2 Crón 1 - Kaqchiquel Bible

Ri Salomón xuk'utuj runa'oj chire ri Dios

¹ Ri Salomón, ri ruk'ajol kan ri David, xjikibex k'a chupan ri ruq'atbal-tzij y ri Jehová Dios kan k'o-wi rik'in y kan janila k'a xunimirisaj ruq'ij.

² Y rija' xeroyoj k'a konojel ri winaqi' richin xch'on kik'in, xch'on kik'in ri aj-raqen ri ek'o pa kiwi' e 1,000 aj-labal, xch'on kik'in ri aj-raqen ri ek'o pa kiwi' ri e wok'al aj-labal, xch'on kik'in ri achi'a' ri to'onela', xch'on kik'in konojel ri e aj-raqen kichin ri tzobaj y kik'in ri ch'aqa' chik aj-raqen.

³ K'ari' ri Salomón y konojel re winaqi' re' xebe k'a pa Gabaón, ri chiri' pa ruwi' jun juyu' ri akuchi nikiya-wi ruq'ij ri Dios, roma chiri' k'o-wi ri rachoch ri Dios richin molojri'il ri banon rik'in tzieq ri rubanon kan ri Moisés, ri rusamajel ri Jehová pa tz'iran ruwach'ulew.

⁴ Jak'a ri David xa ruq'axan k'a kan ri káxa richin ri rujikibel-tzij ri Dios ri xk'oje' ojer kan pa tinamit Quiriat-jearim, roma rija' chiri' pa Jerusalem rupaban chik q'anej jun rachoch ri banon rik'in tzieq.

⁵ Keri' chuqa' ri porobel ri banon rik'in q'enq'oj-pueq, ri rubanon kan ri Besalel, ruk'ajol ri Urí y rumam ri Hur, chiri' pa Gabaón k'o-wi chuwech ri rachoch ri Dios. Ri Salomón, y konojel ri e beneq rik'in xebe k'a chiri' richin xbekik'ulubej ri Dios.

⁶ Y ri Salomón xjote' k'a el chiri' chuwech ri Jehová akuchi k'o-wi ri porobel y chiri' k'a xusuj-wi e 1,000 kamelabel ri niporox chijun.

⁷ Y chupan k'a ri aq'a' ri' xuk'ut-ri' ri Dios chuwech ri Salomón, y xubij chire: Tak'utuj chuwe ri achike nawajo' richin ninya' chawe, xcha'.

⁸ Y ri Salomón xubij: Rat kan janila xajoyowaj ruwech ri David ri nata', y ja yin xinaya' kan pa ruk'exel richin xinok kan rey.

⁹ Wakami k'a, Jehová Dios tajikiba' k'a ri asujun chire ri nata', roma ja yin ri xinaya' kan rey pa ruwi' re jun tinamit re janila nim, ri kan man e ajlatel ta, achi'el ri poqolaj ri k'o chuwech re ruwach'ulew.

¹⁰ Wakami tabana' utzil taya' nuna'oj y wetamabal richin yenyuqej re winaqi' re', roma kan man jun chik k'a ri xtitikir ta xtiq'aton-tzij pa ruwi' ri atinamit re janila nim, xcha'.

¹¹ Y ri Dios xubij k'a chire ri Salomón: Roma jare' ri k'o pan awánima, y man xak'utuj ta beyomel, ni richin ta niya'ox aq'ij, ni ta ri kikamik ri e etzelanel awichin, ni man xak'utuj ta k'iy ak'aslen; pa ruk'exel ri' xa ja ri awetamabal y ri ana'oj xak'utuj richin naq'et-tzij pa ruwi' ri nutinamit ri achoq pa ruwi' xatinkusaj kan rey,

¹² roma ri' kan xtinya' k'a awetamabal y ana'oj. Chuqa' kan xtinya' abeyomel y ak'ojlemal. Kan man jun chik k'a xtiq'aton-tzij achi'el xtaben rat chikikojol ri ch'aqa' chik rey ri xe'el yan el, y ri xke'ok kan chawij rat, xcha' chire.

¹³ Toq ri Salomón xuya' yan ruq'ij ri Jehová chiri' pa ruwi' juyu' richin Gabaón, xtzolin k'a pa Jerusalem richin xberuq'ata-tzij pa ruwi' ri tinamit Israel.

Ri rubeyomel ri rey Salomón

¹⁴ Y ri Salomón xeruloq' k'a e k'iy ru-carruaje y xek'oje' e k'iy ruwinaq ri yech'oke' chirij kiej. Ronojel k'a ri ru-carruaje e 1,400, y ri achi'a' ri yech'oke' chirij kiej e 12,000. Konojel re winaqi' re' xerutaluj pa taq tinamit ri akuchi ek'o-wi ri ru-carruaje y ek'o ri xek'oje' kan chiri' pa Jerusalem rik'in rija'.

¹⁵ Chuqa' kan xumol ruchi' saqipueq y q'anapueq pa ruk'iyal chiri' pa Jerusalem, y kan achi'el chik k'a ri abej rubanon, y chuqa' janila xetamex ruwech ri tiox-che' kan achi'el etaman ruwech ri ruche'el wíkix ri k'o chuwa-taq'aj.

¹⁶ Ri loq'onela' richin ri rey Salomón nikiloq'ola-pe ri kiej pan Egipto y pa Cilicia, y nikik'en-pe chire.

¹⁷ Toq rije' nikiloq' jun carruaje ri nipe pan Egipto, nikiloq'-pe chi 600 raqen saqipueq, y jun kiej rajel 150 raqen saqipueq. Y ri rey kichin ri hitita y ri ki-rey ri aj-Siria nikiloq' kan chuwi-kiq'a' ri e rusamajela' ri rey Salomón.