karne'l y wákix richin xwa' ri Josafat y ri e beneq chirij, y xubochi'ij chi junan yeyakatej richin nibekibana' oyowal pa ruwi' ri tinamit Ramot ri k'o pa Galaad.

³ Y roma ri' ri Acab rey richin Israel xuk'utuj chire ri Josafat rey richin Judá y xubij: ¿Nawajo' kami chi junan ta nibeqabana' oyowal pa ruwi' ri Ramot ri k'o pa Galaad?, xcha'. Y ri Josafat xubij: Ri wichin yin awichin rat; y ri nuwinaq yin e awinaq rat. Roj kan xqojbe k'a awik'in pa labal,

⁴ jak'a kan tiqak'ulubej na ri Jehová achike na nubij rija' chiqe, xcha'.

⁵ Y k'ari' ri Acab xerumol konojel ri e q'alajirisey ruch'abel ri ki-dios, y xkimol k'a ki' e 400 achi'a', y xuk'utuj chike: ¿Utz kami chi yibe richin ninbenbana' oyowal pa ruwi' ri Ramot ri k'o pa Galaad, o xa ninmalij-qa?, xcha'. Y rije' xkibij chire chi utz nibe roma ri ki-dios kan xtujech pa ruq'a'.

⁶ Jak'a ri Josafat xuk'utuj wi k'o ta jun q'alajirisey ruch'abel ri Jehová chiri' richin nikik'ulubej.

⁷ Y ri Acab xubij chire ri Josafat: K'a k'o na kan jun achin rubini'an Micaías ruk'ajol ri Imlá ri achoq ik'in niqak'ulubej-wi achike nubij ri Jehová, jak'a yin kan itzel nina' chire roma man jun bey nuk'en ta pe utzilej taq rutzijol chuwe, xcha'. Y ri Josafat xubij chire ri Acab chi man tich'on itzel chirij ri achin ri'.

⁸ Y keri' ri Acab xroyoj jun chike ri rusamajel y xubij chire chi tiberuk'ama' ri Micaías ruk'ajol ri Imlá.

⁹ Y ri Acab y ri Josafat rey richin Judá e tz'uyul pa kich'akat y kikusan ri kitziaq richin rey, chiri' akuchi niban-wi molojri'il chuwech-apo ri ruchi' ri tinamit Samaria, y konojel k'a ri e q'alajirisey ruch'abel ri ki-dios kan ye'ajin nikik'ul ri achi'el achik' chikiwech ri e ka'i' rey ri'.

¹⁰ Y jun k'a chike rije' ri rubini'an Sedequías, ruk'ajol ri Quenaaná, e rubanon ka'i' oxi' ruwachibel uk'a' rik'in q'eqapueq, y rija' xuq'alajirisaj k'a: Kere' nubij ri Jehová: Rik'in k'a re uk'a' re' xke'ikoq'ila-wi ri aj-Siria achi'el nitoq'on jun wákix, k'a toq xkek'is na pan iq'a', xcha' chike.

¹¹ Y ri ch'aqa' chik e q'alajirisey ruch'abel ri ki-dios junan ri kich'abel y nikibij chi kan utz wi chi yebe pa Ramot richin nibekibana' oyowal, y kan ja ri Acab ri xtich'akon, roma ri Jehová kan xkerujech pa ruq'a' rija' ri aj-Siria.

¹² Y toq xapon ri oyonel rik'in ri Micaías, xubij chire: Konojel ri e q'alajirisey ruch'abel ri qa-dios junan ri ch'abel nikibij chire ri rey, chi ja rija' xtich'akon. Wakami k'a ri ach'abel rat kan ta k'a achi'el ri kich'abel rije', xcha'.

¹³ Jak'a ri Micaías xubij: Chuwech k'a ri k'aslik Jehová, ninbij chi achike xtubij ri Jehová chuwe, jari' ri xtinbij yin, xcha' chire ri oyonel richin.

¹⁴ Ri Micaías kan xbe k'a, y toq xapon, ri Acab xuk'utuj k'a chire chi wi utz nuchop oyowal pa ruwi' ri Ramot, o xa numalij-qa. Y ri Micaías xubij chire: Kabiyin; tabebana' oyowal, roma kan jujik-wi chi kan ja rat ri xkach'akon, roma ri Jehová kan xtujech pan aq'a' rat, xcha'.

¹⁵ Y ri Acab xubij chik chire: ¡Janipe' mul nubin chik chawe chi toq rat yach'on wik'in pa rubi' ri Jehová, kan tabij k'a ri qitzij chuwe!, xcha'.

¹⁶ K'ari' rija' xubij chire ri Acab: Yin nintz'et chi konojel ri winaqi' israelita kitalun-ki' pa ruwi' taq juyu', achi'el taq karne'l ri maneq kiyuq'unel. Y ri Jehová nubij k'a chi konojel re winaqi' re' xa maneq kajaw. Roma ri' taya' q'ij chike chi chikijujunal ketzolin chi taq kachoch rik'in uxlanibel-k'u'x, xcha' ri Micaías.

¹⁷ K'ari' ri Acab xubij-apo chire ri Josafat: ¡Xinbij-wi chawe, chi rija' kan man jun bey nuk'en ta pe utzilej taq rutzijol chuwe, xa kan xaxe ri itzel rutzijol nuk'en-pe chuwe!, xcha'.

