2 Crón 11 - Kaqchiquel Bible

¹ Y toq ri ch'aqa' chik tzobaj richin ri tinamit Israel xkak'axaj chi ri Jeroboam xtzolin-pe, konojel ri winaqi' xkimol-ki' richin nikiben rey chire pa ruwi' ri ruwach'ulew Israel; y kan xaxe chik k'a ri tzobaj richin ri Judá ri xtzeqeliben richin ri Roboam.

² Y toq ri Roboam xapon ri chiri' pa tinamit Jerusalem, rija' kan jari' xuteq koyoxik ri achi'a' richin ri tzobaj richin Judá y Benjamín. Chikikojol konojel ri', xerucha' k'a e 180,000 aj-labal, richin nibekibana' oyowal kik'in ri lajuj chik tzobaj israelita, y keri' nitzolin ta chik chijun ri ajawaren pa ruq'a' ri Roboam, ruk'ajol kan ri Salomón.

³ Ri Jehová xch'on-pe rik'in jun q'alajirisey ruch'abel, ri rubini'an Semaías, y xubij chire:

⁴ Kabech'on rik'in ri Roboam ri rey richin Judá, kik'in konojel ri ruwinaq, y ri winaqi' aj-Benjamín, y ri ch'aqa' chik winaqi' ri ek'o chiri' y tabij chike:

⁵ Ri Jehová nubij chi man yixbe ta richin nibebana' oyowal kik'in ri qach'alal ri e rijatzul kan ri Israel. Más utz kixtzolin chi'ijujunal chi'iwachoch, roma kan ja ri Jehová ri xya'on q'ij chi keri' xbanatej, xkacha' chike, xcha' ri Jehová chire ri Semaías. Toq ri winaqi' xkak'axaj ronojel re', rije' kan xkinimaj k'a ri ruch'abel ri Dios y xetzolej k'a chi taq kachoch.

Toq xch'akon ri Roboam

^6-10 Ri Roboam xk'oje-qa pa Jerusalem y xupaba' chik q'anej ri tinamit ri k'o pa ruwach'ulew Judá y Benjamín, ri e tz'apen-kij chi tz'aq. Ja tinamit re': Belén, Etam, Tecoa, Bet-sur, Socó, Adulam, Gat, Maresá, Zif, Adoraim, Laquis, Azecá, Sorá, Aialón y ri Hebrón.

¹¹ Ri chiri' chupan ri tinamit ri', xeruchojmirisaj-qa ri jay ri e tz'apen-kij chi tz'aq y xeruya' aj-raqen pa kiwi', y chiri' xeruyek-wi ronojel ri yek'atzin richin yetij, ri aceite y ri vino.

¹² Y chuqa' chupan ronojel ri tinamit ri' xeruyala' tobel y kum, y kan xkiben achi'el ri nubij rija' chike ri e rijatzul kan ri Judá y ri Benjamín.

¹³ Konojel k'a ri e sacerdote y ri e levita ri ek'o pa ruwach'ulew Israel ri k'o pa xaman, xepe richin xjunamatej-kiwech rik'in ri rey Roboam.

¹⁴ Ri Jeroboam y ri e ruk'ajol man chik xkiya' ta q'ij chike ri e levita richin xkiben ri rusamaj ri Jehová y roma ri' rije' xekiyala' kan ri kulew ri akuchi yeyuq'un-wi y ri akuchi k'o-wi kachoch, richin xepe pa Jerusalem ri k'o pa ruwach'ulew Judá.

¹⁵ Y ri Jeroboam e rukanon ru-sacerdote richin yesamej pa ruwi' taq juyu' ri akuchi nikiya' ruq'ij ri ch'aqa' chik dios, richin nikiya' kiq'ij ri aj-tzay y ri ka'i' nima-alaji' achija' taq wákix ri xeruben rik'in q'anapueq.

¹⁶ Toq ri e sacerdote y ri e levita xe'el-pe pa ruwach'ulew Israel, chuqa' konojel ri winaqi' israelita ri kan rik'in ronojel kánima nikikanoj ri Jehová, xepe pa Jerusalem junan kik'in rije', richin nikisuj kamelabel chuwech ri Jehová, ri ki-Dios y ri Dios kichin ri kite-kitata'.

¹⁷ Kere' k'a xbanatej toq xjikibex kan ri q'atbel-tzij pa Judá; ri winaqi' ri' xaxe oxi' juna' xkito' ri Roboam ri ruk'ajol kan ri Salomón y ri aj-raqen ri ek'o rik'in, roma rije' xaxe oxi' juna' xetikir xkiben ri utz, achi'el xkiben ri ánima David y ri Salomón.

¹⁸ Y ri Roboam xk'ule' k'a rik'in ri Mahalat, rumi'al ri ruch'utitata' rubini'an Jerimot, y ri rute-rutata' ri Jerimot ja ri David y ri Abihail. Y ri Abihail rumi'al ri Eliab, ruk'ajol ri Isaí.

¹⁹ Ri Roboam y ri Mahalat xek'oje' e oxi' kalk'ual: ri Jehús, ri Semarías, y ri Záham.

²⁰ Chirij re', ri Roboam xk'ule' chik rik'in ri Maacá, rumam ri Absalón; y xek'oje' chik ch'aqa' kalk'ual: ri Abiam, ri Atai, ri Ziza, y ri Selomit.

²¹ Ri Roboam xek'oje' e waqxaqlajuj rixjayil y e oxk'al ru-concubina.*f6* Jak'a kan xaxe ri Maacá ri más xrajo' chikiwech ri ch'aqa' chik ixoqi'. Y xeralk'ualaj k'a e juwineq waqxaqi' ruk'ajol y e oxk'al rumi'al.

²² Ri Roboam xuben chire ri Abiam richin xok aj-raqen y tata'al pa kiwi' ri rach'alal, roma xrajo' richin xok ta kan pa ruk'exel chupan ri q'atbel-tzij.

²³ Y ri Roboam kan xnojin richin xerutaluj-el ri ralk'ual kik'in ri rijatzul ri Judá y ri Benjamín chupan ri tinamit ri e tz'apen-kij chi tz'aq, y xuya' k'a chike pa ruk'iyal ri nik'atzin richin nikitej, y chuqa' xerukanoj kan k'iy kixjayilal.