¹⁸ Y ri Micaías xch'on chik y xubij: Wakami k'a, tawak'axaj k'a ri nubij ri Jehová. Yin kan xintz'et ri Jehová tz'uyul pa rutz'uyubal, y ek'o-apo ri ángel rik'in y kan man e ajlatel ta; ek'o pa rijkiq'a' y pa rajxokon rija'.

¹⁹ Y ri Jehová xuk'utuj chike ri ángel ri achike ta chike rije' nitikir nibebanon chire ri Acab chi niberubana' oyowal pa ruwi' ri Ramot ri k'o pa Galaad, y nibe xaxe richin nibeken kan. Y konojel ri ángel xech'owiyaj k'a chikiwech, y jun wi nikibij ri ch'aqa', y jun wi chik ri nikibij ri ch'aqa' chik.

²⁰ Y kan jari' xbepapo' jun espíritu chuwech ri Jehová y xubij chire chi rija' nitikir niberubana' ri samaj ri'. Y ri Jehová xuk'utuj chire achike rubanik xtuben.

²¹ Y ri espíritu ri' xubij chi rija' xtibe y xtok jun espíritu richin tz'ukuj-tzij, y xtuben chike ri achi'a' ri e q'alajirisanela' richin xtikitz'uk-tzij. Y k'ari' ri Jehová xubij chire chi tibe y tiberubana' roma kan nitikir nuben chire ri Acab chi nibe y niken kan.

²² Y keri' ri Jehová xuya' q'ij chi jun itzel espíritu xok pa kichi' re q'alajirisey ach'abel, richin xkitz'uk-tzij chawech, roma ri Jehová kan rubin chik chi k'o xtabek'uluwachij, xcha' ri Micaías chire ri Acab.

²³ K'ari' xjel-apo ri Sedequías ruk'ajol ri Quenaaná rik'in ri Micaías y xuya' jun q'a' chupalej, y xubij chire: ¿Achi'el toq xel-el ri espíritu richin ri Jehová wik'in yin, y xa awik'in chik rat nich'on-wi?, xcha'.

²⁴ Y ri Micaías xubij chire: Xtibeq'ax chawech k'a ja ri q'ij toq xtabeq'oq'oj-awi' pa jun jay richin xtabewewaj-awi', xcha'.

²⁵ K'ari' ri Acab xubij chi tichap-el ri Micaías, y tuk'uex-el chuwech ri Joás ri ruk'ajol rija', y chuwech ri Amón, ri q'atoy-tzij richin ri tinamit.

²⁶ Y xubij-el chi tibix chike rije' chi tikitz'apej pa jay ri achin ri', y tichajix jebel richin man nanimej, y xaxe juba' wey y juba' ya' tiya'ox chire k'a toq xtitzolin na pe rija' pan oyowal.

²⁷ Y ri Micaías xubij chire ri Acab: Wi rat xkatzolin-pe rik'in uxlanibel-k'u'x, man ja ta k'a ri Jehová ri xbin chuwe ri xinbij chawe. Y chike ri winaqi' xubij chike: Rix kan xiwak'axaj k'a ri xinbij chire ri Acab, xcha'.

²⁸ Y keri' ri Acab rey richin Israel junan rik'in ri Josafat rey richin Judá xebe pan oyowal chiri' pa Ramot ri k'o pa Galaad.

²⁹ Y ri Acab xubij chire ri Josafat: Yin xtinjel-el nuwech y xkinok-apo chupan ri oyowal, jak'a rat takusaj ri atziaq richin rey, xcha'. Y keri' ri Acab kan xujel k'a el ruwech y xbe pan oyowal.

³⁰ Ri rey richin Siria kan rubin wi k'a el chike ri e juwineq kablajuj aj-raqen ri ye'uk'uan ri carruaje chi man nikiben ta oyowal kik'in xabachike; xa kan xaxe rik'in ri rey richin Israel.

³¹ Y keri' k'a toq ri aj-raqen kichin ri e uk'uayon ri carruaje xkitz'et ri Josafat, xkich'ob chi ja rija' ri rey richin Israel, y xepe chirij richin nikiben oyowal rik'in, jak'a ri Josafat xsik'in richin nito'ox. Y ri Jehová kan xuto', y xuben chike ri e etzelanel richin chi xkijech'ej-el-ki' chire rija'.

³² Toq ri aj-raqen ri e uk'uayon ri carruaje xkitz'et chi xa man ja ta rija' ri rey richin Israel man xkoqotaj ta chik.

³³ Y k'o k'a jun chike ri aj-labal aj-Siria ri xuk'eq jun ch'ab choj keri', y xumej ri Acab rey richin Israel. Ri ch'ab kan choj xok ri akuchi rutunun-wi-ri' ri rutobal, y k'ari' ri Acab xubij chire ri uk'uayon ri carruaje: Tapiskolij-awi' chi'anin richin yinawelesaj-el wawe' roma xa xisokotej yan, xcha'.

³⁴ Y chijun k'a ri q'ij ri' kan janila nim ri oyowal ri xbanatej, y ri Acab kan chiri' k'a chupan ri ru-carruaje xpa'e-wi chikiwech ri aj-Siria, y ri rukik'el xbiyin k'a chupan ri ru-carruaje; y chupan k'a ri tiqaq'ij ri' xken-qa.